ئاوەدانی كەرتی تایبەت و وێرانی كەرتی حوكومی
نەبەز گۆران
PM:04:11---04-01-2017
ئه‌م بابه‌ته 618 جار خوێنراوه‌ته‌وه‌‌

شەوان كاتێك لە بەرزاییەكەوە سەیری دیمەنی شارەكان دەكەیت، بێ‌ هیچ خۆ ماندوكردنێك بەڕوناكی شوێنەكان، بە شێوازی رێگاو بانەكان، بە نەخشەی ئەندازییاری ناوچەكان، بۆت روندەبێتەوە كامە كەرتی تایبەتە و، كامە كەرتی حوكومییە. ئەم جیاكارییە بووەتە هۆی ئەوەی زۆرێك لە هاوڵاتییان ساڵ بەساڵ متمانەیان بە كەرتی حوكومی نامێنێت. تەواوی ئەو نارەزایەتییانەش رۆژانە دەرگیریی دەبین، نارەزاییەتی هاوڵاتییانە لە خراپی خزمەتگوزارییە سەرەتاییەكانی كەرتی حوكومی.

پرسیارەكان ئەمانەن، بۆچی هەتا زیاتر ساڵەكان تێپەڕدەبن زیاتر كەرتی حوكومی بەرەو تێكشكان دەچێت؟ ئەو هەژموونی كاپیتاڵیزمەی روویكردوەتە هەرێمەكەمان، هەژموونێكە كەرتی حوكومی دادەرزێنێت؟ یان ئەو عەقڵەی لەناو كەرتی حوكومییە عەقڵێكی بێباكە و، تەنها بیر لە خۆی دەكاتەوە و ئەویتری هاوڵاتی لاگرنگ نییە؟ لە پەنای ئەوەدا هۆی چییە كەرتی تایبەت بەرەو گەشەكردنی زیاتر دەچێت و، كەرتی حوكومیش بەرەو خراپتر بوون؟ حوكومەت چیدەكات بۆئەوەی متمانە بەدەست بهێنێتەوە؟ ئەم كایبنەیەو كابینەكانی پێشوتریش بۆ نەیانتوانی تەنانەت نیگەرانییەكانی خەڵك لەسەر خزمەتگوزارییە سەرەتاییەكان كەم بكەنەوە؟ ئەی بۆ كەرتی تایبەت(كە رووبەرێكی گەورەیە لەم هەرێمە) ئەو كێشانەی نییە؟

ئەمانەو دەیانپرسیاری دیكە دێنە ناو ئەندێشەمانەوە بۆ ئەوەی بەراوردێكی سەرتایی بكەین. بەراوردێك تەنها لە چوارچێوەی خزمەتگوزارییە سەرەتاییەكاندا. گومانی تێدا نییە كەرتی تایبەت (هەڵبەتە هەمووی نا، چونكە ئەویش كۆمەڵێكیان پرۆژەكانیان لەگەڵ كەرتی حوكومی جیاوازیی نییە.) سەركەوتووە بەسەر كەرتی حوكومی، لەكاتێكدا ئەوەی ئاراستەی ئابووریی، بازار، سیاسەتی بەرێوەبردن دەكات، حوكومەتە نەك كەرتی تایبەت. شكستەكانی حوكومەت لەبەردەم خزمەتگوزارییەكاندا بەردەوام جێگای گومانە، گومانێك كە هێشتا نەیتوانییوە بە جەسارەتەوە دەست بخاتە سەر شكستەكانی خۆی.

ئێمە چەندین پرۆژەی گەورە و بچوكی كەرتی تاییەتمان هەیە. هەریەك لەم پرۆژانە هەم وەك یەكەی نیشتەجێ‌ بوون، هەم وەك پرۆژەی گەشتوگوزار و، پرۆژەی بەرهەم هێنان، لە شوێنی خۆیاندا لانیكەم خزمەتگوزارییە سەرەتاییەكان دابین دەكەن و، ئەركی هاوڵاتییان قورس ناكەن. ئەم پرۆژانە چ لە رێگاو بان، چ لە شێوەی بیناسازی، چ لە ئاو كارەبا و... هتد، ناهێڵن كێشەیان بێتە ڕێ. لەبەرامبەر ئەو كەرتە تایبەتە كەرتی حوكومی هەیە، كە جیهانێكی تەواو جیاوازاو خراپی دروست كردووە.
ئێستا دەتوانرێت تەنانەت لەرووی سایكۆلۆژییشەوە ئەو هاوڵاتییەی لە كەرتی تایبەتدا ژیان دەگوزەرێنێت، لەگەڵ ئەو هاوڵاتییەی لەناو كەرتی حوكومیدا دەیگوزەرێنێت، جیابكەیتەوە. كاتێكیش ئەو تێكشكانە گەورەیەی كەرتی حوكومی دەبینیت ئەو دیدەت بۆ دروست دەبێت، ئاستی بەرێوەبردن لە حوكومەتدا گەیشتووەتە خاڵێك بەتەواوەتی تێشكانی پێوە دیارە. ئەشێت لای حوكومەت ئەم تێكشكانە لەبەردەم كەرتی تایبەتدا شۆكێك نەبێت، لەكاتێكدا لەبەردەم دیدی هاوڵاتییدا نەك شۆك، بەڵكو زشتە.

بۆچی حوكومەت ناتوانێت هەمان ئەو كارەبكات كە كەرتی تایبەت دەیكات؟ هەرێمەكەی ئێمە هەرێمێكی گەورەنییە، گەر پێنج ملیۆن هاوڵاتیشی تێیدا بژین، دوو هێندەی میوانی شەوانی شارێكی وەك (تاران و ئەستەنبوڵ)ی تێدا دەژی. لەناو ئەم هەرێمە بچوكەدا بەم دانیشتوانە كەمەیەوە، ئەو هەموو كێشەیە  جێگای سەر سوڕمانە.

ئەم گومان و سەر سوڕمانانە مانای ئەوەنییە، كە دەبێت بەتەواوەتی كەرتی حوكومی تێك بشكێت و كەرتی تایبەت شوێنی بگرێتەوە، بەڵكو مانای ئەوەیە حوكومەت گەیشتوەتە وێستگەیەك ئیدی پێویستی بەوەیە سەر لەنوێ خۆی چاك بكاتەوە. گەرتوانای خۆچاككردنی هەیە (بەدەستێكی پاكەوە) پێویستی بە وەستان نییە، گەر تواناشی نییە باشترە بەروونی شكستەكەی خۆی رابگەیەنێت، ناكرێت هەموو ساڵێك هاوڵاتییان بە نیگەرانییەوە داوای خزمەتگوزاری سەرەتایی بكەن، ناشكرێت حوكومەتیش بیانوبهێنێتەوە بۆ شكستەكانی، چونكە زۆر روونە كە جیاوازییەكی زۆر هەیە لەنێوان ئەو دوو كەرتەدا. تەنانەت جیاوازییەكە هێندە روونە بە دوو جۆر ژیان سەیردەكرێت و، ژیانی ناو كەرتی حوكومی جۆرێكە لە سزادانێكی بەردەوام تا ئاستی وێرانكردنی هاوڵاتی.






كێ‌ دەبێتە میراتگری فیكری نەوشیروان مستەفا؟!
كتێبەكەی (مام جەلال) و هاواری دۆنكیشۆتەكان
نیگەرانی بەبێ‌ جوڵە!
پارتی و یەكێتی، دوو شەریك لە ناشیرینكردندا
زیندوكردنەوەی رۆحە شۆرشگێرەكە
میلیشیا نوێیەكەی(محەمەدی حاجی مەحمود)
چۆن دەبی بە سەرمایەداری سێبەری حیزب؟!
سەرمایەدارانی سێبەری حیزب
خودایا: ئەو خۆشییە لەو پانێلچیانە تێك نەدەی!
ئەو شەرەی چاوەرواندەكرا رووبدات!
پەرتەوازەیی وەك خەمێكی گەورە
هەمیشە (كۆسرەت رەسوڵ) براوەیە
جەنابی كاك (قوباد)ئەمە نان و پیاز نییە، نەوتە نەوت!
چاوەڕوانیكردنی ئەویتر
نەوەی پۆست بۆ نیگەرانن؟!
1234567
زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە