بێ_بەڵێنیی بارزانیی

لەسواربوونی سەری خۆیەوە تا نەوەستانی یەك چركە بۆ پێكهێنانی حكومەت

03.11.2019

لڤین: 
مەسعوود بارزانیی، یەكێك لەو سیفاتانەی، كە پێیناسراوە، كەسێكی پێداگرە لەسەر بۆچونەكانی خۆی و بەوە ناسراوە، كە كەسێكە گوێ لە بەرانبەرەكانی ناگرێت. لەگەڵ ئەوەی كەسێكی پێداگرە لەسەر قسەكانی خۆی و دەیەوێت بەهەموو شێوەیەك بۆچوونەكانی خۆی بسەپێنێت، لەهەمان كاتدا بەڵێنەكانی خۆی لەبیرنامێنێت و هەمیشە ئەو بەڵێنانەی دەیاندا لەبیری خۆی دەباتەوە.

لەم ڕاپۆرتە شیكارییەدا هەوڵدەدەین چەند نمونەیەكی دیار و ئاشكرای بەڵێنەكانی بارزانیی بهێنینەوە، كە تێیدا بارزانیی نەك بەڵێنەكانی جێبەجێنەكردووە، بگرە پێچەوانەی بەڵێنەكانی مامەڵەیكردووە.

"ئەو دەستە دەبڕم، كە تەوقە لەگەڵ تاڵەبانییدا بكات!"

مەسعوود بارزانیی سەرۆكی پارتی دیموكراتی كوردستان لە گەرمەی شەڕی ناوخۆدا كاتێك باسی ئاشتیی لەگەڵ دەكەن لەگەڵ یەكێتیدا، بەبێ دوودڵیی و زۆر ڕاشكاوانە دەڵێت "ئەو دەستە دەبڕم، كە تەوقە لەگەڵ تاڵەبانییدا بكات!" بارزانیی لەقسەكانیدا هەمیشە پێچەوانەی ئەو پەندەوە مامەڵەیكردووە، كە دەڵێت "لەشەڕدا بەشی ئاشتیی بهێڵنەوەو لەئاشتیدا حیسابی ڕۆژی شەڕ بكەن". سیاسەتی بارزانیی بریتیبووە لە هەمووی، یان هیچ. بۆیە دەبینین بەبێ ئەوەی ئەو بەڵێنەی خۆی لەبیربێت و بەماوەیەكی كەم دوای ئەو قسەیەی، كە بەرانبەر جەلال تاڵەبانیی سكرتێری یەكێتیی نیشتمانیی كوردستان كردی، لەواشنتۆنی پایتەختی ئەمریكا، بارزانیی بەزەردەخەنەوە تەوقەی لەگەڵ ئەو كەسەدا كرد، كە دەیوت ئەگەر تەوقەی لەگەڵدا بكەم، ئەوا دەستم دەبڕم!

بارزانیی ئەگەر پیاوی جێبەجێكردنی بەڵێنەكانی بوایە، دەبوو بیست و یەك ساڵ بەر لەئێستا ببوایە كەسێكی خاوەن یەك دەست و ئەو دەستەی ببڕیبا، كە تەوقەی پێكرد لەگەڵ تاڵەبانیدا.

ئەوە ئەو واتایە ناگەیەنێت، كە ئەو كارەی بارزانیی بەرانبەر تاڵەبانیی ئەنجامیداو ڕێكەوتنی ئاشتییان واژووكرد كارێكی هەڵە بێت. بەڵكو كێشەكە لەقسە و بەڵێنەكانی بارزانییە، كە لەكاتی توڕەییدا دەیاندا و حیساب بۆ ئەو ڕۆژە ناكات، كە ناچاردەبێت پێچەوانەی كردارەكانی مامەڵەبكات.

"ئەگەر ڕیفراندۆم سەرینەگرت، بڵێن ئەو كابرایە شێت بووەو سواری سەری خۆی بووە!"

مانگی سپتێمبەری ساڵی (2017) یەكێكە لەمانگە پر جوڵە و دانوستاندنەكان لەهەرێمی كوردستان. بەهۆی ئەوەی بارزانیی بڕیاریدابوو لە (25 ی سپتێمبەری 2017) ڕاپرسیی بۆ سەربەخۆیی كوردستان بكات، تەواوی دۆست و نەیارەكانی كورد بەیەك دەنگ دژی ئەو بڕیارەی بارزانیی بوون و دەیانویست باوەڕ بەبارزانیی بهێنن ئەو كارە نەكات و هەرێمی كوردستان نەگەڕێنێتەوە چوارگۆشەی یەكهەم.

بەڵام پێچەوانەی پێشبینییەكان، بارزانیی قسەكەی خۆی لەبارەی ئەنجامدانی ڕیفراندۆم هێنایەجێ و گوێی بۆ هیچ كەسێك نەگرت، بەڵام ئەو بەڵێنەی نەهێنایەجێ، كە گوتی "ئەگەر ڕیفراندۆم سەرینەگرت، بڵێن ئەو كابرایە شێتبووبوو و سواری سەری خۆی بوو!" ئێمە لێیبەریین. بارزانیی نەك ئەوەی نەكرد، بگرە بەپێچەوانەوە ئەو ئێستایش دەیەوێت شكستی ڕیفراندۆم بەسەركەوتن بەخەڵك بفرۆشێتەوە.

هەموو ئەو ڕوداوانەی لەدوای ئەنجامدانی ڕیفراندۆم ڕوویاندا، پێشتر بارزانیی لەبارەیەوە ئاگاداركرابووەوەو پێیگوترابوو، كە ئەگەر ڕیفراندۆم ئەنجامبدرێت نیوەی خاكی هەرێمتان لەبەر دەستنامێنێت و بگرە مەترسیی لەسەر تەواوی كیانی هەرێم دەبێت. بەڵام بارزانیی گوێی بۆ هیچ كەسێك نەگرت و ڕیفراندۆمەكەی ئەنجامدا و ئێستا هەرێمی كوردستانی گەڕاندووەتەوە بۆ پێش  2003.

هەموو ئەو ناوچانەی لەدوای (2003) ەوە بەئەمری واقیع ئیدارەی كوردی تێدا بوو، ئێستا لەدەست كورددا نەماون. بگرە لەخاڵێكدا هەرێمی كوردستان گەڕاوەتەوە بۆ پێش ڕاپەڕین، ئەویش تەسلیمكردنی خاڵە سنوورییەكانە بەناوەند.

جگە لەوەیش لەسەر ئاستی ناوخۆی هەرێم، ئەو پارەیەی لەبەغداوە بۆ هەرێم دێت، تەنها بەشی موچە دەكات و خەڵك لەتەواوی خزمەتگوزارییەكانی دیكە بێبەشە. هەموو ئەو شتانەی، كە بەرانبەر هەرێمی كوردستان كراون، ئەگەر لە بەرانبەر ڕاگەیاندنی دەوڵەتی كوردییشدا بوایە، هێشتا ڕێیتێدەچوو، بەڵام هەموو ئەوانە تەنها لەپێناو پێداگریی بارزانییدا بووەو هەموویشیان ساڵ و نیوێكی نەبرد، بارزانیی ئەو عێراقەی، كە بە گوتەی ئەو بەكەڵكی ئەوە نەماوە كاری لەگەڵدا بكرێت، هەموو هێزی خۆی بۆ سەرفكرد، تا كادرێكی حیزبەكەی بكات بەسەرۆكی ئەو عێراقە.

"لەمڕۆوە یەك چركە لەسەر كەس ناوەستین بۆ پێكهێنانی حكومەت!"

 

دە ڕۆژ بەر لەئێستا بارزانیی دووبارە هاوشێوەی بەڵێنەكانی پێشووی، قسەیەكی دیكەی لە میدیاكان كرد و لەبارەی دواكەوتنی پێكهێنانی كابینەی نۆهەمی حكومەتی هەرێم ڕایگەیاند لەمڕۆ بەدواوە یەك چركە لەسەر كەس ناوەستین و كارەكانی پێكهێنانی حكومەت تەواودەكەن. دوابەدوای ئەو قسانەی بارزانیی. پارتیی و یەكێتیی بەشێوەیەكی زارەكیی ڕێكەوتن، بەڵام تا ئێستایش بەشێوەیەكی فەرمیی هیچ ڕێكەوتنێكیان لەبارەی پۆستەكانی كابینەی نۆهەمەوە واژوونەكردووە.

لەسۆشیال میدیادا ڕاگەیاندنی پارتیی ڕێكەوتنی زارەكییانەی یەكێتیی و پارتییان بەستەوە بەهەڕەشەكانی بارزانییەوەو گوایە یەكێتیی ترسی هەبووە لەوەی بارزانیی یەكێتیی بێبەشدەكات لەپێكهێنانی كابینەی نۆهەمدا، ئەگەر هەر ئەو ڕۆژە ڕێكەوتن نەكرێت. كەچی وەك هەموو جارەكانی دیكە تا ئێستا دە ڕۆژ بەسەر ئەو چركەیەی بارزانییدا تێپەڕیوە، كەچی تا ئێستا هەنگاوەكانی پێكهێنانی كابینەی نۆهەم هاوشێوەی ئەو كاتەیە، كە بارزانیی تێیدا هەڕەشەیكرد.

 

خەسڵەتەكانی بەڵێنەكانی بارزانیی

 

تەواوی ئەو بەڵێنانەی مەسعوود بارزانیی دەیاندات، ئەو بەڵێنانەن، كە بەشێوەی زارەكیی و لەمیدیاكانەوە بەشێوەی هەرەمەكیی دەیانكات، بۆیە بەهیچ شێوەیەك ناتوانێت بەشێوەیەكی تەندروست بڕیاربدات و زانیاریی بدات بەمیدیاكان.

نەوشیروان مستەفا لەپەرتوكی (پەنجەكان یەكتر دەشكێنن) دا باسی خەسڵەتێكی مەلا مستەفای باوكی مەسعوود بارزانیی دەكات لەبارەی لێدوان و چاوپێكەوتنەكانیەوە لەگەڵ ڕۆژنامەنوساندا. نەوشیروان مستەفا دەڵێت تەواوی ئەو چاوپێكەوتنانەی، كە بەنوسین مەلا مستەفا وەڵامی ڕۆژنامەنوسانی دەدایەوە، هیچ كێشەیەكی بۆ قەزیەی كوردی دروستنەدەكرد، چونكە تەواوی چاوپێكەوتنەكان لەلایەن ئیبراهیم ئەحمەدەوە وەڵامدەدرانەوە، بەڵام ئەو چاوپێكەوتنانەی بەشێوەی تۆماركردنی دەنگ ئەنجامدەدران هەمیشە كێشەی گەورەیان بۆ شۆڕشی كوردی دروستدەكرد، بەهۆی قسە هەڕەمەكییەكانی مەلا مستەفاوە.

ئەگەر بەوردیی سەرنج لە تێبینییەكەی نەوشیروان مستەفا بدەین، كە لەسەر مەلا مستەفا هەیبووە، هەمان تێبنییش بۆ مەسعوود بارزانیی ڕاستە، هەموو ئەو لێدوان و بەڵێنانەی بارزانیی لەكاتی حەماسەت و توڕەییدا دەیاندات، دواتر كێشەی گەورە بەدوای خۆیاندا دەهێنن و دۆزینەوەی چارەسەر بۆ ئەو كێشانە ئاسان نابێت.

3648 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations