مەسعود بارزانی ؛ 31ى ئاب شەڕی ئیمان‌و بێ ئیمانی بوو
ئەرشیف
PM:02:16---01-09-2014
ئه‌م بابه‌ته 28716 جار خوێنراوه‌ته‌وه‌‌

 لڤین پرێس: سالار مەحمود

لەسیویەكی ئابدا شەڕو ململانێكانی نێوان یەكێتی‌و پارتی دەگەنە لوتكەو رووداوێك روودەدات كە مەحاڵە لەزاكیرەی تاكی كورددا بسڕێتەوە، ئەو رۆژە جیاواز لەجەنگی لەمێژینەی نێوانیان بەمەبەستی شكستپێهێنانی یەكێتی، پارتی پەنا بۆ رژێمی بەعس دەبات‌و نەك تەنها هەولێری لێدەسەنێتەوە، بەڵكو هێزەكانی یەكێتی تا ناو خاكی ئێران راو دەنێت، جگە لەزیانە گیانی‌و مادییەكانی، سیویەكی ئاب كوردستان دابەشدەكات بۆ هەردوو ئیدارەی سەوزو زەردو، چاودێرانی سیاسیش پێیانوایە، تامانەوەی یەكێتی پارتی، ئەو دوو ئیدارەییە هەر بەردەوامدەبێت.
                
بەپێی هەواڵی تەلەفیزیۆنی ئەوكاتەی حكومەتی بەعس، حكومەتی عێراقی وەڵامی داوایەكی مەسعود بارزانی داوەتەوە بۆ هاوكاریكرنی پارتی لەپێناو وەدەرنانی یەكێتی لەهەولێر، چونكە وەكو لەو تەلەفیزیۆنەوە باسكراوە سوپای ئێران بەهاوكاری یەكێتی هەولێری داگیركردووە، بۆیە وەكو لەهەواڵەكەدا هاتووە دوای ماوەیەكی كەم‌و بەدەمەوەچوونی سوپای عێراقی یەكێتی گەڕاوەتەوە بۆ شوێنەكانی پێشوویان‌و هەولێریان لێسەنراوەتەوە، ئەوەش وەكو پارتی ئاماژەی پێدەدات كاردانەوەی هێنانی سوپای ئێران بووە لەلایەن یەكێتییەوە.

دوای سێ‌ رۆژ بیلكلینتۆنی سەرۆكی ئەو كاتەی ئەمەریكا رایگەیاند "حكومەتی بەعس هێرشی كردووەتە سەر هەولێر كەلەژێر دەسەڵاتی كوردەكاندا بووەو سەددام حسێن دەستی بەسەر ئەو شارەدا گرتووە، ئئەو رەفتارەی سەددام وەڵامێكی بەهێز دەخوازێت، وادەردەكەوێت كەحیزبێكی كوردی كەپێشتر دژی سەدام بووە، بڕیاری داوە هاوكاری بكات، بەڵام ئەوە ناكرێت ببێتە پاساوی بەرەڵاكردنی سوپای عێراقی دژ بەهاوڵاتیان‌و خەڵكی بێتاوان، ئێمە لەرابردوودا كارمان كردووە بۆ كۆتایهێنان بەشەڕی نێوان حیزبە كوردییەكان، هێرشی سوپای عێراقیش بۆ خۆشكردنی ئاگری شەڕی نێوان ئەو حیزبە كوردییانەیە، هەولێر داگیركراوە لەلایەن عێراقییەكانەوە، هەولێر كلیلی ناوەندی بڵاوكردنەوەی هاوكاری سەرەتاییە، وەڵامی ئێمە بۆ ئەم سەركەشیانەی پێوویستە بەهێزو راستەوخۆبێت، وەك چۆن سەرۆك بۆش لەئۆپەراسیۆنی بیابانی گێژەڵووكە نیشانیدا، ئەمڕۆ پێوویستە لەسەرمان ئەوە روون بكەینە كەئەم رەفتارانە ئاكامی دەبێت".
 
دوو ساڵ دوای رووداوی سیویەكی ئاب كەناڵی ئاسمانی مید تیڤی بەرنامەیەك لەسەر سیو یەكی ئاب پەخشدەكات‌و محەمەدی حاجی مەحمود سكرتێری حیزبی سۆسیالست دیموكراتی كوردستان لەو بەرنامەیەدا دەڵێت كەدەڵێن سیویەكی ئاب، ئەو رۆژەم دێتەوە یاد كەدەبابە لەهەر چوار لاوە پەلاماری شاری هەولێری دەداو خەڵك سەریان لێشێوابوو، ژن‌و منداڵ‌و خەڵكی بێتاوان، بەر تۆپ‌و مەدفەعی حكومەتی بەعس دەكەوتن.
                     
لەسەرەتای بەرنامەكەدا دوای زەردەخەنەیەك محەمەدی حاجی مەحمود سەبارەت بەسیویەكی ئاب بۆ میت تیڤی دەڵێت:" كەدەڵێن 31ی ئاب ئەو رۆژەم دێتەوە یاد كەدەبابە لەهەر چوار لاوە پەلاماری هەولێری دەداو هەولێرو عەینكاوەش تۆپباران دەكران، ژن‌و منداڵ‌و خەڵكی بێتاوان  بەر تۆپ‌و گوللەو مەدفەعی حكومەتی بەعس دەكەوتن، خەڵك سەری لێشێوابوو، رایدەكرد، هەڵدەهات، ئافرەتم بەبرینداری دەبینی لەسەر جادەی شەست مەتری كەوتبوو، سیویەكی ئاب ئەو تاوانە گەورەیەم دێنێتەوە بەرچاو كەپارتی بەرانبەر میللەتەكەمان ئەنجامیدا".

بەوتەی محەمەدی حاجی مەحمود سیویەكی ئاب لەلایەن پارتییەوە بەرنامەی بۆ داڕێژراوە:" سیویەكی ئاب شتێكی كوتوپڕنەبوو، پارتی ساڵێك بەر لەو رۆژە چەكی لەحكومەتی عێراق وەرگرت، كۆمەڵێك دەبابەی بەرازیلی‌و مودەرەعەی وەرگرت‌و دەیشیووت ئەو دەبابانەمان لەئۆكرانیا كڕیوە، بەڵام ئەندامێكی لیژنەمەركەزییان بەمنی وت كە لەبەغداد هێناومانەو ئەگەر تۆش دەتەوێت بۆت دەكڕین، دواتر هێرشیكرد بۆسەر هەولێرو شكا"
 راپۆرتەكە ئەو پرسیارە لێكدەداتەوە كەبۆچی  پارتی بۆ ئەو كارەی كردو پەنای بردە بەر سەددامی دوژمن، ئایا نەیاندەزانی كە ئەوە كارێكی چەندە چەواشەو پڕ مەترسییە، ئایا پارتی نەیدەزانی بەمكارەی ماڵی كورد كاول دەكات‌و رەنجی چەند ساڵەی قوربانیدانی كورد بەبا دەدەن،
لەراپۆرتەكەدا چەند قسەیەكی مەسعود بەرزانی بەڤیدیۆ لێدەدەرێت كەبارزانی دەڵێت: "ئەگەر پێمان بڵێن پردێك چۆن دروستدەكرێت نازانین، بەڵام دەزانین چۆن تێكدەدرێت".

بەوتەی سكرتێری حیزبی سۆسیالست هیچ پاساوێك بۆ سیویەكی ئاب نەبووە، ئەو باس لەوتارێكی فەلەكەدین كاكەیی دەكات كە شەش مانگ بەر لەسیویەكی ئاب نووسیوویەتی‌و باسلەوە دەكات كە پارتی بۆ رەواندنەوەی مەترسییەكان پەنا دەباتە بەر هێزە نیشیمانییە عێراقییەكان:" شەش مانگ بەر لەسیویەكی ئاب فەلەكەدین كاكەیی لەرۆژنامەی خەبات‌و برایەتی نوسیبووی پارتی چۆن كێشەی خۆی لەچوارچێوەی عێراق چارەسەر دەكات، ئەگەر خەتەرێك رووی كردە پارتی كەحیزبی دایكە، دەبێت خۆی لەهێزە نیشتیمانییە عێراقیەكان نزیكبكاتەوە، ئەوەش نیشانیدەدات كەسیویەكی ئاب بەبەرنامە كراوە، بەڵام هیچ پاساوێك بۆ سیویەكی ئاب نەبوو".

 لەراپۆرتەكەدا ئاماژە بە بەشێك لەو وتارەی مەسعود بارزانی دراوە كە لەیادی سیو پێنج ساڵەی شۆرشی ئەیلولدا باس لەسیو یەكی ئاب دەكات‌و دەلێت:" ئەم سەركەوتنە لوتفی خوای گەورەیە، ئەم سەركەوتنە حەقانیەت‌و عەدالەتی پارتی سەلماند، دەبێت قەدری ئەم سەركەوتنە بزانین كەمەرحەمەتی خوای گەورەیە، خوای گەورە هاوكارمانبوو، چونكە لەسەر راستیوو شەریعەت بووین، ئەگەر ئێمەش بكەوینە هەڵەكانی یەكێتی، ئەوا خوای گەورە لێمان قبوڵ ناكات‌و میللەتمان لەگەڵ نابێت، پارتی دیموكراتی كوردستان ناچار بوو بەهەر شێوەیەك پیلانی یەكێتی دژی كورد پوچەڵ بكاتەوەو كوردی لەمەترسی مانەوەی پاراست، ئەو شەڕە، شەڕی ئیمان‌و بێ ئیمانیبوو، شەڕی نیشیمان پەروەری‌و خیانەت بەنیشیمان بوو، شەڕی ئەخلاق‌و بێ ئەخلاقی بوو، شەڕی كودایەتی‌و جاشایەتیبوو، لەئەنجامیشدا بەیارمەتی خوا حەق‌و عەدالەت سەركەوت، پارتی سەركەوت، رێبازی بارزانی نەمر سەركەوت".

بەرنامەكە نامەیەكی تاریق عەزیزی بڵاو كردووەتەوە نامەیە كەپارتی داوای یارمەتی بەپەلەی لەحكومەتی بەعس كردووەو داوا لەسەددام دەكات ئەگەر فریا نەكەوێت هەم پارتی دەفەوتێت‌و هەم سەروەری نیشیمانی عێراقیش پێشێل دەكرێت.

 هەر بەپێی راپۆرتەكە سەددام لەبەرانبەر بەشداریكردنیان لەشەڕی هەولێردا مەدایای ئازایەتی بەخشیوەتە وەزیری بەرگری سوڵتان هاشم‌و بیستوو دوو ئەفسەری پلە بەرزی عێراقی، سەددام ئەو شەڕەشی ناو ناوە شەڕی ئاب‌و ئەو شتانەش لە ژمارە 9390(ی رۆژنامە جموریەتی رۆژی 19/11/ 1996 ‌و ژمارە 1470ی گۆڤاری ئەلف بای رۆژی 27/11/ 1996دا بڵاو كراونەتەوە.

بەپیی زانیارییەكان لەسیویەكی ئابدا چل‌و پێنج هەزار سەربازی عیراقی‌و 300تانك‌و 200 تۆپی قورس بەشدارییانكردووە، هەر لەوكاتەدا نوێنەری پارتی لەدەرەوە ئەوە رادەگەیەنێت ئەو وێنانەی لەتەلەفزیۆنەوە پیشاندەدریت كەگوایە پارتی‌و حكومەتی بەعس پێكەوە هەولێریان داگیر كردووە راستنین‌و وێنەكان هی ساڵی نەوەدو یەكن.

سەبارەت بەسیویەكی ئاب فەلەكەدین كاكەیی سەرنووسەری ئەوكاتەی رۆشنامەی خەبات بیست رۆش دوای رووداوەكە بەدەنگی كوردستانی عیراقی راگەیاندووە كە پارتی سەلماندوویەتی چاكترین بەرگریكاری یەك پارچەیی خاكی عیراقە. لەوكاتەدا كەیەكێتی ئومێدی بەوە هەبووە كە ئەمەریكا ریگە نەدات سەددام حوسەین كوردستان داگیربكاتەوە، (رۆبەرت پیلەترۆ)ی گەورە بەرپرسی ئەمەریكی لەبەردەم لیشنەی پەیوەندییە جیهانییەكانی كۆنگرێسی ئەمەریكادا رایگەیاندووە، كە ئەمەریكا هیچ ئیلتیزامێكی نییە بەوەی كوردەكانی عێراق بپارێزیت‌و نەهێڵیت سەددام نێوچەی ئارام داگیر بكاتەوە، چونكە كوردەكان خۆیان سەددامیان بانگهیشتكردووە، هەر لەرۆشانی دوای سیویەكی ئابدا مەسعود بارزانی بەڕۆشنامەی شەرقولئەوسەتی راگەیاندووە، بۆیە داوای یارمەتی لەعێراق كردووە، چونكە پیلانێك لەدشی شكۆی عیراق‌و مانەوەی پارتی لەئارادابووە، هاوكات محەمەد سەعید سەحافیش بەرۆشنامەی (ئەلعەرەب)ی راگەیاندووە كە هێرشەكەی هەولێر پرۆشەی یەكپارچەیی خاكی عێراقی لەبار بردووە.
 
كەنعان مەكییە لەكتێبی (كۆماری ترس)دا باسلە چەند میللەتێكی رۆشهەڵاتی ناوەڕاستدەكات كەدوای رزگاربوونیان‌و حوكمی خۆبەڕێوەبەری خۆیان دەكەونە ستەم‌و چەوساندنەوەی میللەتەكەیان، ئەو سیویەكی ئابی وەكو گەورەترین پێشێلكاری ناوبردووە، چونكە لەو رۆشەدا مەسعود بارزانی داوای لەسەددام حوسەین كردووە كەهەولێر داگیربكات، ئەو هەولێرەی كەمەڵبەندی پەرلەمانی كوردستان بووەو بەو شێوەیەش ئەزموونی پێنج ساڵەی خود موختاری كوردەكان كۆتایپێهاتووە.
 
مەحمود سەنگاوی كەلە سیویەكی ئابدا یەكێكبووە لەسەركردە سەربازییەكانی یەكێتی، سەبارەت بەسیویەكی ئاب لەبیرەوەرییەكانیدا نووسیوویەتی، پارتی بەهاتنە ناو هەولێرو بەهاوكاری تانك‌و دەزگاسیخوڕییەكانی بەعس مەستبوونەو لەبری ئەوەی بەڕێزەوە بچنە ناوخەڵكەوەو باوەشیان پیابكەن‌و دەستدرێشی نەكەنە سەرماڵ‌و نامووسیان، هێزەكانیان هۆلاكۆ ئاسا كەوتنە وێزەی خەڵكی‌و دامودەزگاكانی حكومەتیان تاڵان كردو بێشەرمانەش بێدەنگبوون لەبەردەم تانكەكانی بەعس‌و گاردی كۆماریدا كەچوونە سەر پەرلەمان‌و داگیریانكرد، دواتریش مەسعود بارزانی لەگەڵ كوڕەكەی دیكتاتۆردا لەو پەرلەمانەدا پێكەوە پیرۆزباییان لەیەكتری دەكرد.

دوای ئەوەی كە هێزەكانی یەكێتی لەبەرانبەر پارتیدا پاشەكشەی بەردەوامدەكەن‌و بەرەو سنوری ئێران دەڕۆن‌و پارتیش بەدوایاندا هێرش دێنی بەرەو سلێمانی، وەك سەنگاوی نووسیوویەتی لە شاناخسێ‌ سەبیحەخانی خێزانی عەلی عەسكەری دەبینن‌و ئەو پێیان دەڵێت ڕۆڵە بۆ ڕاتانكرد، ئەوانیش هیچ وەڵامێكیان نابێت بۆی‌و دواتر ئەو روویان تێدەكات‌و پێیان دەڵێت بەسایی خواوە عەلی عەسكەری نەماوە ئەگینا ئێستا ئەویش وەكو ئێوە ترسنۆك‌و ڕیسوا دەبوو.

بەوتەی مەحمود سەنگاوی سیویەكی ئاب هەردەرهاویشتەیەكی هەبووبێ‌‌و بەهەر پێودانگێك بپێورێ‌، تاوانێكە شایانی لیخۆشبوون نییە.     





كوا خوێنی شەهید قەڵەم سۆرانی مامە حەمە؟
منبەج ، بۆچی گرنگە؟!
سەلاحەدین بەهادین دەگەڕێتەوە
موحافیزكاران و ریفۆرمخوازان لە هەڵبژاردنەكانی ئێراندا
غرووری پارتی دەشكێت، یان سیحری گۆڕان بەتاڵ دەبێتەوە؟
ڕۆشنبیرانی ”بەیعە“گەر
دەربارەی بەیاننامەی ٢٢٥٠ ڕۆشنبیرەکە
قیڕەقیڕی عەلمانیەت و دین لە کوردستاندا
دکتۆر قاسملو:
"بیرمەندە شۆڕشگێڕەکە"
لولا داسیلڤا ، سەرۆكی بەرازیل
ئەو سەرۆكەی مێژوو دوبارەی ناكاتەوە
ئەژدیهای قــەرز لەگەردنـی هەرێمی کوردسـتانەوە دەئـاڵـێـــت
زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە