کێ چارەنوسی عێراق دیاری دەکات؟
هێرش عەبدوڕەحمان
PM:04:06---19-08-2017
ئه‌م بابه‌ته 589 جار خوێنراوه‌ته‌وه‌‌
بەردەوام کۆمەڵێک بەناو شرۆڤەکاری حزبی بۆ شەرعیەدان بەقسەی گەورەکانیان، بانگەوازی ئەوە دەکەن کە ناوچەکە بەرەو گۆڕانکاری دەچێت و، دەسکاری نەخشەی ڕۆژھەڵای ناوەراست دەکرێت، بێ خوێندنەوەی ئەوەی کە ھاتنی ئەمریکا بۆ ناوچەکە بۆ پاراستنی ئاساییشی ووڵاتەکەیانە، نەک بەرژەوەندی گەلان و ووڵاتانی تر، ئەوان بەرژەوەندیەکانی خۆیان ڕەچاودەکەن، ھەر خواستی ئەمریکاش چارەنوسی عێراق دیاری دەکات، نەوەک حەزی سەرکردە عەرەب و کورد .

پێکھاتەی کورد و شیعە و سونە لە چوارچیوەی عێراقدا ئەکەونە ناو بەرژەوەندیەکانی ئەمریکا ،ھەر ھەنگاوێکی ئەو سێ پێکھاتەیە کە دابەشبون، ناسەقامگیری سیاسی بەدوادا بێت، لە ھەموو حاڵەتێکدا ئەیانوەستێنێت، ئەگەر کاردانەوەی سەربازیش پێویست بکات!.

سەرکردەکانی پارتی و یەکێتی بەردەوام گلەیی لەمانەوەیان ئەکەن لەعێراقدا، بەبیانوی ئەوەی ئەوان قوربانی دەستی شیعە و سونە و ئەمریکان، چیتر ناتوانن قبوڵی ئەو ناچارییە بکەن، روونە شیعە و سونە زۆر زیاتر لەکورد حەزئەکەن عێراق ببێت بەسێ پارچەوە، وەک لەھەموو سەردانەکانیان، بۆ واشنتن ئەو قسانەی داوە بەگوێی کاربەدەستانی سیاسی ئەمریکی و، ئەوانیش راشکاوانە وەڵامی نەخێریان پیداون، نەعێراق و نەشیعە و سونە پێوستیان بە کورد نیە، حەزیش ناکەن لێشیان نزیکبن، ئەوان ئەزانن ئەمریکا ڕێگا لەو پارچەبوونە دەگرێت، ژێرانەتر لە کورد دوای بەرژەوندیەکانی خۆیان دوای ئەمریکا ئەکەون، تا ئەوەی بەدەستیان ھێناوە، لە دوای پرۆسەی ڕوخانێ " سەدام " جارێکی تر لە دەستی نەدەن، کە چۆن لە ساڵانی بیستەکان، بۆ سێ چارەکە سەدە ژێردەستەی کەمینەیەکی سونە کران و دوبارە نەبێتەوە، سونەش لە لاوازی پێگەیان لە عێراقدا، خۆیان بە کوردەوە ھەڵواسیوە، هەرچەندە چارەی کوردیان ناوێت، ڕونترە بڵێم ئەگەر ئەمریکا حەز بکات کورد بکات بە خاوەنی قەوارەی سەربەخۆ و دایبرێت لە عێراق، نە گوێ بە ئیقلیم ئەدات، نە حیساب بۆ قسەی شیعە و سونەی عێراق دەکات .

ڕیفراندۆم ، درۆ ھەرە گەورەکەی جوڵانەوەی کوردایەتیی :

ڕیفراندۆم ، جگە لە ورووژاندنی سۆز و عاگیفەی کۆمەڵگای کوردیی، هیچ ستراتیژ و ئەنجام و ئامانجێکی نیشتیمانیی، جیۆگرافیی، ئابووریی و سیاسیی نییە، ئەو دروشمەی کادیر و عەبقەرییەکانی پارتیی، ئەو درووشمەی بارزانیی، کوڕ و برازاکەی، تەنھا و تەنھا پرتە و بۆڵەی سەر ڕوپەڕی ڕۆژنامەکانە .

ماڵباتی بارزانیی چەندین مانگە کۆمەڵگای کوردی بە گوتارێکی قەومی بێسەروبەر فریو دەدەن، کاتێک بانگەشە بۆ درووشمێک دەکەیت، ئەو دروشمە پێویستی بە بیرکردنەوەی زانستیی هەیە، پێویستی بە لای کەمی عەقڵانییەتی سیاسیی و دیبلۆماسیی نوێ هەیە .

ھەموو دونیا دەزانێت لە ئێستادا نە ماڵی کورد، نە پارتیی، نە ناوچەکە بایی ئەوە تەرتیب نیە، تا کورد توانای خۆبەدەوڵەت بوونی هەبێت، لە دیدی پارتییدا، بەدەوڵەتبوون وەک جیابوونەوەی بوکە لە خەسوو، لەکاتێکدا ئەم پرۆسەیە سەرخان و ژێرخانێکی باش و پتەوی دەوێت .


 پارتیی و کۆی ھێزە سیاسیەکانیتر دەزانن لە ئێستادا ئەو چارەسەرە ئایدیالییە بوونی نییە، ئەمێریکا ئامادە نییە بەرژەوەندییە سەرەکیی و دریژخایەنەکانی بکاتە قوربانی بڕیارێکی ھەرزەکارانەی سیاسییەک!.

 پەیوەندی کورد و ئەمریکا پابەند نیە بە هیچ پەیمانێک ئەوەش دەکەویتە چوارچیوەی ئەوەی کە ئەمریکا بەرژەوەندی لەگەل کورد نیە بەڵکو کورد لە گۆڕانی رژێمی عێراق کەوتۆتە ناو بەرژوەندیەکانی ئەمریکا.

سیاسەت لە ئەمریکا لەسەر بنەمای هاوسۆزی دانەمەزراوە، ئەمریکا بیەوێت شتێک بکات لە رۆژھەڵاتی ناوەڕاست چاوەڕێی ئۆکەی کەس ناکات بۆ ھیچ کەسیکیش لە ئێستادا دەست لە نەخشەی ڕۆژهەڵاتی ناوەراست نادات لە کەسیش قبوڵناکات ختوکەی بەرژەوندییەکانی بدات  .

 هەلی باش دروست بووە بۆ کورد لە عێراقدا، ڕۆڵی گرنگیشی هەبووە بۆ ئەوەی توشی هەڵەی رابردوو نەبێتەوە، بەڵام بەداخەوە ئەو سەکردایەتیەی ئێستا هەموو بەرژەوەندییەکانی تێکەڵکردووە ھێندەیان ئەمبەر و ئەوبەر کردووە لە نێوان ئیقلیم و ئەمریکادا ھیچ متمانەیەکیان نەماوە، شتیک نییە بە ناوی ستراتیجی سیاسەتی دەرەوە لەلایەن ئەو دەسەڵاتەی ئێستای هەرێم، مامەڵەکردنیان لەگەڵ دنیای دەرەوە زیاتر لە پەیوەندی موخابەراتی دەچێت، وەکو کوێخای ئاواییەک یان سەرۆک عەشرەتێکە، نەک وەکو سیاسیەک .

لە کۆتایدا نەخشەی ناوچەکە گۆڕانکاری تیادا ناکرێت و ئەمریکا بە دوای بەرژەوەندیە تابیەتیەکانی دەکەوێت، لە ئێستاو لە ئایندەشدا، بۆ ھەرێمی کوردستانیش ئەمریکا بەگوێرەیی بەڕەکەمان رێگەمان ئەدات پێ رابکێشین ، نە زیاد و نەکەم .





زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە