ژووری ئۆپەراسیۆنەكانی هەولێر 12 بڕیاری نوێی دەركرد

25.10.2020

لڤین: 
ژووری ئۆپەراسیۆنی پارێزگای هەولێر 12 بڕیاری نوێی دەركرد و لیژنەی گەڕۆك پێكدەهێندرێت بۆ ئەوەی لێكۆڵینەوە لە بەستنی ماسك بكەن و چەند شوێنێكی كاركردنیش دادەخرێن. 


ژووری ئۆپەراسیۆنەكانی پارێزگای هەولێر بڕیاریدا، سەرجەم هاوڵاتییانی سنوری پارێزگای هەولێر، (دەمامك) ببەستن، هەركەسێك (دەمامك)نەكات، ڕێكاری یاسیایی لەبەرمبەر دەگیرێتەبەر. 

دەقی راگەیەندراوەكە: 

ڕاگەیندراوێك لە ژووری ئۆپەراسیۆنی پارێزگای هەولێر


ئێوارەی ئەمڕۆ یەكشەمە 2020.10.25، لەدیوانی وەزارەتی ناوخۆ، بەسەرپەرشتی بەڕێز ڕێبەر ئەحمەد وەزیری ناوخۆی حكومەتی هەرێمی كوردستان و بەئامادەبوونی بەڕێزان هێمن قادر، پارێزگاری هەولێر بەوەكالەت و مەسعود كاڕەش جێگری پارێزگار و ئەندامانی ژووری پۆپەراسیۆن و سەرجەم قایمقامەكانی سنووری پارێزگای هەولێر و سەرۆكی شارەوانی و بەڕێوەبەری گشتیی شارەوانییەكان، ژووری ئۆپەراسیۆنی پارێزگای هەولێر كۆبۆوه، كۆبوونەوە بەپشتبەستن بە بەیانی ژمارە(52)ی ساڵی 2020ی وەزارەتی ناوخۆی حكومەتی هەرێمی كوردستان، گەیشتە ئەم بڕیارانەی لای خوارەوە:-

یەكەم/ لێژنەی قایمقامیەتەكان و تیمەكانی تەندروستی و شارەوانی و چاودێری بازاڕ و هێزە ئەمنییەكان، ڕاسپێردراون بەجێبەجێكردنی ئەو بڕیارانە لە سنووری پارێزگای هەولێر.

دووەم/ دەبێت سەرجەم هاوڵاتییانی سنوری پارێزگای هەولێر، بەڕەچاوكردنی ڕێكارەكانی خۆپارێزی لەڤایرۆسی كۆرۆنا (دەمامك) ببەستن، هەركەسێك ڕەچاوی بەستنی (دەمامك)نەكات، بەپێی ئەو میكانیزمەی لەكۆبوونەوە بڕیاری لەسەر دراوە، ڕێكاری یاسیایی لەبەرمبەردا دەگیرێتەبەر.

سێیەم/ پێكهێنانی مەفرەزەی گەڕۆك لەهێزە ئەمنیەكان بۆ چاودێریكردنی جێبەجێكردنی ڕێنماییە تەندروستییەكان و ڕێكارەكانی خۆپارێزی لەكۆرۆنا و بەستی (دەمامك) لەشوینە گشتییەكانی كۆمەڵگا و قەزا و ناحییەكانی سنوری پارێزگای هەولێر.

چوارەم/ شۆفێری ئۆتۆمبێلەكانی (تایبەت، بارهەڵگر، كرێ) دەبێت پابەندی ڕێنماییە تەندروستییەكان و ڕێكارەكانی خۆپارێزیبن و لەكاتی هەبوونی سەرنشین لەگەڵیان پێویستە شوفێر و سەرنشین (دەمامك) ببەستن، هەر كەسێك سەرپێچی بكات، ڕووبەڕووی ڕێكاری یاسایی دەبێتەوە.

پێنجەم/ ئەم شوێنانە دادەخرێن:-
(هۆڵەكانی ئاهەنگ گێران، هۆڵەكانی بووك گواستنەوه، ئاهەنگی دەرچووانی قوتابیانی زانكۆ و پەیمانگا ئەهلی و حكومەیەكان، سەرجەم چالاكی خولە وەرزشییەكان‌، هەموو جۆرە گردبوونەوە و كۆنفرانس و كۆبوونەوەیەك) 

شەشەم/ ئەم شوێنانە لەكاتژمێر 12ی شەو دادەخرێن:-
(یانەی شەوانە، نێرگەلەكێشان، یانەكانی مەی خواردنەوە (بار)، موزیك لایف، ئاهەنگی شەوانەی یانەكان)

حەوتەم/ (پرسەدانان لە (هۆڵ-ماڵ-ژێرخێوەت)، مەراسیمی سەرقەبران) بەداخراوی دەمێنیتەوە، بنكەی پۆلیس و موختاری گەڕەك بەرپرسیارن، هەركەسێك پابەندنەبێت، ڕوبەڕووی ڕێكاری یاسایی دەبێتەوە.      

هەشتەم/ هەموو ئەو شوێنانەی كراوەن، پێویستە تەواوی مەرجە تەندروستییەكان جێبەجێ بكەن لەبەستنی دەمامك و دروست نەكردنی قەرەباڵغی، لەهەرشوێنێكی (بازرگانی، بازار، دوكان، ماركێت، مۆڵ، چێشتخانە) رێنماییە تەندروستیەكان و ڕێكارەكانی خۆپارێزی بەتایبەتی بەستنی (دەمامك)جێبەجێ نەكرێت، دەست بەجێ ئەم شوێنە ڕێكاری یاسایی لەبەرامبەردا دەگیرێتەبەر و شوێنەكە دادەخرێت.   

نۆیەم/ هاوینە هەوار و شوێنە گەشتییاریەكان، دەبێت ڕەچاووی ڕێكارەكانی خۆپارێزی بكەن و خۆیان و گەشتییاران پایەندبن بە بەستنی(دەمامك)، هەرشوێنك پابەند نەبێت، ڕێكاریی یاسایی لەبەرامبەردا دەگیرێتەبەر.

دەیەم/ بەهۆی بەرزبوونەوەی ئامارەكانی تووشبوون بەڤایرۆسی كۆرۆنا لەهەرێمی كوردستان بەگشتیی، داوامان لە بەڕێز وەزیری ناوخۆی حكومەتی هەرێمی كوردستان كردووە، لەكۆبونەوەی لێژنەی باڵای ڕوبەڕوبوونەوەی كۆرۆنا، لەگەڵ بەڕێزان وەزیری پەروەردە و وەزیری خوێندنی باڵا، پێداچوونەوە بەدەوامی قوتابخانەكان و كۆلێژ و پەیمانگاكان و ناوەندەكانی خوێندن بكرێت.

یانزەهەم/ داوا لەمامۆستایان و پیاوانی ئاینی و یەكیتی زانایانی ئاینیی پیرۆزی ئیسلام دەكەین، هەروەك چۆن لە ڕابردوودا هاوكارمان بوونە، بەهەمانشێوە هاوكارمانبن بۆ هۆشیاركردنەوەی نوێژخوێنان كەپابەندی ڕێنماییە تەندروستییەكانبن و بەهیچ شیوەیەك ڕێگە بەخۆیان نەدەن بەبێ بەستنی (دەمامك) بڕۆنە ناو مزگەوت و شوێنە ئاینییەكان. 

دوانزەهەم/ سەرجەم بازگەكانی سنوری پارێزگای هەولێر ئاگادار دەكەینەوە، ڕێگە بەهیچ گروپێكی گەشتییاری و كەسێك نادرێت بەبێ بەستنی (دەمامك) داخڵی سنوری پارێزگای هەولێر بێت.

ئەم بڕیارانە لە كاتژمێر 12ی شەوی 26 لەسەر27ی 10ی 2020، دەچێتە واری جێبەجێكردنەوە.

ژووری ئۆپەراسیۆنی پارێزگای هەولێر
2020.10.25

393 جار بینراوە

copyright 2019, All Rights Reserved Developed by TeraTarget for Digital Intelligence and IT Innovations