ئایا ڕکابەر و دژ دەبنە دادوەر ....؟؟
AM:11:30---14-02-2017
ئه‌م بابه‌ته 154 جار خوێنراوه‌ته‌وه‌‌
لڤین: سۆران محەمەد غەریب

دوابەدوای ئەوەی یەکێتی دادوەرانی کوردستان – لقی سلێمانی دوو سکاڵایان لە دژم جوڵاند لەسەر ئەو بەڵگانەی پێشتر لە (سۆشیال میدیا)ی (لڤین) بڵاوم کردۆتەوە لە گەندەڵیەکانی چەند دادوەرێک کە لە ناو دادگاکاندا پێی هەستاون . پاشان (یەکێتی دادوەرانی هەرێم) چوە پاڵ (یەکێتی دادوەرانی کوردستان – لقی سلێمانی) بۆ ئەو سکاڵایانە . لە ئاکامدا چەندین ڕێکاری یاسایی لە دژم وەرگیرا.

لەبەر بونی چەندین کەلێن و پێشلکاری یاسایی ، لە بەرواری ٢٥/١/٢٠١٧ دوو داواکاریم پێشکەش بە دادوەری دادگای لێکۆڵینەوەی /٤ لەسلێمانی کرد تیایدا داوای داخستنی هەردوو سکاڵاکەم کرد.

لەبەر ئەوەی بە پێی یاسا ناکرێت (یەکێتی دادوەرانی کوردستان – لقی سلێمانی) و (یەکێتی دادوەرانی هەرێم) لەیەک کاتدا هەم سکاڵاکار بن و هەم ببن بە دادوەر و خۆیان بڕیار بۆ بەرژەوەندی خۆیان بدەن لەدژی بەرامبەرەکەیان ، کەواتا تەواوی ئەو ڕێکارانەی دادوەری لێکۆڵینەوەی سلێمانی گرتویەتە بەر لە پێشودا سەراپایان پوچەڵن و نایاسایین . پشت بەستن بەوەی کە دادوەری لێکۆڵینەوەی ئێستا و سەرجەم دادوەرەکانی  لێکۆڵینەوە ئەندامی یەکێتی دادوەرانن بەمەش نابێت ڕکابەر و دادوەر کۆبکرێنەوە (الخصم و الحكم) هەر بۆیە لەم دوو داواکاریەمدا داوای داخستنی سکاڵاکانم کرد.

هەروەها ئەوەشم خستۆتە ڕوو ئەگەر ( یەکێتی دادوەرانی هەرێم) سکاڵایان لە دژم هەیە دەتوانن سکاڵا لە دەرەوەی هەرێم و ناوچەکانی دی بجوڵێنن تا ڕێکارەکان یاسایی بن . بە پێچەوانەی ئەمە سکاڵاکان نایاسایین ڕێکارەکانیان بە پوچەڵ ئەژمار دەکرێن.

بەڵام سەرئەنجام دادوەری لێکۆڵینەوەی سلێمانی لەبەرواری ٥ / ٢ / ٢٠١٧ بڕیاری دەرکردوە بە پەرچدانەوەی داواکاریەکەم بە بیانوی ئەوەی بەڵگە هەیە لەسەر تاوانەکە . لێرەدا دەڵێم بەڵگە هەبێت یان نا ..؟ ئەمە چ پەیوەندیەکی بە ناوەرۆکی داواکاریەکەمەوە هەیە کە داخستنی پەڕاوی لێکۆڵینەوەکانە ، چونکە چۆن دەبێت ڕکابەر کە (یەکێتی دادوەرانی کوردستان – لقی سلێمانی) و (یەکێتی دادوەرانی هەرێم)ە بڕیار بۆ بەرژەوەندی خۆیان دەربکەن . ئەم جۆرە ڕێکار و بڕیارانە بەس لە داگاکانی هەرێمدا هەن ئەگینا لەو بڕوایەدا نیم لە هیچ دادگایەکی تری جیهاندا شتی وا هەبێت.
 
 بۆ زیاتر ڕونکردنەوە لەسەر ئەم لایەنانە هەردوو دواکاریەکە لە خوارەوە ببینە ... چاوەڕێی پێشهاتەی تازەتر بن بەم نزیکانە




زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە