خوێنەكەو دیموكرات و ئێران
لەتیف فاتیح فەرەج
AM:10:56---13-09-2018
ئه‌م بابه‌ته 627 جار خوێنراوه‌ته‌وه‌‌

1
لە تەك كۆمەڵێك دۆستا سەردانی كۆیەی حاجی قادرمان كرد بە مەبەستی سەرەخۆشی لە حزبی دیموكراتی كوردستانی ئێران ، سەبارەت بەو كوشت و بڕەی دەرهەقیان كرابوو ، لە سەر گۆڕەكان بیرم لەوە دەكردەوە كورد چەند گۆڕ غەریبی وڵاتی خۆیانن ، لە قەندیل گۆڕی باكوری و رۆژئاوایی و رۆژهەڵاتی هەن ، لە رۆژهەڵات گۆڕی باشوری ، لە رۆژئاوا گۆڕی باشوری و باكوری و ئەوانی دی، ئەوان ناهێڵن لە شارو شوێنی لە دایك بونمان بمرین ، لێ‌ مردنەكە و گۆڕستانەكانمان سنورە دەسكردەكە دەسڕێتەوە ، بە باوەڕی من ئیدی كاتی ئەوە نیە بۆ چالاكیەكی كەمنمود باشترین رۆڵەكانی خۆمان بكەینە قوربانی ، ئاخر چوونی چوار پێشمەرگە بۆ ئەو چیاو چۆڵەی رۆژهەڵات و كوشتنی ئەرتەش یان پاسدارێكی لارەخواری دەسەڵات چی لە مەسەلەكە دەگۆڕێت .
2
نەرۆژهەڵات نەباكور پێویستیان بەوە نیە بە كوشتنی دوو پۆلیس یان دوو پاسدار چالاكیان بۆ بەڕێوە بچێت ، پێویستە بیر لە رێگەی دروستتر بكرێتەوە ، وەك سەردەمی قەڵەم و موڕاجەعات ، ئەوەی كاتی خۆی بە هادینی ئەدەب و جەلالی جەلالی زادەو ئازادیخوازانی نیشتمان دەیانكرد هەزار چالاكی چەكداری دێنێت ، نمونەی فراكسیۆنی كوردەكان لە پارلەمانی ئێران ، یان كارەكانی سەلاحەدین دەمیر تاش و هاوڕێكانی ، لێگەڕێن با چیتر خوێنی كورد بە هەدەر نەڕوات ، ئاخۆ رێگەی دیكە نیە بۆ ئازادی، هەڵبەت ئەمە بۆ رۆژئاوا لەوەوە جیاوازە كە لەوێ‌ داعش و توند ڕەوی بەربەڕیانە هەن ، وەك پەلامارەكەی سوپای تورك بۆ عەفرین .
3
ئەمەریكا بێویژدانیەكی گەورە دەكات بەوەی دنەی شەڕو شتی وادەدات و دواتریش وەك كەڕەی شەربەت تەماشا دەكات ، لای ئەمەریكیەكان بەرژەوەندی لە سەرو خوێنەوەیە ، هەر بۆیە لە بری سەرە خۆشی لە كۆستكەوتوەكان بكەن لەوانەی دەكەن كە رەنگە بەرژەوەندیان تێكهەڵكێش بووبێت ، ناخۆشتر ئەوەیە میدیای كوردی هەمیشە دەكەوێتە هەڵەی زەقەوە ، ئێران بە فەڕمی داوای رادەستكردنی تیرۆریستان دەكات ، میدیای كوردی لە باشور بە دێڕی درشت دەنووسن ئێران داوای دیموكرات لە هەرێم دەكاتەوە ، بە دینتان شەرم نیە بە كەسانی وەك مامۆستا عەبدوڵای حەسەن زادەو جەلیل گادانی وهاو سەنگەرەكانی قاسملوو شەرەفكەندی بگوترێ‌ تیرۆریست و تۆش بیكەی بە هەواڵ .
4
چەند شەرم و شورەییە بۆ كۆماری ئیسلامی ئێران بەوە خەنی بێت هاوڵاتی خۆی لە خوێن و خۆڵدا بە دەستی وی تەپ و تل بدات و باسی مافی مرۆڤ و ئەو شتانەش بكات .







زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە