چاكسازی خوازەكان و دۆزی كەركوك
دانــا زەنــدی
PM:12:37---09-07-2018
ئه‌م بابه‌ته 730 جار خوێنراوه‌ته‌وه‌‌

بیستومانە و بینیومانە و مێژووش بەردەوام بۆی گێڕاوینەتەوە كە گەلانی ژێردەستە بۆبەدەستهێنانی مافە زەوتكراوەكانیان شۆڕش دەكەن و قوربانی دەدەن و لەهەمان كاتیشدا بەشێكیشیان دەبن بەجاش و خۆفرۆش بە دوژمنانی گەلەكەیان. دیارە ئەمەش، وەك هەر شتێكیتری ئەم بوونە، رەهانیە و رێژەییە. واتە لەگەلێكەوە بۆ گەلێكی دیكە جیاوازی هەیە بەگوێرەی ئاستی رۆشنبیری كۆمەڵگاكەیان، دیارە باری ئابووریش رۆڵێكی گەورە دەگێڕێت لەم بوارەدا. بۆیە زۆر ئاساییە گەلی كوردیش، وەك هەر گەلێكی دیكەی سەر ئەم هەسارەیەمان، بۆ بەدەستهێنانەوەی مافە سروشتیەكانی راپەڕیوە و شۆڕشی هەڵگیرساندووە، ئاساییشە كە لە قۆناغی شۆرشدا جاش و خۆفرۆشیان تیا هەڵكەوتبێت بەهۆی ئەو هۆكارانەی لەسەرەوە ئاماژەمان پێكردووە. هەروەها ئاسایی و عادەتییشە لە پاش گەیشتن بەدەسەڵات گروپێكی ئۆپۆزسیۆن بێتەكایەوە. لە هەموو دنیاشدا، بەتایبەت لە ووڵاتانی پێشكەوتووی خۆشبەختدا، كار و ئەركی ئەم گروپە ئۆپۆزسیۆنە چاودێریكردنی دەسەڵاتە بۆ پاراستنی لە گەندەڵی و لە داڕمان و داتەپین، واتە دەبێت گروپی ئۆپۆزسیۆن ئەو دەسەڵاتە بەهی خۆی بزانێت چونكە بەری رەنج و خەبات و تێكۆشانی سەرجەمی ئەو گەلەیە كەئەمانیش بەشێكن لێی و هەموو چین و توێژەكانی ئەم گەلە قوربانیان بۆ داوە. بەڵام ئەوەی جێی سەرج و تیاڕامان و سەرسوڕمانە لەم سیستەمەی ئەم حكومەتی هەرێمەی خۆماندا ئەوەیە كە بێجگەلەوەی دەسەڵاتەكەی لیوان لێوە لە گەندەڵی و جێی متمانەی گەل نیە، بۆ بەدبەختی ئۆپۆزسیۆنەكەشمان لەئاستی متمانەی ئەم گەلە خێرلەخۆنەدیوە نیە.
جێی ئاماژەیە، یەكەم گروپی ئۆپۆزسیۆن، بەسەرۆكایەتی كەسایەتیەكی پڕلەئەزمونی خەباتی شۆڕشگێڕانە كە (كاك نەوشیروان) بوو، لە هەناوی (ی.ن.ك)ەوە هاتەبوون و ناوی بزوتنەوەی گۆڕانیان لەخۆیان نا. بەڵام ئەوەی مایەی سەرنج بوو لەم پرۆسەیەدا ئەوەبوو كە زۆربەی ئەو كادیرانەی لە یەكێتی جیابوونەوە و گۆڕانیان پێكهێنا (لە سەركردایەتی و كادیری ناوەندیش) بریتیبوون لەو كەسانەی كە لەسەر ئاستی تاكەكەسی، دەستكەوت و سوودێكی زۆریان لە یەكێتی بەدەستهێنابوو، واتە، لەگەڵ رێزما بۆیان، كەسانێكی خۆنەویست نەبوون بەرامبەر بەبەرژەوەندیە گشتیەكانی گەلەكەیان بۆئەوەی كە بتوانن ئەم ئەركە قوڕسە و ئەو مەبەستە پیرۆزەی كاك نەوشیروان (بەهاوكاری مام جەلال) بگەێننە جێگەی مەبەست. بۆیە لەپاش نەمانی كاك نەوشیروان ئەم بزوتنەوەیە كارێكی وای بەسەرهاتووە كە جێگەی حەسودی نیە تەنانەت بۆ بچوكترین حزبی ئەم هەرێمەش.
لەپاش ئەم بزوتنەوەی گۆڕانەش، هەر لەهەناوی (ی.ن.ك)ەوە، گروپێكی دیكە بەسەرۆكایەتی جێگری دووەمی سكرتێری یەكێتی (د. بەرهەم) جیابوونەوە و ناوی (هاوپەیمانی بۆ دیموكراسی و دادپەروەری)یان لەخۆیان نا. لەسەرەتاوە ئەم گروپە خۆیان وادەردەخست كە كەسانی فریادڕەسن و گەلی كورد لەم نەهامەتیە رزگار دەكەن. بێگومان بەشی زۆری كادیرانی ئەم گروپەش بریتیبوون لە كەسانی سودمەند لە یەكێتی و بۆ كۆكردنەوەی هەوادارانیان زیاتر تیشكیان خستبووەسەر مەڵبەندەكانی یەكێتی و ناوەندە زانستیەكانی وەك زانكۆ و پەیمانگاكان، ئەمەش بەو مەبەست و نیازەی كە بەهزری پێشكەوتووی پڕلەزانست و مەعریفەی ئەو ئەكادیمستانە زۆرترین دەنگ بەدەست دەهێنن و بەڕەكە لەژێرپێی یەكێتی دەردەهێنن. كەچی لەدەرئەنجامی خوێندنەوەی هەڵەیان بۆ (ی.ن.ك) تەنانەت ركابەری گروپێكی تازەپێكهاتووی وەك (نەوەی نوێ)شیان پێنەكرا.
ئاشكرایە گشت ئەم گروپ و بزوتنەوە ئۆپۆزسیۆنانەش (گۆڕان، هاوپەیمانی، نەوەی نوێ‌) تەنها لە زۆنی سەوزدا هەڵتۆقیون و گروپە ئیسلامیەكانیش هەر لەم زۆنەدا چالاكترن. هۆكاری ئەم دیاردەیەش لای هەمووان ئاشكرایە و پێویست بە روونكردنەوە ناكات. هەر ئەم دیاردەیەش خۆی لەخۆیدا خاڵێكی ئاشكراو روونە سەبارەت بەلاوازی و بەرژەوەندپەرستی ئەم گروپ و لایەنانە.
دیارە هەرچوار شارەكەی هەرێمی كوردستان گۆڕەپانێكی ناوخۆییە بۆ ململانێ‌ و كێبڕكێی حزبە كوردیەكان، بۆیە چالاكیەكانیان لە هەر ئاستێكدا و بەهەرشێوەیەكیشبێت تاڕادەیەك ئاساییە و سەبارەت بەدۆزی نەتەوەیی كەمەرشكێن نیە، بەڵام لە شارە كوردستانیەكانی دەرەوەی دەسەڵاتی هەرێمدا هەر ململانێیەكی حزبی دەرئەنجامەكەی بۆ بەرژەوەندی نەیارانی گەلەكەمان دەشكێتەوە.
هەر لەم سۆنگەیەشەوە، لەم دووایین هەڵبژاردنەی ئەنجومەنی نوێنەرانی عیراقیشدا، یەكێتی داوای لەسەرجەم لایەنە كوردستانیەكان كرد كە لە كەركوكدا یەك لیست كۆیان بكاتەوە، بەڵام سەرجەمیان ئەم پێشنیارەی یەكێتیان رەتكردەوە، لە كورتبینی دیدی سیاسیاندا وایاندەزانی كەیەكێتی لاوازبووە و ئیدی كەركوكیەكان متمانەی خۆیانی پێنابەخشن، لە دەرئەنجامی ئەم هەڵەو نەفامیە سیاسیەشدا، لە كەركوكدا كورد كورسیەك بۆ دوو كورسی لەدەستداو چوو بۆ عەرەب و توركمانەكانی نەیارانی كورد. هەربەم هەڵەیەشەوە نەوەستان، پاش ئەوەی (ی.ن.ك) بەتەنها خۆی شەش كورسی بەدەستهێنا، سەرانی ئەم لایەنە بەناو چاكسازی خوازانە، تەنها بۆ ركابەری یەكێتی و تێكشكانی، بەبێ‌ گوێدانە بەرژەوەندیە باڵاكانی نەتەوەكەمان، لە كەركوك و لەبەغدا لە عەرەبە هاوردەكان و توركمانە تۆڕانیەكان چالاكتر و توندتر بوون بۆ كەمكردنەوەی دەنگی كورد لەو شارە داگیركراوەدا..!! 
باشە ئێستا پاش هەژماركردنەوەی دەستی دەنگەكانیش كە هیچی لەدەرئەنجامی دەنگدانەكە نەگۆڕی، ئەم چاكسازی خوازانە چی بەشوێنكەوتووانی خۆیان دەڵێن؟ ئایا ئەمە بەرنامەی چاكسازیەكەیانە؟ ئەی چۆن خۆیان ئامادەدەكەن بۆ هەڵبژاردنی داهاتووی پەرلەمانی هەرێم و لە بانگەشەكەیاندا چی بەخەڵكی هەرێمی كوردستان دەڵێن و چۆن متمانەیان بەدەستدەهێنن؟!
بۆیە لەكۆتایی ئەم گوتارەمدا، وەك دڵسۆزیەك بۆ ئەوان، بۆئەوەی تۆزێك لە ئیحراجیەكەیان كەم بكەنەوە، ئامۆژگاریەكی برایانەیان دەكەم بۆ هەنگاونانێكی ژیرانە، هەرچی زووە لە كۆنگرەیەكی رۆژنامەوانیدا یان لە كەناڵەكانی راگەیاندنی خۆیانەوە، بۆئەم هەڵوێستە نابەجێیەیان كەبەرامبەر بەكوردانی شاری كەركوك نواندیان، بەفەرمی داوای لێبوردن لە گەلی كورد بەگشتی و بەتایبەتیش كوردانی كەركوك بكەن. 






زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە