مێژووی میدیا ناشرین مه‌كه‌ن..!!
شەهێن سابیر
PM:01:09---19-10-2017
ئه‌م بابه‌ته 1171 جار خوێنراوه‌ته‌وه‌‌
به‌گشتی كه‌م تازۆر، دورو نزیك په‌ی به‌نه‌خشه‌و هه‌ڵوێسته‌ سیاسی‌و نه‌ته‌وه‌ییه‌كان ده‌به‌ین، له‌نێوان پارت‌و هێزه‌ سیاسیه‌كانی كوردستان‌و عێراق‌و سیاسه‌تی له‌بیر نه‌كراوی رابردووی دورو نزیكی وڵاتانی هاوسێ، به‌ئاوڕدانه‌وه‌ بۆ تۆماره‌ مێژوییه‌كان‌و رێككه‌وتنی دابه‌شكاری‌و داگیركاری‌و چاوتێبڕینی وڵاتانی زلهێز له‌كوردو له‌ناوچه‌كه‌.
 
كاتێكیش لاپه‌ره‌ زامداره‌كانی مێژوو هه‌ڵده‌ده‌ینه‌وه‌، له‌هه‌ندێك گۆشه‌وه‌ به‌شه‌رمنی ده‌بینین، كه‌ كورده‌كان چۆن زۆرانیان  گرتووه‌و یه‌كتریان داوه‌ به‌زه‌ویدا...! به‌ڵام له‌رووی فۆرم‌و قه‌باره‌ی روداوه‌كان‌و واقعی حاڵی سه‌رده‌مه‌كه‌، گۆرانكارییه‌كان گه‌لێك جودان، له‌رووی پێگه‌ی نه‌ته‌وه‌ی‌و شوناسی نه‌ته‌وه‌یی‌و روداوه‌كانی ئه‌م ناوچه‌یه‌، به‌دیاری كراویش ئه‌م دواییانه‌ی شه‌ڕو روبه‌روبونه‌وه‌ی داعش، كوردی چ وه‌ك نه‌ته‌وه‌ وه‌ك پێشمه‌رگه‌و هێز له‌ده‌یان مانشێتی قه‌به‌ی جیهاندا به‌شكۆوه‌ پێناسه‌ كردووه‌، هاوكێشه‌كان به‌ئه‌ندازه‌یه‌ك گۆڕانكاری به‌سه‌ردا هاتبوو، كه‌ هیوایه‌كمان بۆ ئاینده‌یه‌كی له‌بار‌و چانسێكی زێڕین هه‌ڵچنیبوو، به‌ڵام خه‌ساره‌ت به‌ره‌نجامی هه‌ڵه‌ی به‌ردوام‌و دوباره‌ی سیاسییه‌كانی كورد بێجیاوازی له‌هه‌نگاو‌و بڕیاره‌كانیاندا‌و نه‌بونی یه‌ك گوتاری‌و ئه‌و هۆكاره‌ ناوه‌كییانه‌ی په‌یوه‌ندییان به‌كێشه‌ی درێژخایه‌ن‌و ململانێ‌و ئه‌و ده‌سته‌واژه‌ باوه‌ی ده‌وترێت نه‌بونی "یه‌كڕیزی"، هه‌میشه‌ به‌رله‌بون، نیشتیمان ده‌خاته‌ سه‌ر ژان‌و هیواكان له‌بار ده‌برێن..!

ئاشكرایه‌ هه‌ریه‌ك له‌ئێمه‌ بۆچون‌و لێكدانه‌وه‌ی تاڕاده‌یه‌ك هاوبه‌شمان هه‌یه‌،به‌رانبه‌ر سیاسیه‌كان، به‌ڵام ئه‌وه‌ی وه‌ك میدیاكارێك باسی لێوه‌بكه‌م،قسه‌كردن‌و شرۆڤه‌كردن،یان خستنه‌رووی تێڕوانینم نییه‌ له‌سه‌ر هاوكێشه‌ سیاسیه‌كان، به‌ڵكو قسه‌كردنمه‌ له‌سه‌ر دیوێكی دیكه‌ی هه‌ستیار كه‌ وه‌ك په‌یامێك پێویسته‌ بگات به‌ده‌زگا میدیایی‌و میدیاكاره‌كان... بائێمه‌ لێگه‌ڕێین هه‌ڵه‌‌و نه‌بونی یه‌كێتی هێزه‌ سیاسییه‌كان دوباره‌ نه‌كه‌ینه‌وه‌، ئه‌وه‌ لێگه‌ڕێین بۆ ده‌ره‌نجامه‌كان‌و نوسینه‌وه‌ی مێژوو..!

له‌ئێستادا میدیا له‌به‌رده‌م به‌رپرسیارێتیه‌كی گه‌وره‌ی واقعی‌و مێژووییدایه‌، میدیا یه‌كێكه‌ له‌گه‌وره‌ترین كه‌ره‌سه‌و ئامڕازه‌كانی گواستنه‌وه‌و نمایشكردن‌و ئاراسته‌كردنی جه‌ماوه‌ر، به‌رهه‌دوو لایه‌نی ئه‌رێنی‌و نه‌رێنی، مامه‌ڵه‌كردنی میدیایی به‌قه‌د بڕیاره‌ سیاسیه‌كان‌و په‌یامه‌ سیاسیه‌كان هه‌ستیاره‌..! پێویستی به‌راوێژ‌و ده‌رگاوانه‌ تا به‌وریاییه‌وه‌ له‌ڕووی ئاسایشی نه‌ته‌وه‌یی، سایكۆلۆژیای وه‌رگر‌و ئاراسته‌و گواستنه‌وه‌ی زانیارییه‌كان‌و له‌كه‌دار نه‌كردن‌و شكاندنی شكۆی نه‌ته‌وه‌یی‌و دوركه‌وتنه‌وه‌ له‌راكێشانی سه‌رنجی وه‌رگر له‌سه‌ر بنه‌مایه‌كی پێچه‌وانه‌ی ئاراسته‌ی دروست‌و پێویست‌و چه‌خماخه‌ی هه‌ڵگیرساندنی شه‌ڕی ناوخۆ، وه‌لێ ده‌زانم گه‌لێك قورسه‌ له‌م ته‌م‌و مژه‌دا‌و له‌پاڵ پیشه‌یی بوندا باسی (بابه‌تیبون) بكه‌م، چونكه‌ به‌شێكی زۆری میدیاكان دواجار زمانحاڵی لایه‌نه‌ سیاسیه‌كانن، به‌ڵام نابێت له‌بایه‌خی میدیا‌و ئه‌رك‌و ئامانجه‌ دروسته‌كه‌ی لابده‌ین، هاوكات به‌چاوێكی رق‌و كینه‌وه‌ له‌هاوپیشه‌كانی خۆمان بڕوانین كه‌ سه‌ر به‌ر هه‌ر میدیایه‌كبن.
لێره‌وه‌ داوا له‌میدیاكاران به‌گشتی‌و سه‌رنته‌رو رێكخراوه‌كانی داكۆكی له‌میدیاو په‌روه‌رده‌ میدیاییه‌كان ده‌كه‌م، تكایه‌ په‌یامی (نا بۆ توندوتیژی میدیایی)، روبه‌روی ده‌زگا میدیایه‌كان بكه‌نه‌وه‌، تاپه‌یوه‌ست بكرێن به‌ئاكارێكی میدیایی، به‌له‌به‌رچاوگرتنی كاریگه‌ری گه‌وره‌ی میدیا له‌سه‌ر روداوه‌كان‌و ئاراسته‌كردنی، چونكه‌ ده‌زانرێت ته‌وژمی ته‌كنه‌لۆژیاو راگه‌یشتن به‌ئامڕازه‌كانی‌و بونی سۆشیاڵ میدیا، واقعێكی ده‌سته‌به‌ر كردووه‌ كه‌ هه‌ركه‌سێك خاوه‌نی كه‌ناڵێكی بڵاوكردنه‌وه‌ی خۆیه‌تی، به‌ڵام رۆڵی هه‌ڵسوڕاو‌و كاریگه‌ر‌و به‌كارهێنانی وه‌ك سه‌رچاوه‌ ده‌زگا میدیاییه‌ تایبه‌تیه‌كانن.
 
تكایه‌ بائه‌وه‌شمان بیرنه‌چێت‌و زۆر پێش روداوه‌كان نه‌كه‌وین، چونكه‌ یارییه‌ سیاسیه‌كان به‌جۆرێكن، كه‌ به‌گوێره‌ی كات‌و رۆژو روداوه‌كان خوێندنه‌وه‌و راڤه‌و شیكارییه‌كان بۆ روداوه‌كان ده‌گۆڕێن، سه‌ره‌رای ئه‌مانه‌ش ده‌بێت  ئه‌و راستییه‌ بزانین،  زۆربه‌ی كات ئه‌وه‌ی بكه‌ره‌ سیاسی‌و كاراكته‌ره‌ سیاسیه‌كان له‌میدیاكانه‌وه‌ قسه‌ی له‌سه‌رده‌كه‌ن گه‌لێك جیاوازن  له‌گوتار‌و بڕیاری ئه‌ودیوی میدیاوه‌ تا ئه‌و ده‌مه‌ی ده‌بێته‌ واقعیحال، له‌متێڕوانینه‌شه‌وه‌ هه‌ریه‌ك له‌ئاست خۆی‌و روداوه‌كانه‌وه‌ ده‌بێت هه‌ستیاری دۆخه‌كه‌ له‌به‌رچاوبگرێت‌و ئه‌دای میدیاكان نه‌بنه‌  به‌شێك بۆ ده‌رنجامی خراپی روداوه‌كان.





زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە