سەركەوتن بە دۆڕاوی
لەتیف فاتیح فەرەج
PM:05:12---20-05-2018
ئه‌م بابه‌ته 1398 جار خوێنراوه‌ته‌وه‌‌

 بڕواناكەم هیچ كەسێك  گومانی بۆ ئەو گۆڕانكاریە لە دەنگدانا  چووبێت  ، راستە كەمترین خەڵك لە عێراق و كوردستان و كەركوك بە شداریان كرد ، بەڵام ئەو كەمترین خەڵكەبریتی بوون ،لە دەنگانی ناڕازی و توڕەو ئۆپۆزسیۆن ، واتە زۆرترینی ئەو كەسانەی لە دهۆك ، سلێمانی و هەولێرو كەركوك و پارێزگاكانی عێراق بە شداریان كرد خەڵكە ناڕازیەكە بوون ، بە نمونە دەرچوونی لیستەكەی موقتەدا سەدر نیشانەی ئەوەیە ، ئەگەر چی هەمان یاری ناشرین دەشێ‌ لە بەغداو ناوەڕاست و باشوری عێراقیش كرابێت .
شكست لە حوكمڕانی ، دزینی نەوت ، باركردنی وڵات لە قەرز، بە میلیشیاكردنی پێشمەرگە ، راكردن لە بەردەم حەشدو حەسەن پلایس ، یەكتر بە خائین نیشاندان ، بەوە چارەسەر ناكرێت و راست نابێتەوە ئاوەزی ئامێرەكان تێكبدرێت ، یان هەر شتێكی لەو بابەتە ، هیچ یەك لە عەیب و عارەكان چارەسەر نەكراون ، ریفراندۆم بە مانای شكست شكستی خوارد ، 16ی ئۆكتۆبەر بەرهەمی ئەو شكستە جیرۆكیە بوو ، ریفراندۆم بۆ شاردنەوەی ئەو هەموو ناجۆری و شكستە هیچی لێسەوز نەبوو جگە لە بەخائین نیشاندانی یەكتر ، بارزانی لە بری ئەوەی كورد لە دۆزەخی 100 ساڵ سایكس بیكۆ دەركات  دەیان ساڵ گەڕاندیە دواوە ، ئێستا لە بری "بای بای سایكس بیكۆ " باسی عێراقی ئایدنە دەكرێت و بارزانی لە پەیامەكەیدا گلەیی لە دەسەڵاتی عێراقی دەكات كە ناچاری ئەوەیانكردن پەنا بۆ ریفراندۆم بەرن ، جگە لەوەش پەیوەندی بە هەموو براوە شیعەكانەوە كردوە بە تەلە فون ، هۆشیار زێباریش تویتی عێراقیانە دەنووسێت ، ئەملاهەر باس ناكرێت .
ئەم سەركەوتنە دابەشكاریە پڕ لە فرت و فێڵە نابێتە فریاد ڕەس و نابێتە هۆی سڕینەوەی دۆڕانەكانی پێشتر ، ئەمە وەك ئەوە وایە تیپێك لە گێمی یەكەمدا دەیان گۆڵی خواردبێت ، كەچی بە گۆڵێكی تایمی دووەم خۆی بە براوە بزانێ‌ و بایدات ، جارێ‌ دۆڕانەكە هەر ئەوە نیە كە گۆڵەكانی تایمی یەكەم لە بیر خەڵك دەبەیتەوە ، دۆڕانە گەورەكە ئەوەیە نیشتمانتان لەت و پەت كرد، تا ئەو رادەیەی پارتی بۆ بردنەوەی هەولێر سلێمانی و كەركوك و هەڵەبجەی بە تەواوی دۆڕاند ، هەر زوو كەركوكی دۆڕاند و ئەمجارەش هەڵەبجەو سلێمانی ، ئەوە كادیرە راستیەكانی پارتی لە لقەكانی ئەم سنورە زۆر باش دركی پێدەكەن ، هەڵبەت یەكێتیش لە پێناوی سلێمانیدا هەولێرو دهۆكی دۆڕاند ، ئەگەر لە هەولێر نوزەیەكی تیا مابێت ئەوە دهۆكەكەی بریام عەزۆو حوسێن بابە شێخ و شەهیدەكانی بۆ هەتا هەتا لە دەست دا .
 بەم هەڵبژاردنە یەكێتی و پارتی سنوری دێگەڵەیان زۆر تۆختر كردەوە ئێوە سەیری ئەنجامەكان كەن ، نەپارتیەكانی سلێمانی و هەڵەبجەش بەو ژمارانە رازین ، نەیەكێتیەكانی هەولێرو دهۆك ، بەڵام دیارە ئەم شكستە ناشرینەش كە كورسی پێزیاد كراوە دەچێتە سەر شكستەكانی رابردوو.گۆڵەكەی تایمی دووەمیش لە بری ئەوەی لە لایەنەكانی دیكەی بكەن كە یەكپارچەی هەرێمی كوردستانیان پاراست لە خۆیانیان كرد ، ئەمە دواتر بە ڕوونی دەردەكەوێت ، هەڵبەت بە هەڵە یان بە هەر جۆرێك ئەو دابەشبوونەی ئەوانی ترو سەرهەڵدانی لایەنە نوێكان بە تایبەت نەوەی نوێ‌ لە بەرژەوەندی پارتی و یەكێتی شكایەوە ، ئەوەش بابەتێكی ترە ناكرێ‌ هەڵوەستەی لە سەر نەكرێت .
 







زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە