لەبارەی‌ نەیاریی‌و زانین‌و جوانییەوە
PM:10:17---03-12-2015
ئه‌م بابه‌ته 2217 جار خوێنراوه‌ته‌وه‌‌
لڤین: هێمن قەرەداغی

ئایا په‌یوه‌ندی نێوان زانین‌و جوانی چۆنه‌؟ چ جۆره ‌زانینێك خزمه‌ت به‌جوانبینی ده‌كات؟ ئایا زانینی زۆر وامانلێده‌كات جوانتر ژیان ببینین؟ ئایا دەتوانین پەیوەندییەک لەنێوان جوانی‌و نەیاریدا بدۆزینەوە؟ ئایا دەتوانین بەکەرەستەکانی‌ جوانی باس لەناشرینی بکەین؟ چی بزانین باشه‌و چی نه‌زانین خراپه‌؟  

  بەوەڵامی‌ دوا پرسیار دەستپێدەکەم، چی‌ بزانین باشە؟ لە ڕاستیدا هیچ نه‌زانین باشه‌، بەڵام تازە هەمومان زۆر شت دەزانین، له‌پێش زانیندا تۆ كانیاوێكیت هێشتا لیخن نه‌بوه‌، ئاسمانێكی ساماڵیت هێشتا فریوی هه‌ورو بارانی نه‌خواردوه‌، هێلانه‌یه‌كی هێمنیت هێشتا جادوی فڕینی نه‌ناسیوه‌، خانوه‌یه‌كی گڵی ئاسوده‌یت له‌لادێیه‌كی دوره‌ده‌ست كه‌ هێشتا فێری فێڵه‌كانی خۆڕازاندنه‌وه‌ نه‌بوه‌... پێش زانین تۆ خه‌یاڵی منداڵێكیت كه ‌هێشتا فێری گومان نه‌بوه‌و توانای ئه‌وه‌ی هه‌یه ‌به‌چیرۆكه‌كان سه‌رسام بێت، چاوی بێگه‌ردی پاكیزه‌یه‌كیت كه ‌هێشتا خیانه‌ت فێرنه‌بوه‌، ئیره‌یی‌و دڵدزین فێرنه‌بوه‌... به‌ڵام مه‌خابن كه ‌هه‌مومان ده‌زانین، هه‌مومان تامی شیرینی زانینمان كرد، خودا خۆی زانینی دا به‌باوه‌گه‌وره‌مان، هه‌ر له‌سه‌ر هه‌مان زانینیش سزای داین... چیرۆكی زانین چیرۆكێكی ته‌ژییه‌ به‌تراژیدیا، چیرۆكی فه‌زیله‌ت‌و ڕه‌زاله‌تیشه‌، مرۆڤ هه‌ر له‌ڕێی زانینه‌وه‌ ده‌گات به‌دوڕیانه‌كانی جوانی‌و ناشرینی، ده‌گات به‌توله‌ڕێكانی باشه‌و خراپه‌ش... 

باشتر بو كه‌ممان بزانیایه‌، به‌ڵام به‌ناچاری زۆرمان زانی، ده‌ستمان برد بۆ زۆرشت كه‌ پێویست نه‌بو ده‌ستی بۆ ببه‌ین، بۆنی زۆر شتمان كرد كه‌ بۆنی ژیانی لێشێواندین، ڕه‌نگی زۆرمان بینی كه ‌ڕه‌نگی ساده‌ی ژیانی لێ لێڵ كردین... زانین قه‌ده‌رێك بو مرۆڤ به‌سه‌روگوێلاكه‌وه ‌تێیكه‌وت، چه‌مێك بو هه‌ڵدرایه‌ ناوی، چه‌مێك مرۆڤ له‌جێی ئه‌وه‌ی هێمنانه‌ مه‌له‌ی تێدا بكات‌و نه‌خنكێت، كردییه‌ ده‌ریایه‌كی بێ بنی سوێری تینو، ده‌ریایه‌ك تاخۆی بخواته‌وه ‌تینوتر ده‌بێت، تا قوڵبیته‌وه ‌قوڵترو بێ بن ده‌بێت، ده‌ریایه‌ك ئه‌مڕۆ هه‌مو مرۆڤایه‌تی له‌ناویدا په‌رێشان په‌له‌قاژه ‌ده‌كات... ده‌ریایه‌ك گه‌یاندوینی به‌شوێنێك كه ‌تێیدا چیتر زانین هیچ نییه‌، بێ ئه‌رزشه‌، زۆره‌، په‌رش‌وبڵاو و بێ قه‌دره‌، هه‌زاران ده‌نگ‌و هه‌زاران ڕه‌نگی زۆروزه‌به‌نه‌ی بێنرخه‌، سه‌رده‌مێك چیتر زانین تیایدا نه‌ فه‌زیله‌ته‌و نه ‌له‌عنه‌ت، نه‌باشه‌یه‌و نه‌خراپه‌، سه‌رده‌مێك چیتر زانین ئه‌رزشێكی نه‌ماوه‌. پێشتر ئینسان هه‌وڵی ئه‌دا بۆ ئه‌وه‌ی له‌باره‌ی شتێكی دیاریكراوه‌وه ‌بزانێت، ئه‌م زانینه‌ش به‌هاداربو، قوڵ بو، به‌رهه‌مدار بو، خاوه‌نه‌كه‌ی له‌ئاستێكی بیركردنه‌وه‌و تێڕامانه‌وه‌ ده‌برد بۆ ئاستێكی تر، هه‌ندێجار ده‌یكرده ‌خاوه‌نی فه‌زیله‌ت، هه‌ندێجاریش ده‌یخسته‌به‌ر له‌عنه‌ت‌و توڕه‌یی ئه‌وانیتر، زانینه ‌گالیلۆ ده‌خاته‌به‌ر له‌عنه‌ت‌و ده‌یكات به‌زندیق، هه‌ر زانینه‌ غه‌زالی ده‌كاته ‌قوتبی زه‌مانی خۆی، واته ‌پێشتر زانین له‌ناو خۆیدا به‌هایه‌كی هه‌ڵگرتبو، به‌ده‌ستده‌هێنرا، هه‌وڵئه‌درا بۆ ده‌ستخستنی، له‌كاتێكدا هه‌نوكه ‌زانین ڕژاوه‌، وه‌ك دۆی داده‌ به‌هه‌مو لایه‌كدا بڵاوبۆته‌وه‌، به‌ڵكو خراپتر له‌وه ‌وه‌ك بارانێكی بێ هه‌ور له‌هه‌مو شوێنێك ئه‌بارێت، به‌سه‌ر سه‌وزایی‌و دڕك‌و داڵ‌و بیابانیشدا هه‌ر ئه‌بارێت، بوه‌ به‌لافاو و له‌ده‌رگاو په‌نجه‌ره‌و درزی دیواره‌كانیشه‌وه‌ دێته‌ ناومانه‌وه‌، بارانێك چیتر حیكمه‌تی ئاودانی بیرچۆته‌وه‌و ته‌نها بۆ نوقمكردن‌و خنكاندنمان ئه‌بارێت، تۆ پێویستت بێت یان نا ئه‌بێت بزانیت چی له‌دونیادا ده‌گوزه‌رێت، بته‌وێت یان نا ده‌بێت بزانیت ئه‌مڕۆ چه‌ند كه‌س له‌م هه‌ساره‌یه‌دا كوژراوه‌، به‌خۆشی خۆت نییه ‌ئه‌بێت بزانیت به‌په‌تاته‌و وایه‌رێك گڵۆپ ئیشده‌كات كه‌ درۆیه‌، ئه‌بێت بزانیت ئه‌و سیاسیانه‌ی ژیانی تۆو سامانی تۆو خه‌یاڵی تۆیان دزیوه‌، چی له‌به‌رده‌كه‌ن‌و چی ده‌خۆنه‌وه‌و چه‌ند دۆستیان هه‌یه‌، ئه‌بێ بزانیت تازه‌ترین ستایله‌كانی سێلفێ‌و نوێترین جنێوه‌سیاسییه‌كانی ئۆپۆزسیۆن چییه‌، هه‌روه‌ك چۆن گرنگه‌ بزانیت هه‌واڵه‌كان له‌سه‌ر جلی ژێره‌وه‌ی كیم كارداشیان چییه‌، ئه‌كته‌ره‌كان باڵایان چه‌نده‌و له‌گه‌ڵ چەند كه‌سدا خه‌وتون... به‌كورتی تۆ خنكاویت، تۆ بویت به‌ژێر زانینه‌وه‌، ته‌نها گوێچكه‌ت دیاره‌، هه‌ناسه‌بڕكێت پێكه‌وتوه‌، له‌سه‌رده‌مێكدا ده‌ژیت كه ‌زانین حورمه‌تی نه‌ماوه‌، كه ‌زانین نه‌ فه‌زیله‌ته ‌نه ‌تاوان، نه ‌باشه‌یه‌و نه‌ خراپه‌، سه‌رده‌مێك تۆ قودره‌تی ئه‌وه‌ت نه‌ماوه‌ هه‌ڵبژێریت چی ده‌زانیت‌و چی پشتگوێ ده‌خه‌یت. له‌دۆخێكی وادا تۆ هه‌مو شتێكیت خۆت نه‌بێت، پڕیت له‌ژاوه‌ژاو كه ‌هیچی ده‌نگی خۆت نییه‌، بویته ‌ڕه‌نگدانی هه‌زاران ڕه‌نگ كه ‌هیچكامیان خۆت هه‌ڵتنه‌بژاردوه‌، زه‌ردو سور ئه‌چیته‌وه‌و له‌حه‌قیقه‌تیشدا بێڕه‌نگیت، تامی هه‌مو دونیا ده‌ده‌یت‌و بێتامیت، له‌باخێك ده‌چیت چه‌ندین داری به‌رداری تێدابێت‌و خاوه‌نه‌كه‌ی له‌برسا سكئێشه‌ی گرتبێت، چون هه‌موی داری لاستیكن، هه‌موی میوه‌ی باغه‌و بێ ڕۆحن، زانین ئه‌مڕۆ توند ده‌ستی ناوه‌ته‌ بینی جوانی، په‌نجه‌ی گیركردوه ‌له‌ملی خه‌یاڵ، یه‌ك مشت خۆڵی كردۆته‌ چاوته‌وه ‌تا نه‌توانیت ڕوناكی ببینیت، گوێی پڕكردویت له‌هاوار تامۆسیقا نه‌بیستیت، له‌پشته‌مله‌وه ‌سه‌ری گرتویت به‌سه‌ر سه‌دان گوڵی باغه‌دا شۆڕیكردۆته‌وه‌، تانه‌توانیت بۆنی گوڵێكی ڕاسته‌قینه ‌بكه‌یت...جوانیی ئه‌وكات ده‌مرێت كه‌ مرۆڤ نه‌توانێت پۆلێنی زانینه‌كانی خۆی بكات، بێژه‌نگێكی نه‌بێت بۆ بینین‌و بیستن‌و باوه‌ڕه‌كانی خۆی، ئه‌م فۆڕمه ‌نوێیه‌ی زانین له‌دونیای نوێدا كه‌ بێ ئامانج‌و بێ پرسیار دێته ‌ناومانه‌وه‌، سات له‌دوای سات قودره‌تی جوانبینی‌و خه‌یاڵفراوانی‌و ئارامیمان ئه‌دزێت، به‌ره‌و دۆخێكمان ده‌بات چیتر گرنگی به‌وه‌نه‌ده‌ین چی شایه‌نی زانینه‌و چی شایه‌نی فه‌رامۆشكردنه‌، چی مرۆڤدۆستترمان ده‌كات‌و چی دڕنده‌ترمان ده‌كات، چی ده‌مانكاته ‌مه‌سخێكی بێئیراده‌ی به‌رده‌م شاشه‌و نێت‌و تۆڕه‌كۆمه‌ڵایه‌تییه‌كان، چیش وامانلێده‌كات مرۆڤێكی خاوه‌ن دیدگاو خه‌یاڵ‌و ئه‌ندێشه‌بین، كتێب ئه‌كوژێت، تێڕامان‌و بیركردنه‌وه‌ ئه‌خنكێنێت، ته‌نیایی‌و خه‌ڵوه‌تی بیركردنه‌وه‌ قه‌ڵاچۆ پێده‌كات، وامانلێده‌كات هه‌مومان ببینه ‌عه‌مبارێكی گه‌وره‌ی زانینی كورتبڕو ئانی‌و موزه‌یه‌ف... ماڵه‌كانمان بۆته ‌عه‌مباری ئه‌و كتێبانه‌ی زایفۆن له‌ڕۆمانی (سێبه‌ری با) دا به‌عه‌مباری كتێبه‌فه‌رامۆشكراوه‌كان ناویده‌بات، هه‌زاران كتێب كه‌ بێناز ده‌بن، كه ‌له‌لایه‌ن خاوه‌نه‌كانیانه‌وه ‌فه‌رامۆش كراون، له‌كاتێكدا هێمنترین‌و ڕاستگۆترین زانین وا له‌ناو كتێبه‌كاندا نوستوه‌، له‌م دۆخه‌دا ئه‌وه‌ی كۆتایی پێدێت داهێنانه‌، تێڕامانه‌، خه‌یاڵی فانتازیی‌و خودسه‌نته‌رییه‌كی ڕه‌سه‌نه‌، ئیدی شتی قوڵ نامێنێت، هه‌مو شتێك به‌سه‌ر ڕوی ئه‌م لافاوی زانینه‌وه ‌وه‌ك پارچه‌ی كه‌شتییه‌كی تێكشكاو دێت‌و ده‌چێت، ئاسته‌كانی گوتارو بیركردنه‌وه ‌نامێنێت، هه‌موان به‌یه‌ك نه‌فه‌س ساده‌گۆیی ده‌ڵێنه‌وه‌... 

بیركردنه‌وه‌ی جیاوازو ئه‌فراندنی قوڵ‌و گوتاری به‌رز نامێنێت، قسه‌ی ڕۆشنبیره ‌جدییه‌كان وه‌ك قسه‌ی خه‌ڵكی ئاسایی لێدێت، باشترین داهێنان‌و تێڕامان‌و نوسین‌و بیركردنه‌وه‌ی فه‌زای ئێمه ‌ده‌بێته‌ ئه‌وه‌ی كێ سیاسیانه‌تر بنوسێت، كێ ئازایانه‌تر باسی ناشرینیی سه‌رۆك‌و ده‌سه‌ڵاته ‌به‌سه‌رچوه‌كه‌ی بكات، سه‌رۆكێك كه ‌هه‌مومان ئه‌زانین چیتر سه‌رۆك نییه‌، له‌ڕاستیدا ڕۆژێك سه‌رۆك نه‌بوه‌، دۆخێك دێته ‌كایه‌وه ‌په‌یوه‌ندی نێوان زانین‌و جوانی ده‌پچڕێت، په‌یوه‌ندی نێوان زانین‌و داهێنان ونده‌بێت، په‌یوه‌ندی نێوان داهێنان‌و زانین نامێنێت، بیركردنه‌وه‌ به‌مانا قوڵه‌كه‌ی نامێنێت، هه‌موان بیر له‌شتێك ده‌كه‌نه‌وه ‌كه ‌پێشوه‌خت هه‌مو ده‌یزانین، هه‌موان ڕێكده‌كه‌ون له‌سه‌ر ئه‌وه‌ی بیرنه‌كه‌نه‌وه‌، شتانی نوێ‌و ئه‌فراندنی نوێیان نه‌بێت، ڕێكده‌كه‌ون له‌سه‌ر ئه‌وه‌ی جیاوازو قوڵ بیرنه‌كه‌نه‌وه‌، ته‌واو لێره‌دایه‌ كۆجیتۆكه‌ی دیكارت پێچه‌وانه‌ ده‌بێته‌وه‌، ده‌بێت به‌وه‌ی (من بیرناكه‌مه‌وه‌ كه‌واته ‌من هه‌م)، من شتانی جیاوازو دژه‌مێگه‌ل به‌رهه‌مناهێنم كه‌واته‌ من هه‌م، هه‌ر بیركردنه‌وه‌یه‌كیش له‌ده‌ره‌وه‌ی ئه‌م ڕێكه‌وتنه‌ وه‌ك خه‌یاڵی ئه‌ده‌بی‌و سه‌له‌فییه‌تی ڕۆشنبیری‌و شیعرییه‌تی فانتازیی پێناسه ‌ده‌كرێت، ئه‌م گوتاره‌ كه ‌داوا له‌هه‌موان ده‌كات جیاواز نه‌بن، داوا له‌هه‌موان ده‌كات خه‌یاڵی ئه‌ده‌بی‌و بیركردنه‌وه‌ی فیكری‌و تێڕامانی تیۆریی بوه‌ستێنن‌و ته‌نها به‌ناشرینییه‌كانی ده‌سه‌ڵاته‌وه ‌خه‌ریكبن، گوتارێكه ‌بیریچۆته‌وه ‌نه‌یاریی فیكری‌و ئه‌ده‌بی ده‌بێت نه‌یارییه‌كی باڵاتربێت له‌ده‌ركردنی به‌یاننامه‌ی سیاسی، باڵاتربێت له‌وتنه‌وه‌ی كۆمه‌ڵێك شیكاری سیاسیی كه ‌ئیشی ڕۆژنامه‌نوس‌و چاودێره‌ سیاسییه‌كانه‌، له‌بیریچۆته‌وه‌ كه ‌نه‌یاریی له‌ئاسته ‌مه‌عریفییه‌كه‌یدا باڵاتره ‌له‌وتنه‌وه‌ی كۆمه‌ڵێك ڕسته ‌كه ‌منداڵانی سه‌ر شه‌قامیش ده‌یزانن، له‌بیریچۆته‌وه ‌كه‌( جۆرج ئۆرێل) بەڕۆمانێک لەبارەی‌ ئاژەڵانەوە هەمو وڵاتانی‌ ئیشتراکیی سەردەمی‌ خۆی‌ توشی‌ هیستریا کرد، مەزرای‌ ئاژەڵان لەناوەڕۆکدا نەیاریی بو لەئاستە باڵاکەیدا، بەکەرەستەیەکی‌ جوانی‌ وەک ڕۆمان، کەرەستەیەک سەر بەدونیای‌ فانتازیاو خەیاڵ‌و شیعرییەتە، ئه‌مه‌یه ‌نه‌یاریی باڵا، ئه‌مه ‌ئه‌و شته‌یه ‌كه ‌ئه‌ده‌ب‌و تیۆرو تێڕامان به‌رهه‌میده‌هێنێت، زانین‌و داهێنان كه‌ باس له‌ناشرینییه‌كانیش ده‌كەن، له‌ڕێی كه‌ره‌سته‌كانی جوانییه‌وه ‌باسی لێده‌كه‌ن، له‌ڕێی تیۆرو شیعرو ڕۆمانه‌وه‌ ده‌یخه‌نه‌ڕو، تۆ ده‌توانیت به‌شیعرێك كه ‌خۆی كه‌ره‌سته‌یه‌كی جوانییە، باس له‌ناشرینیی بكه‌یت، ده‌توانیت له‌ڕێی ڕۆمانێكه‌وه ‌كه‌ خۆی په‌نجه‌ره‌یه‌كی جوانییه ‌باس له‌ناشرینی سه‌رده‌مێكی ته‌واو بكه‌یت، چ ساده‌ییه ‌كه ‌هه‌مو ده‌لاله‌ته‌كانی نه‌یاریی له‌هه‌ڵوێستی سیاسی‌و به‌یانی سیاسیدا كۆبكه‌یته‌وه‌، پێتوابێت ئه‌وه‌ی نه‌ڵێت سه‌رۆك سوڵتانه‌، خه‌ریكی سه‌له‌فییه‌تی ڕۆشنبیرییه‌؟!! ئه‌وەندەی‌ خەیاڵ‌و ئەندێشەی‌ کارەکتەرێکی‌ وەک (ڕۆبن هود) بەدرێژایی مێژو کاریگەریی هەبوە لەسەر نەیاریی‌‌و بەگژاچونەوەی‌ ستەم، بەیاننامە سیاسییەکان نەیانبوە.... ئه‌وە هێزی خه‌یاڵه‌ كه ‌ده‌توانێت له‌ڕێی زانین‌و جوانییه‌وه ‌قوڵتر نه‌یاربێت، ئاست به‌رزتر نه‌یاریی خۆی ده‌ربڕێت، نه‌یارییه‌ك نه‌مرترو باڵاتر له‌نه‌یاریی سیاسیی ڕوت. 

بێگومان پێویسته ‌ئێمه ‌ڕه‌خنه‌ی سیاسیمان هه‌بێت، پێویسته ‌چاودێری سیاسیی‌و گوتاری سیاسیمان هه‌بێت، به‌ڵام ناكرێت هه‌مو ئاسته‌كانی زانین‌و بیركردنه‌وه‌و ئه‌فراندنی ئێمه ‌له‌ڕه‌خنه‌ی سیاسیدا كورتبكرێته‌وه‌، ناكرێت هه‌مو زانین‌و خه‌یاڵ‌و تێڕامان‌و تێۆرو جوانناسی ئێمه‌ ببێته ‌ئه‌وه‌ی چه‌ند جار به‌پارتی بڵێین خراپ كه ‌هه‌مو ده‌زانین خراپه‌، بڵێین ده‌سه‌ڵاتی كوردی سوڵتانیزمه ‌كه ‌هه‌مومان ده‌زانین له‌وه‌نزمترو شێواوتره ‌پێی بوترێت ده‌سه‌ڵاتێكی سوڵتانیی، مافی ئۆپۆزسێۆن‌و چالاكی سیاسی‌و ڕۆژنامه‌نوسه‌كانه ‌ڕۆژی هه‌زارجار ئه‌م شتانه‌ بڵێنه‌وه‌، شه‌ڕی له‌سه‌ر بكه‌ن، شانامه‌ی له‌سه‌ر بنوسن، مافی خۆیانه‌و ئیشێكی باشیش ده‌كه‌ن، ده‌بێت به‌رده‌وام بیكه‌ن، به‌ڵام ئیشی ڕۆشنبیرێكی پله‌یه‌ك نییه ‌كه ‌بەهه‌مان ڕیتم‌و به‌هه‌مان ئاواز له‌م كۆڕاڵه‌دا هاوار بكات، ئه‌وه‌ش وه‌ك ئه‌و نه‌كات به‌سه‌له‌فی ڕۆشنبیریی ناوزه‌دی بكات، به‌ڵكو ئیشی ئه‌و گواستنه‌وه‌ی ئه‌م نه‌یاریه‌یه ‌بۆ ئاستێكی باڵاتر، بۆ ناو تیۆرو لێكۆڵینه‌وه‌و ئه‌ده‌ب، ده‌نا شتێك نامێنێت به‌ناوی گوتاری قوڵ‌و تیۆری فكریی‌و ده‌قی ئه‌ده‌بیی باڵا، شتێك نامێنێت به‌ناوی جوانیی‌و داهێنان‌و ئه‌فراندن. 

دۆستانی من، ئاوڕێك بده‌نه‌وه ‌ببینن چ خه‌راباتێكه ‌گوزه‌ری ڕۆشنبیری ئێمه‌، كوا گۆڤاره ‌جدییه‌كان له‌سه‌ر ئه‌م خه‌راباته‌ی ناوی نیشتیمانه‌؟ كوا كۆڕو سیمیناره ‌فكرییه‌كان له‌سه‌ر ئه‌و جه‌سته‌یه ‌له‌برین كه ‌ناوی نیشتیمانه‌؟ كوا گفتوگۆ ئه‌ده‌بییه ‌باڵاكان له‌سه‌ر ئه‌و سه‌دان كتێبه‌ی ڕۆژانه‌ بڵاوده‌كرێنه‌وه‌؟ بۆ ده‌ستخستنی وه‌ڵامێك لێره‌دا به‌كورتی ئاماژه‌ به‌تێكه‌ڵبونی سێ ئاستی زانین‌و بیركردنه‌وه‌و گوتار ده‌ده‌م: یه‌كه‌م: ئاستی ڕوكه‌ش. دوه‌م: ئاستی مامناوه‌ند. سێهه‌م: ئاستی قوڵ. ئاستی ڕوكه‌شی بیركردنه‌وه ‌كه ‌هه‌مو مرۆڤێكی ئه‌م كۆمه‌ڵگه‌یه ‌خاوه‌نییه‌تی دێته‌ ئاستی قوڵ‌و له‌وێوه ‌ته‌عبیر له‌خۆی ده‌كات، كه‌سێكی ئاسایی كه‌ ده‌زانێت سه‌رۆك خراپه‌و به‌دیكتاتۆرو سوڵتان ناویده‌بات، دێته‌ ناو گه‌روی ئاستی قوڵی گوتاری ئێمه‌وه‌و ڕۆشنبیره ‌جدییه‌كانی ئه‌م فه‌زایه‌ش والێده‌كات ئه‌م ڕسته ‌خه‌به‌رییه ‌بڵێنه‌وه‌، له‌كاتێكدا ئاستی باڵای زانین پێویسته ‌قوڵتر له‌ڕوی تیۆرو تێڕامان‌و گوتاری مه‌عریفی‌و داهێنانی ئه‌ده‌بییه‌وه ‌ئیش له‌سه‌ر تێپه‌ڕاندنی ئه‌م زانینه ‌ساده‌یه ‌بكات، نه‌ك هه‌مو ئه‌فراندنێكی مه‌عریفی‌و ستاتیكی‌و فانتازیی ئێمه ‌ببێته ‌ئه‌وه‌ی وه‌ك مرۆڤێكی ناڕازیی‌و توڕه‌ كه ‌ته‌نها ده‌توانێت هاواربكات، ئه‌ویش هاواری سیاسی بكات‌و به‌یانی سیاسی ئیمزا بكات، هه‌مو سه‌رمایه‌ی مه‌عریفیی‌و مێژوی ئه‌فراندن‌و خه‌یاڵی داهێنه‌رانه‌ی ببێته ‌ئه‌وه‌ی پێمانبڵێت پارتی حیزبه ‌كوردییه‌كان ده‌سته‌مۆ ده‌كات... 

دۆستی من پارتی ژیانی ده‌سته‌مۆ كردوه‌، خه‌یاڵی من‌و تۆی ده‌سته‌مۆ كردوه‌ كه ‌هه‌مو ئه‌فراندنێكمان ببێت به‌باسكردنی ئه‌و، پارتی ئه‌وه‌ی ده‌وێت له‌مناڵێكی سه‌ر بێشكه‌وه ‌تاپیرترین مرۆڤی ئه‌م كۆمه‌ڵگه‌یه ‌باس له‌و بكات، تۆ بۆ ئه‌وه‌ی زه‌لكاوی پارتی‌و سیاسه‌ت تێپه‌ڕێنیت، ئه‌بێت قودره‌تی ئه‌وه‌ت هه‌بێت فه‌زایه‌كی تر بۆ بیركردنه‌وه‌ی ئینسانی بخوڵقێنیت، فه‌زایه‌ك مرۆڤی ئێمه‌ بێئه‌وه‌ی باسی پارتی یان یه‌كێتی لابكه‌یت، بزانێت مرۆڤبونی ئه‌و مانای چی، ئازادی‌و نه‌یاری ئه‌و وه‌ك مرۆڤ مانای چی، خه‌یاڵ‌و حه‌زو فانتازیاكانی ئه‌و مانای چی، مرۆڤێك عه‌شقی بۆ خۆی‌و بۆ ژیان‌و بۆ جوانیی له‌هه‌مو سیاسه‌ت به‌لاوه‌گه‌وره‌تر بێت، مرۆڤێك قودره‌تی ئه‌وه‌ی هه‌بێت جگه ‌له‌وێنه ‌ناشرینه‌كانی سیاسه‌ت شتێكی تر ببینێت، ده‌نگێكی تر ببیستێت، خه‌یاڵێكی تری هه‌بێت، باسكردن له‌جوانیی مانای فه‌رامۆشكردنی ناشرینییه‌كان نییه‌، به‌ڵكو قوتاربونه ‌له‌دۆخێك كه‌ باسكردن له‌ناشرینییه‌كان خۆی ناشرین بوه‌، ساده‌ بوه‌، بێ خه‌یاڵ‌و بێ تیۆر بوه‌، مرۆڤ ده‌توانێت جوان باس له‌ناشرینیش بكات، شێركۆ له‌ڕێی (ئێستا كچێك نیشتیمانمه‌)ه‌وه ‌هێنده‌ی په‌نجا ساڵی جنێوی سیاسی‌و ساده‌ عەورەتی‌ سیاسەتی‌ کەشفکرد، ڕوتیكرده‌وه‌، شانازییه‌كانی لێسه‌نده‌وه‌، هێند دور توڕیدا كه‌س نه‌یدۆزێته‌وه‌، ئه‌مه‌یه ‌ئاسته‌ باڵاكه‌ی هه‌جوكردنی سیاسه‌ت، ئه‌مه‌یه ‌ئاسته‌ باڵاكه‌ی نه‌یاریی.





زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە