گۆڕینی ئایین لە هەرێمی کوردستاندا پەرە دەسێنێت
PM:03:53---12-02-2018
ئه‌م بابه‌ته 6204 جار خوێنراوه‌ته‌وه‌‌
لڤین:
شۆڕش عەلی 18 ساڵ لەمەوبەر ئاینی خۆی لە ئیسلامەوە بۆ مەسیحی گۆڕی، پاش ئەوەی خەون بە پێغەمبەر عیساوە دەبینێت، كە بەوتەی خۆی بەهۆیەوە لە نەخۆشییەكی كوشندە رزگاری بووە.

ئەو كە لەخانەوادەیەكی موسڵمان لەدایكبووە، توشبوونی بەنەخۆشی شێرپەنجەی گەدە رێڕەوی ژیانی گۆڕی‌و ئاینێكی دیكەی هەڵبژارد كە لەناو خانەوادەكەیدا پێشتر پەیڕەوی لێ نەكراوە.

شۆڕش بۆ (ژیان) گێڕایەوە، "بینینی مەسیح شیفای دام‌و چارەسەری كردم"، ئەو وەكو هەزاران شوێنكەوتەی ئەو ئاینە پێیوایە، مەسیح كەسێكە كە كۆتایی زەمان دادەبەزێت‌و شەیتان لەناو دەبات.

ئێستا شۆڕش تەنها نییە لەناو خانەوادەكەیدا كە ئاینی خۆی گۆڕیوە، بەڵكو هاوسەرو منداڵەكانیشی هاوشێوەی ئەو بونەتە مەسیحی، كەسوكارەكانیشیان رێز لە بیروباوەڕەكەیان دەگرن.

"كێشە دروست نەبووە لەنێوانماندا، من پێنج ساڵ كۆلێژی (لاهود)م خوێند لە هەرێمی كوردستان، ئەو كۆلێژە لە ئەمەریكاو ئەوروپاوە هات، كۆلێژی (بایبڵ)ی پێدەڵێن، وەك چۆن دەڵێیت ماستەرم وەرگرتووە".

ئێستا شۆڕش قەشەی كەنیسەی ئاشتییە لەسلێمانی كە لەساڵی 2005 ەوە دامەزراوەو مۆڵەتی فەرمی پێدراوە، "تائێستا موسوڵمانان نەبونەتە رێگر لەبەردەم كارەكانماندا، پەیوەندییەكی باشمان هەیە لەگەڵیاندا، بەڵام هەندێك جار خەڵكێك هەیە حەز دەكات ببێتە مەسیحی، لەلایەن كەسوكارەكەیەوە رێگری لێدەكرێت".

هەرێمی كوردستان كە زۆرینەی زۆری دانیشتوانەكەی موسڵمانە، پەیڕەوكەرانی چەندین ئاینی دیكەشی تێدایە، لەوانە مەسیحی، یەزیدی، كاكەیی_یارسانی، زەردەشتی، بەهائی‌و سابیئە، جولەكە، بەوەناسراوە كە شوێنی پێكەوەژیانی ئاینە جیاوازەكانە.

بەپێی یاسای ژمارە (5)ی 2015ی پەرلەمانی كوردستان، ماف دراوە بەهەر كەسێك كە سەربەستە لە هەڵبژاردنی ئەو ئاینەی دەیەوێت.

ئەمیر عوسمان مەولود، بەڕێوەبەری پێكەوەژیان‌و پێكهاتەكان لەوەزارەتی ئەوقاف‌و كاروباری ئاینی، دەڵێت "هەتاوەكو ئێستا هیچ كەسێك نەهاتۆتە وەزارەتی ئەوقاف بۆ ئەوەی بڵێت من ئاینەكەی خۆم گۆڕیوە، ئەوەش هۆكارە بۆئەو ئازادییەی كە یاساكە بۆ خەڵكی رەخساندوە".

ئاینە جیاوازەكان هەریەكەیان نوێنەریان لەوەزارەتی ئەوقاف هەیە، كە كاروباری تایبەت بەپەیڕەوكارانی ئاینەكانیان جێبەجێ دەكەن.

ئاوات حسامەدین، نوێنەری فەرمی زەردەشتیان لەوەزارەتی ئەوقاف باسی لەوەكرد، ئەو كەسانەی گەڕاونەتەوە سەر ئاینی ڕەچەڵەكی خۆیان زۆرن "ئێمە ئاگاداری زیاتر لە 200 هەزار كەسین، رۆژانە ژمارەیان بەرەو زیاتر دەچێت هەرچەندە بەشێكی زۆریان ناوێرن خۆیان ئاشكرا بكەن لەبەر هەر هۆكارێك بێت، زۆرینەی ئەوانەی بونەتە زەردەشتی ئیسلام بوون، هەرچەندە مەسیحی‌و ئێزیدیشی تێدایە".

هەروەها بۆ (ژیان) ئاماژەی بەوەدا، لەئێستادا كە تەیاری حیكمە لە هەرێم دروستبووە ترسیان لێیان هەیە، "ئەوەش پەیوەندی بە ئێرانەوە هەیە، تەنانەت حەوت ئەندامی ئێمەیان بەپارە كڕیوە، لەوەتەی ئێمە لەهەرێم سەرمان هەڵداوەتەوە ئێران لەگەڵ زەردەشتیەكانی خۆشیاندا خراپبوون".

پرسی گۆڕینی ئاین لە هەرێمی كوردستان تائێستاش پرسێكی زۆر هەستیارەو ئەوانەی ئاینەكانیان دەگۆڕن بەئاسانی ناتوانن ئاشكرای بكەن.

مەریوان نەقشبەندی، بەڕێوەبەری پەیوەندییەكانی وەزارەتی ئەقاف، دەڵێت بەفەرمی هیچ ئامارێك بونی نییە، لەبەرئەوەی بابەتی بیروباوەڕ هیچ كەسێك وەك پێویست ئاشكرایی ناكات.

وتیشی "خەڵك مەودایەكی فراوانی هەیە بۆ گۆڕینی ئاینەكان، بەڵام ئاشكرای ناكەن، هەر لەچەند ساڵێك پێشنیاری ئەوەم كرد كە ناوی ئاین لە ناسنامەدا نەنوسرێت، بەڵام ئەوەبوو كردیانە هەڵڵا لەسەرم‌و نەیانكرد، بەڵام ئێستا بەپێی كارتی نیشتمانی ئەوەی تێدانیە".

بەوتەی نەقشبەندی، هاتنی داعش‌و ئەو شەڕە گەورە مەزهەبیەی لەنێوان موسوڵماناندا دەستیپێكرد، وای كردووە زۆرترین كەس لەوانەی ئاینەكانیان دەگۆڕن لەموسڵمان پێكبێن، تەنانەت كاریگەری لەسەر هەندێك مزگەوتیش دروستكردوە.

جگە لە گۆڕینی ئاینەكان، لەساڵی 2013 رێكخراوێك بەناوی (ئەتایستانی بێسنور) كە بانگەشەی ئەوەدەكات مرۆڤ هیچ ئاینێكی نەبێت هەوڵی وەرگرتنی مۆڵەتیدا لەهەرێمی كوردستان، بەڵام رێگری لێكرا.

سۆران كادێر، سەرۆكی رێكخراوەكە، وتی "ئامانجمان هوشیاركردنەوەی كۆمەڵگاو تاكی كورد بەتایبەتی بەرانبەر ڕووداوە نەخوازراوەكان كە بەناوی ئاینەوە بەرانبەر بە مرۆڤایەتی دەكرێت، هەوڵ دەدەین ئەو پەیامە بگەیەنین كە ئێمە زیان بەخش نین بۆ كۆمەڵگاو مرۆڤایەتی، بەڵكو بەپێچەوانەوە هەمیشە تەئكید لە پێكەوە ژیان‌و ڕێزگرتن‌و یەكتر قبوڵ كردن دەكەینەوە لە چوارچێوەی مرۆڤایەتیدا نەك ئاین".

ئاماژە بەوەدەكات، ئەگەر لە هەرێمی كوردستان ئازادی تەنها دروشم نەبێت‌و ژیانیان پارێزراو بێت ئەوا لە هەوڵەكانیان بەردەوامن بۆ ئەوەی مۆڵەت بەدەست بهێنن‌و بنكەش بكەنەوە.

وتیشی"لە ئێستادا ناتوانین ژمارەی ئەندامەكانمان ئاشكرا بكەین، چونكە بەشی زۆریان لە ناوخۆی كوردستانن لە(هەردوو ڕەگەز)".

پێشەوا نەبەرد، یەكێكە لەو گەنجانەی كە بووەتە ئەندامی ئەو رێكخراوە، ئەو لەماوەی رابردوودا بەهۆی وتنی گۆرانیەكەوە بۆ (عەفرین) بەوە تۆمەتبار كرا كە لەو ڕێگەیەوە سوكایەتی بەئاینی ئیسلام كردوە.

 بۆ (ژیان) وتی"دوای ساڵی 2013 وهاتنی داعش‌و زۆر بوونی مرۆڤی ئازادی خواز، هەوڵماندا كە هەموومان جەم بین‌و پێكەوە بانگەشەی مرۆڤایەتی‌و پێكەوە ژیان بكەین‌و باس لە نایەكسانی‌و فكری كۆن بكەین".

بەوتەی پێشەوا، كەسانێك هەن ناتوانن بەئاشكرا بانگەشەی ئەوە بكەن كە باوەڕیان بەهیچ ئاینێك نییە، هۆكارەكەشی گەڕاندەوە بۆ لەدەست نەدانی پێگەی كۆمەڵایەتییان.

لەبارەی گۆڕینی ناسنامەی ئەو كەسانەشەوە كە ئاینەكەی خۆیان دەگۆڕن، بەڕێوەبەری ناسنامەی باری شارستانی لە سلێمانی ئاماژە بەوە دەكات، ئەوان بەپێی یاسا دەتوانن لەپاش بڕیاری دادوەر ئاینی ئەو كەسانە بگۆڕن كە داواكاری پێشكەش دەكەن.

مقەدەم فازیل فایەق، وتی "لەسەر ناسنامەی باری شارستانی خەڵكێكی زۆر كەم هەیە ئاینەكەی بگۆڕێت، لە 2012وە تاوەكو ئێستا دووكەس كە ئێزیدی بوون هاتوون ئاینەكەیان لەسەر ناسنامەكانیان گۆڕیوە بۆ ئیسلام".



بۆیەکەمجار لڤین نهێنی هەڵاتنی نەجمەدین کەریم لە کەرکوک بەرەو هەولێر ئاشكرادەکرێت
وەزارەتی دارایی خشتەیەكی نوێی مووچەی راگەیەند
دواین هەڵوێستی عەبادی لەسەر ناردنی مووچەو کردنەوەی فرۆکەخانەکان
مام ڕۆستەم بەرامبەر 22 فڕۆکەکەی مەلا بەختیار بێدەنگی شکاند
ئارام شێخ محەمەد: قەرەبووی ئەم هاوڵاتیانە دەکەینەوە
بەغداد داواكارییەكی دیكەی بۆ ناردنی مووچەی ئاڕاستەی هەرێم كرد
هۆتێلێک لەشاری سلیمانی گڕی گرت
تورکیا هەڵوێستی لەبارەی ڕێککەوتنی یەپەگە و سوریا ئاشکرا کرد
حەیدەر عەبادی: نزیک بوینەتەوە لەدابین کردنی موچەی موچەخۆرانی هەرێم
حکومەتی عێراق بڕیاریدا قەرزی خانوبەرە بدات بەهاوڵاتیان
زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە