كێ بارزانیی فریودا؟
ئەحمەد میرە
PM:06:56---14-10-2017
ئه‌م بابه‌ته 28708 جار خوێنراوه‌ته‌وه‌‌

لەمێژووی هاوچەرخی كورد لەباشوری كوردستاندا بارزانیی چەند جارێك بەچەند شێوەیەكی جیاواز دەسەڵاتی حكومەتی ناوەندیی هێناوەتەوە بۆ كوردستان.

یەكەم جار بە هۆی كاڵفامیی سیاسیی‌و لێكدانەوەی هەڵەو نەخوێندنەوەی بارودۆخی هەرێمیی‌و نێودەوڵەتییەوە لەساڵی 1975دا بارزانیی تێكڕای دەستكەوت‌و ئامانجەكانی شۆڕشی بە ئاودادا و وەك دەگوترێت لەسەر سینییەكی زێڕین چواردە ساڵ قوربانیدان‌و خەباتكردنی خەڵكی كوردستانی پێشكەش بە دەسەڵاتدارانی عێراق كردەوەو بەئاشكرا گوتی "كاری من تەمام شود".

دوهەم جار لە پێناو پاراستنی بەرژەوەندییەكانی خۆی‌و بنەماڵەكەیداو لەترسی لەناوچوون لە 31ی ئابی 1996دا بەناوی كوردایەتییەوە دەسەڵاتی حكومەتی بەعسی گێڕایەوە بۆ هەولێری پایتەخت ‌و دواتریش ئەم خیانەتە گەورەیەی ناونا كوردایەتیی‌و هەنگاوی سەرەكیی بۆ پاراستنی ئەزموونی حوكمڕانیی كورد لە هەرێمی كوردستاندا.

چەندین جاری تر لە وتارەكانماندا ئاماژەمان بۆ ئەوە كردووە، كە ئەو كارەی بارزانیی لە 25ی ئەیلولی 2017دا ئەنجامیدەدات، (دواجاریش هەر لەو ڕۆژەدا كارەكەی بە ویستی خۆی ئەنجامدا.) هیچ نیە جگە لە ئاشبەتاڵێكی ترو دەبێتە هۆی هێنانەوەی جارێكی تری دەسەڵاتی حكومەتی ناوەندیی بۆ هەرێمی كوردستان، بە بۆچوونی ئێمە دیارترین ئەو هۆكارانەی، كە لە پشت ئەم كارەی بارزانییەوە بوون بریتین لە:

1- گرێی دەرونیی كەسی بارزانیی، كە هەمیشە پێیوایە ئەو پیاوی یەكەم ‌و مەزنی كوردایەتییەو هیچ كەسێكی تر لەو دڵسۆزتر نییە، بەپێچەوانەیشەوە هەموو ڕەفتارو كردەوەو جوڵەكانی دژی پرۆسەی بەدەوڵەتبوونی كوردن، هەر كاتێك دەرفەتێكی لەبار بۆ كورد دروستبووبێت، بارزانیی بەهۆی ئەم گرێ دەروونییەی خۆیەوە تێكیداوە ڕیسەكەی لەهەموومان كردووەتەوە بە خوریی.

2- گوێنەگرتن لە كەسانی دڵسۆزو شیكەرەوە سیاسییە ناوخۆیی‌و دەرەكییەكان، كە بەشێوەیەكی بەردەوام لەسەر بنەمای لۆژیك ‌و هەڵسەنگاندنی زانستییانە ئەوەیان دەخستەڕوو، كە ئەنجامدانی ڕیفراندۆم لەكاتێكی وەك 25ی ئەیلولدا، جگە لە مەترسیی گەورە بۆ سەر هەرێمی كوردستان، نابێتە بنەما بۆ دروستبوونی دەوڵەتی كوردیی.

3- بارزانیی وەك نەریتی خرابی هەمیشەیی خۆی، تەنها گوێ لەو ڕاوێژكارە حیزبییانە دەگرێت، كە بەشێوەیەكی كوێرانە ستایشی كارەكانی دەكەن ‌و هەرگیز نە دێڕێكی ڕاستی پێدەڵێن ‌و نە دەیشوێرن پێیبڵێن پێت خوار داناوە.

4- پشتبەستن بە ڕاوێژی ڕاوێژكارە نەوتخۆرەكانی هەرێم؛ ئەو ڕاوێژكارانەی بە پارەی نەوت مڕكراون ‌و لەوڵاتەكەی خۆیاندا یان بێكارن، یاخود خانەنشینكراوی بێدەسەڵاتن، ماوەی چەند ساڵێكە ئەم ڕاوێژكارە نەوتخۆرانە، ڕاوێژی خراب بۆ بارزانیی دەكەن ‌و دەیخەنە هەڵەی جۆراوجۆرەوە، لەوانە؛ پرسی داخستنی پەرلەمان ‌و بڕینی موچەی خەڵك ‌و فرۆشتنی سەربەخۆیانەی نەوت ‌و ئەنجامدانی ڕیفراندۆم، بەڵام هیچ كەسێك هێندەی ئەو ڕاوێژكارانە كەسایەتیی بارزانیی ناناسێت، چونكە ئەوان باش كەسایەتییان خوێندووەتەوە و لەوە تێدەگەن بۆ ئەوەی پارەیەكی مۆڵ بەدەستبهێنن، تەنها دوو دێڕ ستایشكردنی بارزانیی بەسە.

5- لەلایەكی ترەوە سادەیی‌و زوو خرۆشانی هەستی نەتەوەیی لای خەڵكی ئاسایی یارمەتیدەرێكی سەرەكیی بوو، بۆ ئەوەی بارزانیی بكەوێتە هەڵە گەورەكەوە، ئەم خەڵكە بە جۆرێكی هەڵە لە ڕیفراندۆم تێگەیشتبوون، تەنانەت لە سەرە زلەكانی پشت ڕیفراندۆم زیاتر بەشانوباڵی دەوڵەتی كوردییاندا هەڵدەداو بارزانییش بە شێوەیەكی لێزانانە ئەو هەستە سادەیەی خەڵكیان قۆستەوە بۆ ئەنجامدانی پرۆژە كەسییەكەی خۆیان.

6- چەند جارێكی تر گوتوومانە؛ پێویستە پاش 25ی ئەیلوول بارزانیی وەڵامی خەڵكی كوردستان بداتەوە، بەوەی دەنگی بەڵێی چیی لێكردو پرۆژەی دەوڵەتە كوردییەكەی گەیاندووەتە كوێ؟ لەبەرئەوەی ئەم كارەیان دەرفەتی خۆڕزگاركردنی لەبەردەمدا نییە، لانی كەم دەبێت باجی ئەو فێڵ‌و درۆ گەورەیە بدات، كە لە خەڵكی كوردستانی كردووە. خەڵكی كوردستانیش مافی ئەوەی هەیە دوای ئەوەی ڕیفراندۆم كراو بە پێوانەی بارزانیی ئەنجامەكەیشی بەڵێ بوو، لێیبپرسن؛ كەی دەوڵەتی كوردیی ڕادەگەیەنیت‌و كۆتایی بە یارییە ترسناكەكە دەهێنیت؟ ئەگەر ئەو كارە ئەنجامنەدات، لەبەردەم دوو ئەگەری تردایە؛ یان دەبێت ئەنجامی ڕیفراندۆم هەڵبوەشێنێتەوە، یاخود دەبێت لەماوەی داهاتوودا نەك خاڵە سنورییەكان ‌و فڕۆكەخانەكان، بەڵكو بەڕێوەبەری قوتابخانەكانیش ڕادەستی برا عەرەبە چاوڕەشەكانمان بكەین..






زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە