کێ جەلاد بوو
PM:05:52---03-02-2016
ئه‌م بابه‌ته 8874 جار خوێنراوه‌ته‌وه‌‌
شانۆنامە ئیدریس حەمەساڵح

تارییکی هەموو شوێنێکی تەنیوە تیکەڵ بە بێدەنگیەکی ترسناک بووە ساتیک یان چرکەیەک وەک ئەوەی هیچ لە وجوودا نەبوبیت ، دوایی چەند چرکەیەک دەنگی ترپەی دڵ  بێدەنگیەکەی شکاند . رەنگیکی سورباو تەنگی بەتاریکیەکە هەڵچنیو هەموو شتێ رەنگێکی سورباوی گرتبوو ، کورسی و مێزێک لەناوەراستی ژووریکدا، دیواری ژوورەکە بەوینەی سەرۆکەکان و وینەی جەنگ و کوشتار و چەند تابلۆیەک کە بیجگە لە رەنگیکی سوور هیچی تر لە تابلۆکاندا نەدەبینرا . ئاوینەیەکی سورباویش هەلواسرابوو لە ناوەراستی  دیواری ژوورەکە .
   دەنگی پیکەنینێکی کز و بیزارکەر لەسوچێکی ژوورەکەدا هات کە خەریکی هەلواسینی قولاپ بوو، لە تەنیشتیدا مێزێک دانرابوو جۆرەها چەقۆ و کەتەرو پلایس و مەقەستی گەورە و مشار و تەورێک دانرابوو. لەسەرویەوە تیشکیکی تاریکی سورباوی لەسەر بوو سیمای ریشن و چرچ و لۆچی سەرگۆنا پیرەکانی تەنها سیمایی دیوانەیەکیان پێ دەبەخشی ، کراسیکی سپی پەڵە خۆیناویەکانی سەری وەک تابلۆکانی سەر دیوارەکە دەچوو، پانتۆلێکی ڕەشی لە پێدابوو ، دەستی برد تەورەکەی گرت بەدەستیەوەو بە هەستیکی پەشیمانیەوە وتی ( سەردەمانیک لە شاریکدا یەک دوو جەلاد هەبوو کەچی ئیستا مەملەکەت هەمووی بوە بە جەلاد) دەستیکی هینا بە ڕیشە سپیەکەیداو وتی(من ئیستا ئیتر هەست بە مانویەتی ئەکەم ) تەورەکەی دانایەوە سەر مێزەکە بە خەم ساردیەکەوە (وا بروات ئیش و کار لە دەست ئەدەین، دەمێکە و ئەم قوڵاپانە هیچ کەلە سەریکی پێ هەڵنەواسراوە) . بەرەو مێزی ناوەراست هەنگاوی نا تیشکە تاریک و سورباوەکەش لەگەڵیدا درٶشتپاشان بەدەنگیکی بەرزتر (هێندەی بە خەیاڵمدا بێت وەک باوکی جەلادیشم بۆی گیرابومەوە ئەم ژوورە تەنها جەلادەکانی تیدا بوون هەر ئەوانیش بەم ڕەنگ و وینانەی ئەم ژوورە ئاشنان، ئەو دەیوت لەسەردەمانی کۆندا کەسێک ویستی بێتە ئەم ژوورە بەڵام هیندە بەرگەی نەگرت و شیت بوو دواجار مرد، هەندێک جاریش ئەوانەی کە دەمان هینان بۆ هەڵواسین پێش ئەوەی قولاپەکان لە ملیان بنێین  ئەوەندە هاواریان دەکرد تاچاویان وەک هەڵمات دەردەپەریی و میشکیان دەتەقی) .
   کەمێک بێ دەنگ بوو وەک ئەوەی بیر لە شتیک بکاتەوە پاشان جگەرەیەکی لە پانتۆڵە رەشەکەیدا دەرهیناو سەیریکی ئەو وێنانەی کرد بە دیوارەکەوە هەڵواسرابوون مژیکی قوڵی دا لە جگەرەکەو دووکەلەکەی بەرەو وینەکانی سەر دیوارەکە دایەوە وتی( یەکەم رۆژم کە هینامیانە ئیرە رۆژیک پێشتر باوکم  مردبوو ئیتر دەوڵەت منیان راسپارد جیگەی باوکم بگرمەوە ئەو رۆژە رۆژیکی باراناوی چەخماخەی هەورەکان ئیستاش لەم ژوورەدا دەنگ دەداتەوە من ئەوسا گەنجێک بووم هەمیشە عاشق بووم ، خەونی گەورە و هیوای گەورەم بەژیان هەبوو ، لەگەڵ ئەفسەریک و پیاویکی تر کە پیدەچوو پیاویکی گرنگی دەولەت بیت  هینامیانە ئەم ژوورە )لەگەل قسەکانیدا سەیری ژوورەکەی کرد و دەستی کردەوە بەگیرانەوەی یەکەم رۆژی دەستبەکار بوونی وەک جەلادی ژووری سوور(کاتیک دەرگایی ژوورەکەیان لێکردمەوە رەنگی سوروو بۆنی خوێنی ژوورەکە هیچ مانایەکیان بۆ ژیان نەهیشتبووەوە،  ئەوان  ویستیان نامەی دەستبەکاربوونم پێ بدەن بەڵام من کاتێک هۆشم کردەوە لە خەستەخانە کەوتبووم) ، ئاهیکی قووڵ لە ناخیەوە هاتە دەرەوە و مژیکی تری دا لە جگەرەکەو دریژەی پێدا (بۆجاری دووەم و سییەمیش من توانام نەبوو چرکەیەکیش لیرە بمینمەوە). دەنگی زیاتر بلند کردەوەو بە تورەیەکەوە ( نااااااا ناااااا نەدەبوو ئەوەم بکردایە )
چرکەیەک بیدەنگ بوو جگەرەکەی فرێدایە بەردەم پیڵاوەکانی و پێیەکی پیدا نا تا گری جگەرەکەی کوژانەوە بە کزۆڵیەکەوە کە هەمووی پەشیمانی بوو وتی( دوای ئەوەی دەوڵەت زانیان من بەم دڵەوە ناتوانم کاریکی وا بگرمە ئەستۆ ناچار بوون )، بەدەنگیکی زۆر بەرز وتی (بەلێ ناچار بووون دڵم دەربهینن  ئااااااااااااای خودایە هەرگیز ئەو رۆژەم بیر ناچیتەوە )، پاشان بەهیمنیەکەوە(بەڵام کەس بەمە نازانێت تەنها خۆم نەبێت ، تەنها خۆم دەزانم کە ٤٠ساڵە و بەبی دڵ و ترپەکانی دەژیم )!! کەمیك بیدەنگی و پاشان بەزەدەخەنەیەکەوە تیکەڵ بەگریانێکی هێمن وتی ( کەچی ئیستا مرۆڤەکان هەموو بێ دڵن ! ئای چی سەردەمیکی خویناویە).
   لەپڕێکا دەنگیک لەودیووی ژوورەکەوە ئەمی راچەڵەکاند  دەنگەکە تابڵیی گروو پیاوانە بوو وتی  (ها ئەوە کەلەسەری دوو تاوانبارە هەلیانواسە) ، دوو کەلەسەر کە پیچرابوون لە پەتوویەک فریدرانە ژوورەوە ، جەلاد بەدەم هەنسکی گریانەوە کەمیک لە کەلە سەرەکان وردبویەوە ، بە قاچی کەلەسەرەکانی بردە سوجیکی ژوورەکە کە قولاپەکانی لێهەلواسی بوو، پاشان گەرایەوە بۆ ناوەراستی ژوورەکە کە مێزێک و کورسیەکی لێبوو ،لەسەر کورسەیەکە دانیشت و بەهەستێکی مانوویەتیەوە پالی دایەوە ، بە چەرخێک مۆمی سەر مێزەکەی داگیرسان لەژیر مێزەکە قاپێک شەرابی دەرهینا دەفتەریک و قەلەمێک لە سەر مێزەکە بوو ، چەند قومێکی لە شەراب دا و قەڵەمەکەی هەلگرتوو سەری بەسەر دەفتەرەکەدا شۆڕ کردەوە و چەند دێرێکی نووسی.
 کەمیک بۆڵە بۆڵی کرد وەک ئەوەی بیەوێت گۆرانیەک بڵێت ئیتر کەمێک بیدەنگ بوو، لەناکاو ترپەی دڵیک هات دانەیەک دوو تا دە ترپە بوو ! جەلاد بە حەپەساویەوە  سەری بەرزکردەوە قەلەمەکەی دانا  دەسی برد بۆ سەر دڵی بەڵام چیتر دەنگی ترپەی دڵ نەما ،  سەریکی بادا و وتی(هەرکاتیک مەست دەبم گوێم لە ترپەکانی دڵم دەبێت ، ئای خودایە من چەند نەفامم هەتاکەی بە هیوای دڵ و ترپەکانیەوە بم !)
 کەمێک لە شوشە شەرابەکەی رووانی،  لە گیرفانیدا مۆبایلەکەی دەرهێنا  لەدوای لیدانی چەند ژمارەیەک  ( هەلوو من جەلادی پیری ژووری سوورم، ئەگەر دەکرێت قاپێک شەرابم بۆ بهینیت ، نا مەزەی چی ،من خۆم مەزەی خۆمم ) مۆبایلەکەی لە پاڵ شوشە شەرابەکەدا دانایەوە.
 دیسانەوە دەنگە گڕوو گەورەکەی دەرەوە پاش هەڵدانی توورەکەیەکی گەورە بۆ ژوورەوە  وتی( ها بیگرە و بێ ئیش دامەنیشە  ئەمانە  لاشەی بەجێماوی ئەو کەلە سەرانەن دوای ئەوەی جیات کردنەوە ئاگات لێ بیت  کەلە سەرەکان و لاشە کان تیکەل نەکەیت) . 
جەلاد دەنگی هەڵبڕی ( ئەمانە چیان کردبوو) !؟
 دەنگە گڕەکە وتی(  یەکیکیان لە سەر سیاسەت و ئەوی تریشیان لەپێناو سیاسەتدا کەلەیان پەراوە  پاشان تۆ چیت داوە لە پرسیار کردن ) بە پیکەنینێکی بەرز کۆتایی بە قسەکانی هینا.....
جەلاد بەبێ ئاوردانەوە لە توورەکە خوێناویەکان لەسەر کورسیەکە دانیشتبوو  گوێی بەقسەکان نەداو بە  مەستیە کەوەوتی( من بەم مەستیەوە چۆن بتوانم ئەم کەلە و لاشە پەریوانە جیابکەمەوە  بە دەم ئاخ کێشانیکەوە  (هەر سەردەمی کۆن باشتربوو، ئیشمان ئاسانتر بوو ئەو کاتانەی تاوانباریکیان دەهینا بۆمان   پێیان دەوتین ئەوانە کە دێنە بەردەستمان ئەو مرۆڤانەن کە چی تر بە کەڵکی کۆمەڵگا نایەن ، دەبیت لە ناو ببرین ئیمەش بەم قولاپانەوە هەڵمان دەواسین تا بەدەم ئازاروو پەشیمانیەوە دەمردن ، کەچی ئیستا دەبیت لاق و دەستی ئەو بنیم بە سەر کەلەو سەری ئەوی دیکە )، بە هەستیکی نامۆیەوە (چیبکەم چاوەکانم کزبوون جەستەکانم بۆ لیک جیاناکریتەوە پاشان مرۆڤ دوای مردنی هەموو شتیکیان لە یەک دەچیت ).
 سەریکی کاتژمیرەکەی دەستی کرد و بەزەردەخەنەیەکی گالتەئامیزەوە(چل ساڵەو ئەم کاتژمیرە نەعلەتیەم لەسەر کاتژمیر ١ راوەستاوە ) ، کەمیک ئاوڕی لە تورەکە خۆیناویەکان دایەوە ، بەدەم رۆشتن بەرەو قولاپەهەلواسراوەکان  وتی( باوکی جەلادم دەیوت مرۆڤەکان بۆ ئەوەی بەرەڵانەبن هاتن  دیسپلین و بەربەستیان بۆ رەهایەتی ئازادیەکانیان دانا ، پاشان ناویان نا دەستوور و دەوڵەت بۆ رەهایی دەسەڵاتی خۆیی رەهایی ئازادی لە تاک سەندەوە و سزاو بەند کردنی دانا ، ئەوانەشی کە سزا دەر بوون ناویان نان جەلاد ).
 کەمیک بەرامبەر قولاپە هەلواسراوەکان وەستا و پاشان بەرەو سوچەکەی ئەوسەری ژوورەکە ڕۆشت و وتی(بەڵام یاساکان بۆڕامکردنی  ئەوانەبوون کە هەستی ئازادیان لەوانی تر زیاتر بوو، باوکم دەیوت مرۆڤە سادەو سروشتیەکان یاسایان ناویت چونکە ئەوان بەبی یاساش ئازاری کۆمەڵگا نادەن ، ئەوانەی  ملیان بەر ئەم قولاپ و چەقۆیانەی تۆ دەکەویت ئەوانەن ناتوانن لە ژیر چەتری یاساکاندا بژین، ئەوانەن یاخی بوون لە ناو گیانیاندایە، یان ئەوانەن تەنها دەیانەویت خۆیان هەقیقەت بن تەنها یەک هەقیقەتیان دەبینی).
 گەرایەوە بۆ ناوەندی ژوورەکەو دریژەی دایەوە بە قسەکانی( ئەو دەیوت بەدریژایی ئەو ساڵانەی لەم ژوورەدا بووم تەنها ئەو مرۆڤانەم هەلدەواسی کە بۆنی ئازادی کاسی کردبوون) ،لەوسەری ژوورەکە چەقۆیەکی گرت بەدەستیەوە و کەمێک لێی روانی و سەری هەلبری و درێژەی دایەوە بە قسەکانی(باوکی جەلادم دەیوت بەم چەقۆیانە لوت و گویانمان دەبڕین تا چیتر لە ژیر چەتری یاسا و دەوڵەتدا دەرنەچن ، ئەو کاتیک باسی سزای بەندیەکانی دەکرد هەستیکی خۆشی هەبوو هەرگیز پەشیمانی پیوە دیار نەبوو تامرد)..  
  بە دەنگیکی هیواش و لەسەرخۆوە (بەڵام باوکی جەلادم تۆ هەڵەبوویت تۆ نەدەبوو مرۆڤە ئازادەکان سزا بدەیت ، ئیستا لە سەردەمێکداین هەموو شتەکان خراپ بوون) ، بە بەزەیەکەوە لە چەقۆکەی دەستی رووانی و وتی (ساڵانێکەو ئەم چەقۆیانە ملی کەسیان نەپەراندووە ئیستا تاوانبارەکان خۆیان بەلەتو پەتی دینە ئیرە، ئەم جەقۆیە تەنها بۆ خەیارو تەماتە بەکار دەهینم من چیتر پیویستم نە بە مشارە بۆ برینەوە نە خنجەرو شمشیرە بۆ پەراندنی ملە کان) ، چەقۆکەی هەلدایەوە سەر مێزەکە، ئاهیکی هەڵکێشا بە بیزاریەکەوە وتی  (جەند بی تاقەتم) ، دەستی برد بۆ سەری( ئای سەر ئیشە کوشتومی  ئاخر چۆن سەرم نەیەشیت تەنانەت  ئەم جەستە و سەرە پەریوانەش حەز بەم ژوورە ناکەن، من بۆگەنم کردووە یان ئەوە بۆ گەنی ئەم کیسە خویناویانەیە د یت).
 بەرەو مێزی ناوەراستی ژوورەکە رۆشت قاپە شەرابەکەی گرت بەدەستیەوە بەلام هەستی کرد کە هیجی تیدا نەماوە (ئای خودایە کوا شەرابەکەی ناوی؟ ئەی کوا بۆ بۆیان نەهینام ، من زۆر هەست بەتەنیایی دەکەم ، لەو ساتەوە کەلە سەرەکان بە پەریو دینە ئیرە ئیتر کەسیک نیە بیدوینم  پیشتر ئەوان  پێش ئەوەی بەقولاپەکاندا هەڵیان بواسین،کەمیک باسی رابردووی خۆیانیان بۆ دەکردم ).
   لەسەر کورسیەکە پالی دایەوە جەگەرەیەکی تری دەرهیناو  بەدەم زەردەخەنەوە ( ئەوان باسی پیاوەتی و شەهامەتی و چاونەترسی خۆیانیان بۆ دەکردم،  یان دەگریانو بانگی دایکیان دەکرد وەکو مندال، یان بەدەم لیزمەی گریانو فرمیسکەوە باسی دلداری و خۆشەویستەکانیان بۆ دەگیرامەوە، ئای چی دنیایەکی سەیرە ئەوان لەوکاتەی دڵنیابوون کەدەمرن کەچی بۆ عیشقی بەبابردویان دەگریان)!.
 مژێکی قوڵتری لە جگەرەکەی داو کەمیک لەناو دووکەلی جگەرەو داڵغەلیدان بیدەنگ بوو لەو ساتە بیدەنگیەدا  دەنگی ترپەی دڵ هات و دەستی برد بۆ دڵی و وتی ( خودایە هەرکاتیک باس لە عیشق دەکەم گویم لە ترپەکانی دڵە دەرهاتووەکەم دەبێت!  ئەمە چی سەرلیشیوایەکە من چل ساڵەو بی دڵ و عیشق لەم ژوورەدا بەس گیانی مرۆڤەکان دەکیشم ئیتر من بیجگە لە ئالەتیکی ئازار دەر هیچی تر نیم ).
 هەستایە سەر پێو بە گیانیکی شەکەتوو ماندووەوە بەرەو ئاوینە سورباوەکە رۆشت کە لە ناوەراستی ژوورەکەدا لە خوار وینەکانەوە هەلواسرابوو، دەستێکی بەریشە سپیە دریژەکەیدا هیناوتی( هەست بە پیربوونم دەکەم ! ئیستا من ناتوانم جەستە شیواوەکانی ئەم ژوورە لیک جودا بکەمەوە )، کەمیک بێدەنگ بوو پاشان لە چوارچیوەی ژوورەکەی رووانی بەدەنگیکی بەرز لە هاوارێک دەچوو وتی(من نازانم لەدەرەوەی ئەم ژوورە چی روودەدا  ئاخ  ئەمە چیە روودەدات )!! 
 دەنگە گڕوو بەرزەکە لەدەرەوەی ژوورەکەوە  وتی( تۆ ئەی پیری جەلاد ، ئەمانەش کۆمەڵیک جەستەی ترن ) لەگەڵ هەڵدانی جەستەکاندا کە لەتوورەکە خویناویەکاندا بوون وتی(ئەوانە ئەمرۆ بوونەقوربانی ئیتر چۆنیان جیادەکەیتەوە کەیفی خۆتە ئیمە نامانەوێت تۆ بێ ئیش بیت) ، لەگەڵ قاقایەکی گەورەدا کۆتایی بە قسەکانی هینا.
   پیرەی جەلاد بێباکانە هەنگاوی بەسەر تورەکە خوێناویەکاندا دەناو  وتی(ئای هاوار ئەمە چی ماڵ ویرانیەکە دەگوزەریت . چاک لەبیرمە کاتیک باوکی جەلادم دەیوت کە رۆح لاشەی جیهیشت دەبیت جەستەکان جوان راگیرین و لەژیر خاکدا بە رێزەوە بشارینەوە)  .
 دیسانەوە لە ئاوینەسورباوەکەی روانی و وتی( هەر بەراست پیر بووم  نازانم تەمەنم چەندە بەڵام دەزانم ٤٠ساڵەو  هەروا سەری پەریی و جەستەی شیواو دەنیم بەیەکەوە ) ، لە کەلەی پەریویی ناو تورەکەکانی روانی  وتی(شەویکیان خەوم بینی زۆر سەیر بوو خەویکی سەیر بوو ! لەخەومدا کەلەسەریکی پەریوو دەگریا و کۆمەڵێک قاچی پەریوو شەق شەقینیان پی دەکرد )، بەدەم پیکەنینەوە لە رەسمی سەردیوارەکانی روانی  کە وینەی جەنگ بوون  ، لەپرێکا وەک شێتیک خێو دەستی لیوەشاندبیت هاواری کرد (ئای لە درندەیی مرۆڤەکان ! نەفرەت لەئایدۆلۆژیا،  کە ژەهری هەقیقەتت پی دەنۆشێ، بوونی هەقیقەتیکی رەها واتە بوونی درندەیی مرۆڤ ، چونکە هەقیقەت دوژمنیکی ترسناکترە لەسەر مرۆڤ تا درۆ١،بوونی جیاوازیەکان واتە بوونی دوورکەوتنەوەی بەها مرۆڤایەتیەکان لە یەکتر واتە بوونی کێشە لەبن نەهاتووەکانی مرۆڤ  تادواجار سیاسەت بەقاچەکانی یاری بەکەلە سەراکان دەکات ) ، لەدوای ئەم قسانە وەک هەست بە ماندووبوون بکات رۆشتەوە لە سەر مێزەکە دانیشت ، سەری شورکردەوە بەسەر مێزەکە بۆ ئەوەی وەنەزیک بدات.
 دنگە گڕەکەی ئەو دیوو ژوورەکە وتی (هەستە ئەی سەرلیشیواو )، بەدەم قاقایی پیکەنینەوە چەند کەلە سەریکی پەریوی هەلدایە ژوورەوە .
 پیرەی جەلاد وەک ئەوەی بەتەوای هەستەکانی لە دەستدابێت هەستایەوە سەرپێ، دەستی کرد بەشەق تیهەلدانی  کەلە پەریوەکان لەبەرخۆیەوە دەیوت( ئەوان لەپیناو پیرۆزیی و هەقیقەتە رەهاکاندا کەلەی سەرەکان دەپەرێنن، ئای لەو بێ ویژدانیە هیندە مرۆڤ بینرخ بووە لەدوای پەراندنی کەلە سەرەکان یاری بە جەستە و سەرە پەریوەکان دەکەن )، بەردەوام بەو حالە شێتیەیەوە بە قاچی لە کەلەی پەریو تورەکە خوێناویەکانی هەلدەدا و وتی ( ئەوان لەپیناو خودا و بەرژەوەندیدا دەرەوەی ئەم ژوورەیان کردوە بە دۆزەخ بۆ مرۆڤەکان ، ئیستا ئەوان بوون بەجەلاد و منیش لەم ژوورەدا شەرم لە مرۆڤبوونی خۆم دەکەم، ئیستا دوای چەندین ساڵ هەست دەکەم دەرەوەو ناوەوەی ئەم ژوورە وەک یەک وایە منی جەلاد و ئەوانی تر چی جیاوازیەکمان نیە )، بەسەر لاشەکاندا کەوت کەمێک بێ دەنگ بوو ، دەنگی ترپەی دڵ لە ناو بیدەنگیەکی ترسناکەوە دەهات بەدەم کوڵپەی گریانەوە سەری هەڵبری و دەستی بەسەر جەستە خۆیناویەکاندا دەهینا ، بەچاویکی پڕ لە فرمیسکەوە هەستایەوە سەرپێ و بە هەستو جەستەیەکی ماندووەوە  بەرەو مێزی ناوەراست رۆشت لەسەر کورسیەکە دانیشت و شوشە شەرابەکەی بە خاڵی نا بە دەمیەوە ، کەمیک لە شوشە بەتاڵەکەی ڕوانی و  بەدەم شیعریکی خیامەوە 
                        گۆڕم وا تیک دەن  نەیبێ نیشانە                                                                             بمکەن بە عیبرەت بۆ ڕووی زەمانە                                                                         خۆڵم بە شەراب بە قوور بشێلن                                                                              بۆ خۆشی سەری کوپەی مەیخانە  
 قەڵەم و دەفتەرەکەی گرتەوە بە دەستە لەرزۆکەکانی و بەدەم بۆڵە بۆلی گۆرانی وتنەوە هەندیک شتی نووسی پاشان بە هیمنیەکەوە سەری هەڵبڕی  وتی ( باوکی جەلادم پێی دەوتم میژووی مرۆڤایەتی لە سەر جیاوازیەکان بنیادنراوە ، لە میژوویی ئاینیەکاندا  بەکوشتنی براکان هابیل و قابیل دەست پێ دەکات ، ئەوان تۆوی جیاوازیان چاند ئیتر لەو کاتەوە مرۆڤ بوو بە گورگی مرۆڤ و بەردەوام ئەم یاریانە دوو بارە دەبنەوە،  هەروەها دەیوت ئیستا سەردەمی بە درندەی مرۆڤە لە سایەی سیاسەت و بەژەوەندیە شەیتانیەکانەوە ، چی تر مرۆڤ جینشینە میهرەبانەکەی خوداوەند نیە)!! 
سەری بەسەر قەڵەم و قاغەزەکەدا دانەواندەوە بەدەم هەنسکی گریانەوە دەستی کردەوە بە نوسین ، دەنگی ترپەی دڵ و هەنسکی گریانی پیرەی جەلاد ئاوێتەی یەکدی بوون ترپەکانی دلی جەلادی پیر ئاسایی بویەوە  بەلام ئەم هیچ هەستیکی وای نەمابوو تا بزانیت دلی ئەوە لیدەدا ، پیرە دەستی برد لە گیرفانیدا وینەیەکی دەرهینا بەتاسەوە بە چاویکی فرمیسکایەوە وتی(ئای لەو سەردەمانەی تەنها عیشقم دەناسی هەموو دنیا لەلام جوانی و لەزەت بوو ئای خودایە ئەمە چی سەردەمێکە! )، بەدەم هاوارو گریانەوە سەری نایە سەر مێزەکەو ئیتر هەموو دنیا لە گەل لیک نانی چاوەکانی ئەودا خامۆش بوون ......................................................................................

    تەقەی دەنگی دەرگاو قاقای پیکەنین هەموو خامۆشیەکەی بیدارکردوە رەنگە سورباوەکەی ژوورەکە نەماو هەموو شتی بەتەواوی رۆشن بویەوە ، دوو کەس هاتنە ژوورەوە  یەکیکیان بە جلی سەربازیەوە ئەوی دیکەیان با چاکەت و پانتۆلیکی رەش جانتایەکی دیبلۆماسیەوە هاتنە ژوورەوە بەدیمەنی ناو ژوورەکە سەرسام بوون ،لە پڕپیکەنین و بزەی سەرلیوەکانیان گۆڕان بە توورەبوون ، چاکەت لەبەرەکە بەرەو وینەی سەرکردەکان رۆشت، بە شیواندنی رووی سەرکردەکان و خویناوی بونی روخساریان تورەەتر بوو بەدەنگیکی بەرز هاواری کرد (ئەی پیری بی کەلک هەستە لەخەو تۆ چیت کردووە لەم ژوورە )؟ لەقەیەکی لە ژیر کورسی پیرەی جەلاد دا بەڵام بەبی جوڵە بوو ،  سەربازەکە لە توورەکە خویناویەکانی دەروانی بەرەو قولاپە هەلواسراوەکان رۆشت ئەو چەقۆ و مشارانەی گرت بەدەسیەوە کە لەسەر مێزەکە دانرابوون ، بە پۆساڵەکانی پێی ئەو کەلە سەرانەی ریگاکەی گرتبوو هەلدانە سوچێکی ژوورەکە ، کە مێک لە ئاوێنە سورباوەکەی روانی و سەیریکی ئەو وینانەی کرد بەسەر دیواری  ژوورەکەدا هەڵواسرابوون ، گەرایەوە لای چاکەت ڕەشەکەو وتی (لەم ژوورەدا هەست بە ئارامی دەکەم) ، پاشان لە کابرای جەلادی رووانی و بە تورەیەکەوە وەک توڕەبوونی لە سەربازەیکی هەلهاتوی لە جەنگ وتی ( هەستە جەلادی نەگبەت ئیرە جیگای خەو نیە).!
چاکەت رەش بە گالتە پی کردنیەکەوە( وڵاتێ ئەمە جەلادەکەی بێت دەبیت سەرۆک چاوەرێی چی بکات لە کاربەدەستەکانی تری ، ئەم ژوورە چی تر پیویست ناکات هەبێت )
سەرباز (منیش پێشنیازی ئەوە دەکەم هەموو جەلادەکان برۆنەوە ماڵەوەو چی تر پیویستمان بەم ژوورە سورانە نیە بۆ ئازارو ئەشکەدانی تاونباران)
چاکەت رەش بە هەمان لووت بەرزیەوە (ئیستا دەرەوە و ناوەوە وەک یەکن شتی شاراوە نەماوە ، بگرە لە دەرەوە و لە ژیر ئاساماندا مرۆڤەکان زیاتر ئازار دەدرین وەک لەم ژوورە سورانەدا، هەربۆیە هاوراتم و هەر زوو ئەو پێش نیازەت دەکەم بە راپۆرتیک و دەیدەمە دەست سەرۆک)
سەرباز بە پیکەنینەوە ( تۆ سەیر کە ئەم پیرەش شەراب دەخواتەوە )
چاکەت ڕەش( ئەی ئەو قەڵەم و قاغەزانە دەبی بۆ چی بوبیتن )، ئەو کاغەزو پەرانەی لەسەر مێزەکەبوون هەڵی گرتنەوە وەک ئەوەی بەدوای بەڵگەیەکدا بگەڕێ وورد بویەوە لێیان ، یەکەم پەرەی لە ناو دەفتەریکی بچوکدا هەڵدایەوە  دوای سەرنج دانیک وەک ئەوەی لە هیچ حاڵی نە بوبێت وتی ( ئەم سەگبابە دەستو خەتی هیندە ناشرینە کەس لێیان حاڵی نابیت)، دەفتەرە بچوکەکەی دانایەوە لە پەرە و کاغەزە دراوەکانیی روانی  وتی( ئەمانە لە شیعر دەچن )!!  ئەو پەرانەی دانایەوە کە لیی دەروانین  پاشان بە پێکەنینێکەوە وەک ئەوەی ختوکەی بدەن وتی( بابە ئەم کەلتە کۆنە عاشقیش بووە  )،  بە سەربازەکەی وت ( سەیری ئەو وینەی دڵ و گوڵ و تیرانە بکە چۆنی کێشاوە) هەردووکیان بەدەنگیکی بەرز دایانە قاقای پێکەنین .
سەرباز دوای پیکەنینە کەی وەک ئەوەی هەست بە پەشیمانی بکات بەسەر جەلادی پیردا قیژاندی (هەستە ئەی ماڵ ویران ئەمانە چین نوسیوتن هەستە ئەم وینانە چین کیشاوتن  تۆ چیت ؟ پیاو کوژیت یان عاشق کامیانیت؟) پاشان بە هیمنیەکەوە لیی روانی وتی (کێ لە ناو خوین و لاشەی مردواندا شیعرو وینە دەکێشێ، هەستە ئەی بەد بەخت )
چاکەت رەش (ئەم یادەوریی و کاغەزانە دەبەم چونکە هەست دەکەم ئەم ماستە مویەکی تیدایە)
سەرباز( مەبەستت چیە)!!؟
چاکەت رەش (مەبەستم ئەوەیە بڵێم ئەمە جەلاد نیە)
سەرباز( ئەی دەبیت چی بیت)
چاکەت ڕەش(نازانم دەبێت لێکۆلینەوەی لێبکەم هەندیک شتی نامۆ دەبینم)
سەرباز ( وەکو چی)
چاکەت ڕەش (وەک شوشەی شەراب، قەڵەم،کاغەز، دەفتەری بەر باخەڵ، وینەکێشان ، شیعر،هەڵواسینی وینەی سەرکردەکانی وڵات و شیواندنی لۆت و چاویان، جیانەکرندوەی لاشەی کوژراوەکان و هەڵنەواسینی تاوانباران بە قولاپەکانەوە ئەمە سەرەرای ئەوەی کە خەوتوە دڵی وەک مرۆڤی ئاسایی لێدەدا)
سەرباز بە سەرسورمانیکەوە(چی لیدانی دڵ مەبەستت چیە؟
چاکەت رەش چاوی بریە ناو چاوانی سەرباز و وتی( ئەو دەبوایە بێ دڵ بوایە ، ئیمە دڵی هەموو جەلادەکانی وڵاتمان دەرهیناوە پێش ئەوەی بیان هینین  بۆ ژوورەکان)
سەرباز وەک دڵنیابونەوە لە راستیەک ( ئا.. وایە ئیمەش کاتێک بوین بە ئەفسەری باڵا ئیتر دڵیان دەردەهیناین )
چاکەت ڕەش ( ئیمەش کە لەدەزگا هەواڵگیریەکاندا کار دەکەین دڵمان لە شوشەکاندا دادەنیین ، پیاوانی دەوڵەت ئەوانەی فەرمانە باڵاکانی وڵاتیان بەدەستە هەموو دڵیان لە شوشەی کریستاڵدا دادەنین پێش ئەوەی فەرمانیک دەربکەن )
سەرباز ( ئەی سەرۆک)؟
چاکەت رەش ( ئەوان هەر لە ئەزەلەوە نیانە و ناشیان بیت).
 وەک دەرکردنی فەرمانیک رووی لە سەرباز کردوو وتی(بەڵام ئەمانە فەرمانن و نابێت بەکەسی بڵێی تەواو نهینین سەرباز)؟
سەرباز( بەڵێ وادەکەم)
چاکەت رەش دەستی لە گیرفانی ناو دوو دەستکیشی سپی دەرهیناو دەستکیشەکانی لە دەست کردووبە ئەسپایی  دەستی بر بۆ گیرفانەکانی جەلاد و دوای پشکنینی هەموو گیرفانەکانی چەند وینەیەکی دەرهینا ، وینەکان کەمیک لە گیرفانی جەلادا چرچ و کۆن بوبون ، لە وینەی یەکەمی روانی و سەیریکی سەربازی کردو وتی ( ئەمە وینەی دڵێکی سورە لە ناویدا وینەی کچێکی تیدایە لە خواری وینەکەدا بە خەتە ناشرینەکەی نوسیویتی خۆشم ئەوەییت)،  چاکەت رەش بەسەربادنیکەوە وتی( ئەمە چی عاشق بونێکە لەم جەنگەڵی ژوورە خوێناوەیدا)، وێنەی یەکەمی خستە سەر کاغەزەکان و لە وینەی دوەمی رووانی و وتی(ئەمە وینەی منداڵیکە پی دەچیت وینەی مندالی جەلاد خۆی بێت لەژیر وینەکەدا نوسیویتی  ئەو کاتانەی کە هیشتا مرۆڤم نەدەناسی)
سەباز(ئەمە مانای چیە)!؟
جاکەت رەش بی وەلامدانەوە لە وینەی سێیەمی رووانی  وتی ئەمە وینەی کابرایەکە لەخوارەوە نوسیویتی باوکم جەلادی میری پیشوو.
سەرباز بە تورەیەکەوە ( میری پێشو ئەمە چی قسەی قۆڕیکە )
چاکەت رەش وەک ئەوەی لە ئیشێکی گرنگ سەرکەوتنی بەدەست هینابیت هەموو کاغەزو وینەکانی هەلگرت و خستیە ناو جانتا رەشەکەیەوە ، پاشان بەرەوە وینەی سەرکردەکان رۆشت و بە ئایفۆنەکەی وینەی ئەو وینانەی دەگرت کە شیوابوون ، وینەی سەر مێزەکەی دەگرت ،وینەی شوشەی شەرابەکەی دەگرت ، لە پریکا راوەستاو لەپاڵ شوشە شەرابەکەدا مۆبایلیکی بچوکی بینیەوە ، مۆبایلەکەی هەڵگرت دەستی کرد بە پشکنینی ناو مۆبایلەکە بەلام بە سەرسورمانیکەوە بە سەربازەکەی وت (ئەم مۆبایلە هەرگیز زەنگی بۆ نەهاتووە وە تەنها یەک ژمارەی تیدایە ناوی ناوە مەیخانەی دڵە مردووەکان)
سەربازەکە بە گالتە ئامیزیکەوە (مەیخانەی دڵە مردووەکان زۆر سەیرە)
چاکەت رەش مۆبایلەکەی لە گیرفانی ناو وتی ( تەواو زۆر روونە) 
سەرباز (چی ڕوونە)
چاکەت رەش (بەلگەکان)
سەرباز ( من تیناگەم تۆ بەدوای چیدا دەگەرییت)
چاکەت رەش ( ئەمە جەلاد نیە ، وەک دەڵین گورگەو چوەتە پیستی مەرەوە)
سەرباز( ئەگەر جەلاد نەبیت کەس ناتوانیت لە ژووریکی ئاوادا ٤٠ساڵ بژی)
چاکەت رەش کەمیک بیدەبگ بوو رووی لە سەربازەکە کردوو وتی ( من دەبیت بەدوای بەلگەی زیاتردا بگەریم و لیکۆلینەوکانم ورتر بکەمەوە ، ئەمە هەرگیز نابیت جەلادیک بیت و بەس)
سەرباز ( کەواتە لە جەلادیک زیاتر بووە )
چاکەت رەش(نا ئەمە جەلاد نیە، دەکرێ لەم ژوورەدا خەریکی کارێکی تر بووبێت)
سەرباز بە هەستیکی باوەربوون بە خۆیەوە کە نەدەچووە ژیر قسەکانی ئەوە وە وتی(نا هەرگیز ناگونجیت)، بەهەموو ژوورەکەدا سورایەوە و وتی ( لەم ژوورەدا جگە لە خوین وجەستە و سەری پەراو بۆنیکی زۆر پیس دێت کەتەنها جەلادەکان بەم بۆنە رادین لەگەل هەموو ئەو شتانەی بۆ دەرهینانی زمان و برینەوەی جەستەکانن هیچی تر نابینی)
چاکەت رەش وەک ئەوەی گالتەی بەقسەکانی بیت وتی (تۆ تەنها ئەو شتانە دەبینی کە لە جەنگەکاندا دەیان بینی چونکە تۆ نازانیت شیعر و وینەو شەراب هەرگیز لە جەنگدا بەکار نایەن یان هەستی ئەوەتان  نیە بیان بینن یان لەزەتیان لی ببینن ، تۆ تەنها جەنگاوەریکی و بەس نازانیت ئەوانەی عاشق دەبن نازانن بجەنگن )
سەرباز بی دەنگ بوو  ، چاکەت رەش بی دەنگیەکەی ئەوی شکاند و وتی ( دەبیت ئەمە بۆ تۆ و دەولەتیش روون بکەمەوە ) وەک هار دەستی کرد بە گەران بە ژوورەکەدا هەموو سوچ و تاریکیەکەی ژوورەکە گەڕا لە سوچیکدا گۆزەیەکی دۆزیەوە هینای لە تەنیشت  جەلادی پیر داینا  لە ناو  گۆزەکە گولیکی سووری لی روابوو، بە ئایفۆنەکەی چەند وینەیەکی گرت 
سەربازەکە وتی( زۆر سەیرە لە پەنای رەنگی سوری خۆیندا گۆزەیەک گولی سوور دانراوە ،من لەمە تیناگەم!) سەریکی راوەشان وەک سەرەتای گومانیک بیت لە جەلاد.!
چاکەت رەش بە توورەیەکە و بەسەر جەلادا هاواری کرد (ها پیم بلی تو چیت دەکرد لەم ژوورەدا؟ چۆن جەلادیک لەزەت لە بۆنی گوڵ دەبات ! ئەم گولە سورە چی لەزەتیکی بە تۆ داوە؟ دەبی ئەمانە هەمووی بزانم).
دیسانەوە وەک شیت دەستی کردوەوە بە گەران بە ژوورەکەدا  لە سوچێکی تاریکی ژوورەکەدا کارتۆنیکی دۆزیەوە، هەستی کرد زۆر قورسە بۆیە زۆر بە هیزەوە هەلی گرت و هینای بۆ ناوەراستی ژوورەکە لە پاڵ جەلادی پیردا داینا،پاشان سەیریکی سەربازەکەی کردوو وتی( بابزانم ئەمانە چین) ؟   کارتۆنەکەی کردەوە بە حەپەساویەکەوە ( ئەمانە هەموو کتیبن!!!)
سەرباز( کتیب)!
چاکەت رەش کتیبەکانی دەرهینا و یەک یەک لە سەر میزەکەی دانا ، بەتورەیەکەوە ( ئاخر چۆن دەبیت لە ژووریکی وادا کتیب هەبیت) ، بەسەربازی وت  ( سەیرکە ئەمە دیوانە شیعری خیامە ئەمەش رۆمانی دواهەمین هەناری دونیا ی بەختیار علی، ئەوەش ئەڤەلەیشنی داروینە ، ئەوەش وینەو تابلۆ سەریالیەکانی سلڤادۆر دالی،  ئاخ نازانم سەیری کامیان بکەم لە کاتیکدا بۆنی خوین کاسی کردووم من چی لیرەدا دەبینم )،  وینەی کتیبەکانی گرت و بەسەربازەکەی وت ( ئەمانەش هەلگرەو بیانپاریزە تارۆژی دادگایی ..  ئا، بیریشت نە چیت گۆزەی گوڵە سورەکەش بهینی )
 هەموو بەڵگەکانیان هەلگرتوو رۆشتنە دەرەوە .
لیرەدا  هەموو شتی رەش و تاریک دەبیت..........................................






































زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە