مەلا بەختیار: دەڵاڵی فەیسبوك بەكرێ مەگرن وێنە و هەواڵەكانتان بڵاوبكەنەوە

07.11.2019

لڤین: 
لێپرسراوی دەستەی كارگێڕی مەكتەبی سیاسی یەكیتی رایدەگەیەنێت، . كارتان بەوە تەواو نابێ، دەڵاڵی فەیسبوك بەكرێ بگرن بۆ ئەوەی وێنەو هەواڵەكانتان بڵاوبكەنەوە. گرنگ وێنەو هەواڵ نیە. گرنگ ئەو بابەتەیە كە باسی دەكەن. ئەو بۆچونە نوێیانەیە كە دەری دەبڕن.

مەلا بەختیار، لێپرسراوی دەستەی كارگێڕی یەكێتی نیشتیمانی كوردستان، لە وتارێكدا بە ناونیشانی وتاری سواو كۆتایی هاتووە، دەڵێت: ئەگەر شارەزایەك سەد گوتاری سیاسیەك، یان كاربەدەستێك، لەناو حیزبەكان و حكومەت، لە ساڵانی رابوردو هەڵبسەنگێنێ، بە ئاسانی دەتوانێ بیسەلمێنێ، كە ناوەرۆكی وتارەكانیان، یەك مەبەست و یەك ئاڕاستەیە.. ئەویش ناوەرۆك‌و ئاڕاستەی گۆتاری سواوی كلاسیكیە.

ناوبراو لەو وتارەیدا دەشڵێت: بۆ خۆدەرخستن، مەنێرن بە دوای ئۆرگانەكاندا قسەی سواوی بۆ بكەن. كرێی سەیارە مەدەن هەتا شوێنی كۆبونەوەكان قەرەباڵغ بكەن. ئەمڕۆ بواری دیكە زۆرە بۆ ئەوەی گوتارەكانتان بگەیەنن.

دەقی وتارەكە:

وتاری سواو كۆتایی هاتووە
مەلا بەختیار

چارەكە سەدەیەكە گۆڕانكاری هەمە لایەنەی ئابوری، سیاسی، كۆمەڵایەتی و تەكنەلۆژی، سەراپای جیهانی گرتۆتەوە. لایەنی كەم، لەدوای پەیدابونی ئینتەرنێتەوەو راكێشانی هێڵی ئینتەرنێت بۆ كوردستان (١٩٩٢ - ٢٠١٩) بەرە بەرە گۆڕانكاری لە كوردستانیشدا، بە تایبەتی لە میتۆدەكانی خوێندن‌و پەروەردەو هزری كۆمەڵ، هەروا، لە میدیای كوردستانیدا، پەیتا پەیتا گۆڕانكاری دێتە دی.

لە دوای راپەڕینەوە تا ئێستا، نەوەیەك پەیدا بوەو نەوەی دوەمی راپەڕینیش، خەریكە پێك دێ. (33) زانكۆ لە كوردستاندا هەن. سەدان هەزار كەس زمانی ئینگلیزی و دەیان هەزاریش زمانەكانی دیكەی بێگانە دەزانن. كەم هاوڵاتی هەیە، تەلەفۆنی مۆبایلی نەبێ‌و فەیسبوكی نەبێ‌و وەتساپی نەبێ. رێگاكانی سەفەری دەرەوەی وڵات كراوەتەوە‌و بە ملیۆنەها كەس ساڵانە سەفەر دەكەن و دونیا دەبینن.

لە (٢٠١١)وە، بەناو بەهاری عەرەبی سەری هەڵداوە، ئەوەتا قۆناغی دووەمی راپەڕینەكان جەزائیرو لوبنان و سودان و عیراقیشی گرتۆتەوە. دروشمی خۆپیشاندەران دیارە، كە رەنگدانەوەی گۆڕانكاریەكانی سەردەمەكەن و لە ژێر كاریگەری سۆسیال-میدیان و سەر بە حیزب و مەزهەب و دەسەڵاتداران، رەت دەكەنەوە.

كەچی.. هێشتا، لە هەر چوار بەشەكەی كوردستاندا، هێزە سیاسیەكان، تەنانەت حكومەتی هەرێمیش، چارەكێكی سیاسەت و دەسەڵاتیان بەپێی ئەركەكانی سەردەمەكە نەگۆڕیەوە. گەندەڵان نەگلاون، مشەخۆران بەدەنگی بەرز ئەمشێنن، هەلپەرستی بۆتە دەمڕاستی.

لەوانەش سەیرو سەمەرەتر.. زۆربەی لایەنە سیاسیەكان‌و كاربەدەستان، هێشتا قۆناغی گوتاری (ئەی رەقیب)یان جێ نەهێشتوە.

ئەگەر شارەزایەك سەد گوتاری سیاسیەك، یان كاربەدەستێك، لەناو حیزبەكان و حكومەت، لە ساڵانی رابوردو هەڵبسەنگێنێ، بە ئاسانی دەتوانێ بیسەلمێنێ، كە ناوەرۆكی وتارەكانیان، یەك مەبەست و یەك ئاڕاستەیە.. ئەویش ناوەرۆك‌و ئاڕاستەی گۆتاری سواوی كلاسیكیە.

بەڕێزان!

بۆ خۆدەرخستن، مەنێرن بە دوای ئۆرگانەكاندا قسەی سواوی بۆ بكەن. كرێی سەیارە مەدەن هەتا شوێنی كۆبونەوەكان قەرەباڵغ بكەن. ئەمڕۆ بواری دیكە زۆرە بۆ ئەوەی گوتارەكانتان بگەیەنن.. بە كورتی دەڵێین: گوتارە سواوەكان واز لێ بهێنن. بڕۆن بخوێننەوە، فێرگەكانی رەخنە شارەزا بن. بە فەلسەفەی سیاسیی نوێ پەروەردە بن. تەكنیكی نوێی میدیا و پەروەردە بەكاربهێنن. كارتان بەوە تەواو نابێ، دەڵاڵی فەیسبوك بەكرێ بگرن بۆ ئەوەی وێنەو هەواڵەكانتان بڵاوبكەنەوە. گرنگ وێنەو هەواڵ نیە. گرنگ ئەو بابەتەیە كە باسی دەكەن. ئەو بۆچونە نوێیانەیە كە دەری دەبڕن. گرنگ تێگەیشتنتانە لە گۆڕانكاریەكانی سەردەمەكە و لە ئەركەكانی سۆسیال-میدیا. ئەوەتا بینیمان ئەو كاربەدەستانەی لە بەغداد و جەزائیر و سودان و لوبنان، دەڵاڵی فەیسبوكیان هەبوو، یان هێزی چەكداری تایبەتیان هەبوو.. یاخود تەكەتولیان هەبوو، ئەوەتا چارەنوسیان دەبینین چیان بەسەر هاتوە. هەتا دەرسیان لێوەربگیرێ. بۆیە، تكایە..

وتاری ئەشكەوت و گوتاری سواو، واز لێ بهێنن.. هۆشتان بێتەوە بەر.. چونكە نەوەی نوێ هۆشی هاتۆتەوە بەر!

1518 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations