پۆلیس روونكردنەوە لەسەر دۆسیەی دەستدرێژیكردنە سەر كچە هەشت ساڵانەكە دەدات

20.02.2020

لڤین:  
لەسەر دۆسیەی دەستدرێژیكردنە سەر كچێكی تەمەن هەشت ساڵانە و داواكردنی تەنازول لە باوكی كچەكە پۆلیسی هەولێر روونكردنەوەیەك بڵاودەكاتەوە و ئاشكرای دەكات داوای وایان لەو سكاڵاكارە نەكردووە. 

دوای ئەوەی باوكی كچێكی تەمەن 8 ساڵان رایگەیاند دەستدرێژیی سێكسی كراوەتەوە سەركچەكەی، ئێستاش هەڕەشەی لێدەكرێت بۆ ئەوەی تەنازول بكات لە سكاڵاكەی بەڵام پۆلیس رەتیدەكاتەوە ئەو داوایەیان كردبێت و دەشڵێت: هەر ئەفسەرێكیش هەڕەشەی كردبێت، مافی كەسی بەرامبەرە ڕووبەڕووی یاسای بكاتەوە.

پۆلیسی هەولێر، لە ڕوونكردنەوەیەكدا دەڵێت "سەرلەبەری بابەتەكە ڕەت دەكەینەوە، سەرەڕای ئەوەی پەڕاوی كەیسەكەمان كۆتایی پێهێناوە و ڕەوانەی دادگامان كردووە". 

ئەوەش دوای ئەوەهات ساڵی ڕابردوو باوكی ئەو چە رایگەیاند لە رۆژی 3ی نیسانی 2019 لەلایەن سێ كەسەوە دەستدرێژی كراوەتە سەركچەكەی كە تەمەنی 7 ساڵان بووە، بەڵام بە وتەی باوكی كچەكە تۆمەتبارەكان ئازادكراون و هەڕەشەشی لێكراوە داوا یاساییەكەی بكشێنێتەوە.

پۆلیسی هەولێر، بە پێچەوانەی وتەی باوكی قوربانییەكەوە، باس لەوە دەكات سێ كەسیان دەستگیركردووە و ڕووبەڕووی یاسایان كردووەتەوە "سەرەڕای ئەوەی دەستەی سەربەخۆیی مافی مرۆڤیان لە سات بە ساتی لێكۆڵێنەوەكان ئاگادار كردووەتەوە و زانیاریی تەواویان لەسەری هەیە". 

ئاماژەی بەوەشدا، "ئەگەر هەر پۆلیس و ئەفسەرێك هەڕەشەی تەنازولكردنی كەیسەكەی لە هەر دادخوازێك كردبێت، مافی خۆیەتی بە بەڵگەوە داوایی یاسایی لەسەر تۆماربكات". 

1081 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations