چیرۆكی بن عەتیە و رۆناڵدۆ

17.12.2019

لڤین: 
هاوڕێیەكی پێشووی كریستیانۆ رۆناڵدۆ، ستایشی ئاستی بەرزی رۆناڵدۆ دەكات و دەڵێت ئەو یاریزانە هەموو ژیانی خۆی بۆ راهێنان و یاریكردن تەرخان كردووە و ئەو تەنمها رۆژێك ناتوانێت بێ راهێنان بەسەر بەرێت. 

مەهدی بن عەتیە، یاریزانی مەغریبی یانەی دحێلی قەتەری، باس لە ئاستی بەرزی كریستیانۆ رۆناڵدۆ دەكات و دەڵێت "لە یارییەكدا من و رۆناڵدۆ پێكەوە لەسەر كورسی یەدەگ بووین، راهێنەر یاری پێنەكردین لەبەرئەوەی دوای چەند رۆژێك یارییەكی چامپیۆنزلیگمان هەبوو، كاتی گەڕانەوەمان لەنێو پاسەكەدا من لەگەڵ پیانیش و ماتویدی راوەستابووم، كریستیانۆش لەپێشمان بوو، بە دەنگی بەرزەوە هاواری بۆ من كرد و گوتی چیدەكەی؟ وتم چیدەكەم؟! دەچمە ماڵی خۆم و بەدیار تەلەڤزیۆنەوە دەخەوم". 

ئەو باسی ئەوەش دەكات كە ئەو ئەستێرە مێژوویەی پرتوگال داوای لێكردووە ئەو شەوە پێكەوە بچن بۆ راهێنان و دەشڵێت: كاتژمێر 11ی شەو بوو، زۆر  پێكەنیم، پێموت تۆ بەجددیتە؟ وتی بەڵێ من هێشتا ئارەقەم نەكردووە، پێویستیم بە مەشقێك هەیە، وەرە لەگەڵم، پێموت مەحاڵە وازم لێبێنە من دەڕۆم دەخەوم، سبەی مەشقی زیاتر دەكەین، پێیوتم نەخێر پێویستە من هەموو رۆژێ مەشق بكەم. 

ئەو یاریزانە باس لەوە دەكات كە "من هەمیشە رێزم لە رۆناڵدۆ گرتووە، بەڵام لەدوای ئەو رۆژە زیاتر رێزم لە ئەو دەگرت، چونكە هەموو ژیانی خۆی بە قوربانی تۆپی پێ كردووە".

593 جار بینراوە

copyright 2019, All Rights Reserved Developed by TeraTarget for Digital Intelligence and IT Innovations