سەلاحەدین بەهادین دەگەڕێتەوە
PM:08:16---23-05-2016
ئه‌م بابه‌ته 10308 جار خوێنراوه‌ته‌وه‌‌
راپۆرتی شیكاری هێمن باقر

1

ئەو پیاوەی كە چوار ساڵ لەمەوبەر دەستبەرداری باڵاترین پۆستی ناو یەكگرتوی ئیسلامی بوو، ئەمڕۆ دەیەوێت بە شێوازێكی جیاواز بگەڕێتەوە.

سەلاحەدین بەهادین، ئەمڕ ناوەكەی ئاستی لۆكاڵیی حیزبەكەی تێپەڕاندووە‌و زیاتر وەك كەسایەتییەكی نیشتیمانیی فراوانتر دەبینرێت.

لەوانەیە بەهادین یەكەم كەسایەتیی سیاسیی ئیسلامی بێت توانیبێتی لەسەر ئاستی كوردستان ئەم سەرمایە رەمزییە بۆخۆی دروستبكات‌و لەسیاسییەكی حیزبیی بەرتەسكەوە بگوازێتەوە بۆ قۆناغی كەسایەتییەكی گشتی.

خۆشەویستیی بەهادین زیاتر بوو لەو كاتەی كە لەكۆنگرەی پێشووی حیزبەكەیدا دەستبەرداری پۆستەكەی بوو، بەخواستی خۆی جێیهێشت بۆ كەسێكی تر.

بەڵام ئاكامەكانی جێهێشتنی ئەو كورسییە لەلایەن سەلاحەدین بەهادینەوە دڵخۆشكەر نەبوون، چونكە ئەوەی دوای ئەو هات نەك نەیتوانی یەكگرتوو بباتە قۆناغێكی باشترەوە، بەڵكو پاشەكشەی گەورەشی پێكرد.

تائێستا كە چوار ساڵ بەسەر ئەزمونی ئەمینداری نوێی ئەو حیزبەدا تێپەڕ دەبێت، بەرێز محەمەد فەرەج نەك نەیتوانی هەیمەنەی خۆی وەك كارەكتەرێكی سیاسیی گرنگ لەناو مەفەلی سیاسیی كوردستاندا بسەلمێنێت، نەیشیتوانیوە لەئاستێكی فراواندا وەك لەناو حیزبەكەی خۆشیدا وەك سەركردەی ژمارە یەك خۆی بسەلمێنێت‌و تەنانەت هەندێك ئامادەنەبوون لەڕووی دەروونییەوە وەك ئەمیندار قبوڵیشی بكەن.

راستە بەڕێز محەمەد فەرەج ئەركەكەی قورس بوو، چونكە سەرەڕای هەلومەرجە سیاسی‌و ئابورییەكانی كوردستان، لەناوخۆی حیزبەكەشیەوە لەژێر فشاری مەرجەعی جیاواز‌و ناوەندی هێزی جیاوازدا بووە، بەتایبەتی ئەو پیاوە دانیشتووەی كە لەگەڕەكی كازیوەی سلێمانییە، زۆر جار مەجلیسەكانی فراوانتر‌و گەرمتر بوون لەمەجلیسی ئەمینداری گشتیی ئێستای ئەو حیزبە.

هەر لەسەرەتاشەوە محەمەد فەرەج ئەم هەستیارییەی نیشانداوە، وەك دەوترێت یەكێك لەهۆكارەكانی نەمانی سەلاحەدین بەهادین لەهەولێر پەیوەندیی بە هەستیاریی زۆری ئەمینداری ئێستاوە هەبووە لەمانەوەی سەلاحەدین بەهادین لەبینای مەكتەبی سیاسیدا.


2
ئێستا لەگەڵ نزیكبوونەوەی كۆنگرەدا، محەمەد فەرەج جارێكی دیكە ئەو دێوەزمەیە هاتووەتەوە بەردەمی كە لێیدەترسا.

ئەو پیاوەی كە چوار ساڵ پێش ئێستا باوەشیكرد بە محەمەد فەرەجدا‌و بەیداخی ئەمینداریی لەگەڵدا گۆڕییەوە، ئێستا هاتووەتەوە پێشەوە‌و داوای بەیداخەكەی دەكاتەوە.

پێدەچێت هێشتا بەڕێز محەمەد فەرەج بەتەواوەتی تینونێتیی لەپۆستەكە نەشكابێت‌و حەز بەوە بكات كە لەچوارچێوەی رێكارە رێپێدراوەكانی حیزبدا جارێكی دیكە خۆی هەڵببژێرێتەوە، بەتایبەتی كە هیچ مادەیەكی پەیڕەەو نییە لەم رووەوە سنورداریبكات.

لەوانەیە خواستی مانەوەی محەمەد فەرەج لەپشتی هەڵكردنی ئەو رەشەبایەوە بێت كە لەماوەی هەفتەیەكدا ناوەوە‌و دەرەوەی یەكگرتووی گرتەوە.

لایەنگرانی مانەوەی بەهادین، لەم ماوەیەدا ئیعلانی ئەوەیان كرد كە ئەو خۆی بۆ پۆستی ئەمیندار دەپاڵێوێتەوە.

هەرچەند ئەو بۆخۆی تا ئێستا هیچی ئاشكرای لەم رووەوە نەوتووە، بەڵام وا دەردەكەوێت هەندێك لەوانەی ئەم گۆمەیان شڵەقاند راسپێررابیتن بۆ ئەم كارە‌و بەبێ‌ پرس نەیانكردبێت، ئەگینا سەلاحەدین بەهادین دەیتوانی ئەم بابەتە بەهێمنی بباتە ناو هۆڵی كۆنگرەوە.

بەڵام وا دەردەكەوێت لەپشتی ئەم كارەوە دوو مەبەست هەبن، یەكەمیان زانینی كاردانەوەی ناوخۆیی یەكگرتووە بەرانبەر بڕیارەكە، دووەمیان فڕێدانی فتیلەیەكی دوكەڵاوییە بۆ نێو ماڵەكەی محەمەد فەرەج، تا كاردانەوەكانی ببینن. 



3
هێشتا دیار نییە ئایا بەڕێز سەلاحەدین بەهادین لەهەموو هەلومەرجێكدا خۆی دەپاڵێوێتەوە بۆ ئەمیندار، یان تەنیا هەڵبژاردەیەكە لەبەردەستیدا.

ئەگەر محەمەد فەرەج سوربێت لەسەر خۆپاڵاوتنەوەی، ئەوە ئەگەری خۆپاڵاوتنی سەلاحەدین بەهادین زیاتر دەبێت، چونكە پێیوایە بەهۆی وەرگرتنی ئەو پۆستەوە لەماوەی چوار ساڵی  رابوردوودا بایی ئەوە نفوزی پەیداكردووە كەبتوانێت ململانێی هەر كاندیدێك بكات كە بیەوێت. لەم حاڵەتەشدا تەنیا سەلاحەدین بەهادینە بتوانێت ركابەری بكات.

بەڕای هەندێك، ئەگەر محەمەد فەرەج بكشێتەوە‌و رایبگەیەنێت كە خۆی كاندیدناكات، ئەوە پێدەچێت سەلاحەدین بەهادینیش بكشێتەوە‌و یەكێكی تر پێشنیار بكات بۆ ئەو پۆستە، كە جێگای رەزامەندیی ئەو بێت.

لەهەر هەلومەرجێكدا بێت، ئەوەی راستیی حاشاهەڵنەگرە، ئەوەیە كە ئەگەر سەلاحەدین بەهادین لەماڵەوە دابنیشێت‌و تەنیا تەزبیحەكەی دەستی بنێرێت بۆ كۆنگرەی یەكگرتوو، ئەوە دەرچوونی وەك ئەمیندار مسۆگەرە، هەروەك چۆن ئەگەر كاك مەسعودیش تەنیا جامانەكەی بنێرێت بۆ كۆنگرەی پارتی‌و مام جەلال گۆچانەكەی بنێرێت بۆ كۆنگرەی یەكێتی‌و نەوشیروانیش پاكەتە جگەرەكەی بنێرێت بۆ كۆنگرەی گۆڕان‌و كاكە حەمەش پشتێنەكەی بنێرێت بۆ كۆنگرەی حیزبەكەی، دەرچوونیان مسۆگەرە.

بەڵام ئەم حاڵەتە ئەگەر بەدیوێكدا نیشانەی هێز بێت، ئەوە بەدیوەكەی دیكەیدا نیشانەی لاوازییە‌و گوزارشتە لەناكامڵیی فیكری سیاسی لەناو حیزبی كوردیدا.

هەروەها ئەو ستافەی ئێستا مەكتەبی سیاسیی یەكگرتوو بەڕێوەدەبەن، وەك یەك تیم سەیری ئەزمونی سیاسیی چوار ساڵەی خۆیان‌و محەمەد فەرەج دەكەن‌و پێدەچێت مورتاحتربن لەتەك ئەودا تا ئەمینداری پێشوو، كە هەیمەنەی تەواوی هەبوو بەسەر حیزبدا. بۆیە هەرچەندە دەرچوونی مسۆگەربێت، بەڵام لەوانەیە رووبەڕووی هەندێك لەو سەركردانە ببێتەوە‌و بكەوێتە بەر نەشتەری هەڵسەنگاندنیان‌و سیرە لێگرتنیان، كە هەرگیز سەلاحەدین بەهادین حەزی بەوە نییە‌و حەزدەكات وەك مورشیدێكی رۆحی‌و سیاسی بگەڕێتەوە، كە كەس توانای ئەوەی نەبێت پەنجەی بۆ درێژبكات.

ئەمەش لەوانەیە قورس بێت لەسەر شانی سەلاحەدین بەهادین كە گروپێكی ناو مەكتەبی سیاسیی لێ‌ راستببێتەوە‌و دەنگی پێ‌نەدەن.

بەتایبەتی كە ئەو ئێستا لەساتێكدایە كە هیچ كەس لەناو یەكگرتوو خۆی لەقەرەی قسەلەسەركردنی نادات‌و جۆرێك لەپیرۆزی‌و كاریزمای سیاسیی بۆ دروستبووە.
بەنمونە؛ چەندێك پێت خۆشە رەخنە لەهەر سەركردەیەكی یەكگرتوو بگرە بە ئەمینداریشەوە، ئاسایی وەردەگیرێت، بەڵام كە قسە چووە سەر سەلاحەدین بەهادین، بابەتەكە دەگۆڕێت‌و یەكگرتووەكان هەمویان پێكەوە وەڵامدەدەنەوە. لەروانگەی سۆسیۆلۆجییەوە ئەمە لەچوارچێوەی (هابیتۆس)ی تایبەت بە گروپێكی دیاریكراو لێكدەدرێتەوە، كە تاكەكانی ئەو گروپە وەك سیستمێكی ئافرێنراوی كۆمەڵایەتی، كە ئاراستەی بیركردنەوە‌و رەفتاردەكات. 

سەلاحەدین بەهادین دەبیتَ ئەو راستییە بزانێت كە لەوانەیە گەڕاندنەوە بۆ نێو كاری سیاسەت‌و هەڵبەز‌و دابەزە سیاسییەكان‌و بەركەوتنی رۆژانە، یەكەم شت لێدان دەبێت لەم كەسێتییە كاریزمایەی‌و كردنەوەیەتی بە مرۆڤێكی ئاسایی ناو روداوەكان.

هەروەها دەبێت ئەوەشی لەبەرچاوبێت كە رەنگدانەوەی گەڕانەوەكەی چەند بە ئیجابی بەسەر یەكگرتوودا بشكێتەوە، ئەوەندە رەسیدی سیاسیی زیاددەكات، بەڵام مانەوەی یەكگرتوو لەم دۆخە یان پاشەكشێكردنی بەهەر هۆكارێك بێت، كاریگەریی نەرێنی لەسەر ئەو سەرمایە رەمزییە دروستدەكات كە ساڵانێكە كەڵەكەیكردووە.

بەتایبەتی كە هەرێمی كوردستان بە قۆناغێكی سیاسیی بە بنبەستگەیشتوودا تێپەڕدەبێت‌و كایەی سیاسی لەبەردەم هێزی گەورەتر لەیەكگرتوودا داخراوە‌و بواری جوڵەی لێبڕاوە.

بۆیە سەلاحەدین بەر لەوەی كە بیر لەگەڕانەوە بۆ نێو كایەی سیاسی‌و وەرگرتنی پۆستی ئەمینداری یەكگرتوو بكاتەوە، دەبێت لەبری جارێك سەد جار بیربكاتەوە، كە دەتوانێت چی بكات‌و بارودۆخەكەش رێگەی چیی پێدەدات، هەروەها دەبێت چاو لەو راستییە نەپۆشرێت كە لەناو یەكگرتووشدا وەك هەر هێزێكی دیكە گروپی بەرژەوەندیی دروستبووە‌و هەندێك لەناو ئەو حیزبەدا لەسەر بنەمای بەرژەوەندییەكانیان جوڵەی سیاسی دەكەن‌و بەئاسانی دەستبەرداری نابن.

سەرەڕای هەموو ئەمانەش، داواكاری بۆ گەڕانەوەی سەلاحەدین بەهادین لەناو یەكگرتوو داواكارییەكی بەهێزە‌و هەندێك پێیانوایە بە گەڕانەوەی ئەو، سەردەمی زێڕینی یەكگرتوو دەگەڕێتەوە بۆ یەكگرتوو.

تەنانەت لەسەر ئاستی گشتیی خەڵك لەناو میدیا‌و رۆشنبیران‌و خەڵكیدا، بەتایبەت لەدەڤەری سلێمانی، كە لەژێر گوتاری سیاسیی بزوتنەوەی گۆڕاندایە، حەز بە هاتنە پێشەوەی سەلاحەدین بەهادین دەكەن نەك مانەوەی محەمەد فەرەج.

لەئێستادا لەدهۆكیش هەمان خواست هەیە‌و وەك دەوترێت دهۆكییەكان یەكەم كەس بوون كە ئەم داوایەیان كردووە.


4
لەدەرەوەی سەلاحەدین بەهادین‌و محمەد فەرەج، چەند كاندیدێكی دیكە هەن، كە ئەگەری خۆپاڵاوتنیان هەیە، لەوانە هادی عەلی‌و محەمەد رەئوف‌و د.محەمەد ئەحمەد.

محەمەد رەئوف دەمێكە خۆی بە شایستەی ئەمیندار دەزانێت، بەڵام هێشتا نەیتوانیوە ئەو قەناعەتە لای ئەندامانی حیزبەكەی دروستبكات كە شایستەی ئەو پۆستەیە.

لەوانەیە لەم كۆنگرەیەدا جارێكی دیكە ركابەرە سەرسەختەكە دەربكەوێتەوە، لەناو یەكگرتوودا خەڵكانێك هەن كە داوای خۆكاندیدكردنیان لێكردووە، بەڵام پێناچێت بە پشتی خاڵی بێتە كۆنگرەوە.
هەرچەندە ئێستا بارودۆخەكە بۆ ئەو زۆر گۆڕاوە، چونكە لەباشترین حاڵەتی پەیوەندییەكانیدایە لەگەڵ سەڵاحەدین بەهادین‌و لەهەموو كات زیاتر نزیكن لەبۆچوونە سیاسی‌و فیكرییەكانیانی یەكتری. 

ئەگەر لەكۆنگرەی پێشوودا خاڵی سەرنەكەوتنی بریتیبووبێت لەركابەریی سەلاحەدین بەهادین، ئەوە لەوانەیە لەم كۆنگرەیەدا نزیكییەكەی‌و هاوڕابوونیان ببێتە خاڵی بەهێز بۆی.

لەوانەیە لەنێوان هادی عەلی‌و سەلاحەدین بەهادیندا یەكێكیان بێنە پێشەوە، بەجۆرێك ئەگەر سەلاحەدین بەهادین خۆی كاندیدبكات، ئەوە هادی عەلی نایەتە پێشەوە، بەڵام ئەگەر ئەو خۆی كاندیدنەكرد، چانسی خۆپاڵاوتنی هادی بەهێزەو ئەگەریش هەیە ئەنجامی هەبێت، بەتایبەت لەبەر ئەوەی ئەوانەی جاری پێشوو لەبەر سەلاحەدین بەهادین دەنگیان پێنەدا، ئەم جارە بەهۆی نەمانی ڤێتۆی ئەو بەدڵێكی ئاسودەوە دەتوانن دەنگی پێبدەن.

د.محەمەد ئەحمەد، هەرچەندە تائێستا هیچی نەدركاندووە لەبارەی خۆپاڵاوتنی، بەڵام وا پێدەچێت حەز بەوە بكات چانسی خۆی تاقیبكاتەوە‌و وەك هەڵسەنگاندنێكیش سەیریبكات بۆ كاروانی سیاسیی خۆی.

هەرچی محەمەد رەئوفە، بە بێ‌ دوودڵی یەكێك دەبێت لەكاندیدەكان‌و لەسەرجەم ناوچەكانی كوردستان ژمارەیەك كەس هەن كە پشتگیریی دەكەن، بەڵام سیاسەتی نەرمی ئەو بەرانبەر پارتی نیشانەی پرسیاری لەسەر دروستكردووەو هەندێك بە بەردەوام ئەو تێبینییە دەدەنەوە بە روویدا، هەرچەندە خۆی بە پڕوپاگەندەی دادەنێت.

بەڵام پێدەچێت لەكۆنگرەی ئەم جارەدا یەكگرتووەكان هەڵەكانی پێشوو دووبارەنەكەنەوە‌و كارێك نەكەن كە جیاوازیی دەڤەر‌و ئاراستەكان زەقبكەنەوە، بەوەی هەر لەسەرەتاوە لەسەر كاندیدێكی تەوافوقی رێكبكەون‌و بەشێوەیەكی گشتی دەنگ بەو كاندیدە بدەن. چونكە لەدەرەوەی ئەمە هەر هەنگاوێكی دیكە، درزی ناو ریزەكانی یەكگرتوو زیاتر قووڵدەكاتەوە.








كوا خوێنی شەهید قەڵەم سۆرانی مامە حەمە؟
منبەج ، بۆچی گرنگە؟!
سەلاحەدین بەهادین دەگەڕێتەوە
موحافیزكاران و ریفۆرمخوازان لە هەڵبژاردنەكانی ئێراندا
غرووری پارتی دەشكێت، یان سیحری گۆڕان بەتاڵ دەبێتەوە؟
ڕۆشنبیرانی ”بەیعە“گەر
دەربارەی بەیاننامەی ٢٢٥٠ ڕۆشنبیرەکە
قیڕەقیڕی عەلمانیەت و دین لە کوردستاندا
دکتۆر قاسملو:
"بیرمەندە شۆڕشگێڕەکە"
لولا داسیلڤا ، سەرۆكی بەرازیل
ئەو سەرۆكەی مێژوو دوبارەی ناكاتەوە
ئەژدیهای قــەرز لەگەردنـی هەرێمی کوردسـتانەوە دەئـاڵـێـــت

زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە