بەزمە لە كەركوك
لەتیف فاتیح فەرەج
PM:01:33---07-06-2018
ئه‌م بابه‌ته 1420 جار خوێنراوه‌ته‌وه‌‌

سەرەتا :
 لێرەو لەوێ‌ خەڵكی رۆشنبیرو تەنانەت كادیری حزبی و بگۆی نێو كۆمەڵی كوردەواری و خەڵكی كوردی كەركوك لە بری هەموو قسەو باسێك لە سەر تولەرانس و پێكەوە ژیانی ئاشتیانەو چارەسەركردنی كێشە تولانیەكانی كەركوك كەوتونەتە وێزەی ئەو دەنگانەی باس لە تەزویرو ساختە كاری كەركوك دەكەن لە هەڵبژاردنەكەی 12-5 و ئەمە وا دەخوێننەوە كە خیانەتە لە كورد ، لە كاتێكا دەبوو هەر ئەوانە لە بەر خاتری كورد لە بەر خاتری حزبەكەی خۆیان لە بەر ئەوەی كورد لە كەركوكا پێویستی بە تەزویرو ساختە نیە ، دژی هەر تەزویرو فڕو فێڵێك بوایەن ، ئەمە هەر لەبەر ئەوەی كەركوك لە هەر شارێكی تری عێراق هەستیار ترەو چاوی زۆر لە سەرەو وڵاتانی دەورو بەر بە ئارەزوی خۆیان دەستوەردانی تێدەكەن و بێ‌ منەت لە ناویدا تەراتێن دەكەن ، تەنانەت بە جۆرێكە وەزیری دەرەوی توركیا " ئەحمەد داود ئۆغڵو " بێ‌ گەڕانەوە بۆ بەغدا هاتە كەركوك و وتی بۆلای خزمەكانمان هاتوین .
ئەم بێسەرەو بەرەیەیی كەركوك زەمینەی دەست وەردانی ئێران و تورانی رەخساندووە و جگە لە توركیا كە وەك ویلایەتی 82هەمین سەیری دەكات ، ئێرانیش بە هی خۆی دەزانێ‌ و بەردەوام نوێنەری لەو شارە هەیە ، نوێنەر بۆ كاری باش نا ، خۆ توركیاو ئێران دەیانتوانی لە بری ئەوە بۆ كاری باش كونسڵگەری لەو شارە بكەنەوە ، بەلاچم مەسەلە بۆنی نەوتەكەو شتی ترە .
لە بارو دۆخی ئاوادا ئەركی دەستە بژێری رۆشنبیرو كادیری پێشكەوتووئەوەیە سەرەڕای جیاوازی ئایدۆلۆژی كار لە سەر هاوهەڵوێستی و پێكەوەیی كورد بكات و لە پرسیارە گرنگەكانی بۆ چی كێشەكانی ئەم شارە لە سەر یەك كەڵەك دەكرێن بپرسێت نەك ئەوەی نابێ‌ قسە لە سەر تەزویرو ساختە بكرێت .
بۆ لە كەركوكا تەزویر بكرێت :
لە كەركوكا كورد پێویستی بە تەزویر نیە ، ئێستا بێ‌ ئاسایكردنەوە ، بێ‌ گێڕانەوەی قەزا دابڕێنراوەكان كە لە ساڵی 1976ەوە دابڕێنراون ، بێ‌ ئاوەدانكردنەوەی تەواوی گوندە كورد نشینەكانی سنوری پارێزگای كەركوك كورد زۆرینەی ئەو شارەیەو بە تەنیا لە 50%زیاترە ،باشە كە لە نێوە زیاترە بۆ دەبێت تەزویر بكات ، بۆ لە بری تەزویر كردن بیریان لە پێكەوە بوون و یەكدەنگی نەكردەوە وەك سەردەمی "لیستی برایەتی " دواتر لە سەر ئەوەش قسەمان هەیە ، كورد ئەگەر لە ریفراندۆما تەزویری لە توركمان و عەرەب كردبێت بە " فەن و فنون " ئەوە لە هەڵبژاردنی 12-5 تەزویری لە خۆی كردووە ، ئەمە كارە خراپەكەیە ، خۆی ئەگەر لە وانی تریشی بكات هەر خراپە ، بەڵام لە خۆكردن وەك تێكدانی ئاشتی كۆمەڵایەتی وایە ، دەی دیارە ئەوە كاردانەوەو نوسینەكانی هەردوولاش دیارن ، فێڵ لە خۆ كردن لە كەركوك دۆخەكە بە ئاقارێكی خراپدا دەبات و هەر واش بووە ، فێڵ لە خۆكردن هەم دەمی توركمان و عەرەبمان لێدەكاتەوە ، بە تایبەت ناسیونالیستە كوێر بینەكان ، هەم دەنگە ناڕازیەكانی كوردیش هاوتەریبی دەنگی توركمان و عەرەب دەكات كە ئەمە ئیتر دەرگا بۆ تەخوین و قسەی تر دەكاتەوە بێ‌ گەڕانەوە بۆ ئەسڵی بابەتەكە، نەزەریەی موئامەرەكەی عەرەبەو هیچی تر.
كورد لە كەركوكا تەزویریش نەكات لەو دەنگە زیاتر دێنێ‌ كە ئێستا هێناویەتی ، دەبوو لە بری ئەوە كورد لە هۆكاری كەمی بە پیرەوە چوونی دەنگدان بپرسێ‌ ، ئەوە بۆ ئەو ساردو سڕیە هەبوو، هەموو دەزانین پەنا برایە بەر بانگەواز لە مزگەوتەكان ، من كە دۆخەكەم بینی بە تەلەفون داوام لە بەرپرسێكی گەورەی گۆڕان كرد كە لانی كەم ئەو سێ‌ لایەنە ی پێكەوەن داوا لە خەڵك بكەن ئەو چەند ساتەی ماوە بڕۆن دەنگبدەن ، هەر واش كرا ، من حەزم دەكرد هەموو لایەنە كوردیەكان پێكەوە ئەو داوایە بكەن و بیر لە تەزویرو ساختە نەكرێتەوە ، پێشتریش زۆر باسی ئەو پێكەوە بوونەكرابوو ، دەی كە تەزویری رێكخراو بكرێت كاردانەوەش دەبێت.
لە كەركوكا لە كۆی زیاتر لە 950هەزار دەنگدەر بۆ 1 ملیۆن دەنگدەر نیوە زیاتری كوردە ئێمە داتاو ژمارەكانمان لایە ، ئەگەر نیوەش نەبێ‌ هێشتا توركمان و عەرەب توانای هێنانی پێنج كورسی زیاتریان نیە ، بۆیە تەزویر جگە لە وەی كورد لە خۆی دەكات توركمان و عەرەبیش دەخاتە بەرەی دژی كوردەوە ، وەك ئەوەی ئێستا هەیە .
بۆ كەركوك خەتای كێ‌ بگرین ؟
دۆخی كەركوك كە بەو جۆرەیە پەیوەندی بەس بە رۆژی دەنگدانەوە نیە ، دۆخی كەركوك لە 2003ەوە كار بۆ چارەسەر كردنی نەكراوە ، نەمادەی 58 كاتی خۆی باش كاری لە سەر كرا لەو ماوە كەمەدا نەمادەی 140 دواتر لەماوەی دیاری كراویدا جێبەجێكراو دواتریش پشتگوێ‌ خرا ، ئەنجومەنی پارێزگای كەركوك كە لیستی برایەتی تێیدا 26 كەس بوون و زۆرینە بوون ، هیچ هەنگاوێكی ئەو تۆیان نەنا بۆ چارەسەر كردنی گرفتەكانی كەركوك ، ئەنجومەنەكەش هەرگیز رۆژێ‌ نەیتوانی بە تەواوەتی كۆبێتەوە ، لە دوای 16-10-2017شەوە  ئەنجومەنەكە لە لایەن خودی كورد خۆیەوە تەفرو تونا كراو ئەوەش ئاكامی ئەو بارو دۆخە ، لە جێبەجێنەكردنی مادەی 140 ، لە تەفرو تونا بوونی ئەنجومەن ، لە هەڵنەبژاردنی ئەنجومەنی نوێ‌ لە كەركوك ، لە حزبحزبێنەو تاڵانی نەوت و ئەوەی تا ئێستا گوزەراوە ، كورد پشكی شێری خەتا باریەكانی بەردەكەوێت ، بۆیە ناكرێ‌ كۆی كێشەكان گرێبدەین بەوەوە كە نابێ‌ باسی تەزویری 12-5 بكرێت .
ئەگەر هەڵبژاردن لە كەركوك دوبارە بكرێتەوە و كورد بەشداریەكی باش بكەن ، بڕوام وایە كورسی كورد زیاد دەكات نەك كەم ، بەڵام رەنگە كورسیەكانی كورد بە گشتی بۆ یەك لایەنی كوردی نەڕۆن ، بە بڕوای من ئەمە هەر زۆر ئاساییە ، ئەوە ئاسای نیە كە نوێنەرێكی گۆڕان یان هاوپەیمانی دەرچێت و دەنگەكانی دیار نەبێت ، بۆیە ئەمە گۆڕانی بەسەردا دێت ، بۆ ئەمەش دەبێ‌ ئەوانەی كە گومانیان هەیە بە فێڵ سەركەوتون بەر لەوانی تر قەبوڵی ئەوە نەكەن ، كورسیەك كە هی ئەوان نیە لە سەری دانیشن ، مەسەلەكە ئەمەیە ، با واز لە حزبایەتی و شەڕی حزب بێنین بەسەر ئەمەدا زاڵ بین باشە ئەگەر هەموو كورسیەكانی كەركوك هی یەك لایەنی كوردی نەبن و هی چەند لایەنێك بن دنیا ئاخر دەبێ‌ ؟.
كەركوك لە 2003ەوە لە لایەن خودی كوردەوە زوڵمی لێدەكرێت نەك كەسی تر ، تەنانەت ئەمەریكیەكانیش لە ئازاری كورد پێش 2003 حاڵی بوون ، بەڵام كورد نەیزانی چۆن مامەڵە بكات ، گروپی قەیرانی عێراق ، ستیڤان دیمستۆرا و تەواوی دنیا لەو ستەمە دەگەن كە لە كورد كراوە لە سەردەمی بەعسا ، بەس كورد خۆی نەیتوانیوە تێیبگات بۆیە ئەوە بارودۆخی كەركوكە ، ئێستا ئەگەر كورد بەم دۆخەوە هەر 12 كورسیەكەی كەركوكیش بەرێت ، ناتوانێ‌ هیچی ئەو تۆ بكات ، ئەمەیان مایەی هەڵوەستەو قسە لە سەر كردنە ، نەك ئەوەی ناكرێ‌ كورسیەكەی دكتۆر محەمەد یان ئارا رۆژیەیانی و فڵان و فیسار بگەڕێنرێتەوە بۆ خاوەنەكەی .









زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە