پارەی جاشەكان وەردەگرینەوە

18.06.2019

لڤین: حەمە نوری
ساڵی ١٩٨٧محەمەد شێخەلی بوو بە وەزیری ناوخۆی عێراق،كۆمەڵێك بڕیاری قورسی دەركرد لەوانە قەدەغەكردنی قوماركردن و كەمكردنەوەی یانەكانی شەوانە.بۆ چۆنێتی جێبەجێكردن كۆبونەوەیەكی لەگەڵ سەرجەم بەرپرسە باڵاكانی پۆلیس لە عێراقدا رێكخست ، من وەك جێگری بەڕێوەبەری پۆلیسی هەولێر بەشداریم كرد ،پاش قسەكردنن،هاتە سەرەی من ، وتم جەنابی وەزیر زۆربونی قومار خەتای حكومەتە، چونكە رێی دەدا لە چەند هۆتێلێكی گەورەدا لە بەغدا وەك شیراتۆن ومیریدیان و بابل قوماربكرێت ،كە قسەكانم تەواو كرد جەنابی وەزیر پێی وتم :تۆ لەكوێیەوە هاتووی ؟منیش وتم من عەقید محەمەد محێدینم و جێگری بەڕێوەبەری پۆلیسی هەولێر ، وتی كوردی ؟بەڵێ.
وتی جەنابی عەقید ئێمە بۆیە رێگری ناكەین لەو قومارخانانە ،بۆیە ئەو موستشار و جاشانەی ئێوە كە پارەی باش لە حكومەت وەردەگرن بگەڕێتە بۆ خەزینەی دەوڵەت ،چونكە ئەو قارەمانانەی ئێوە هەموو هەفتەیەك لێرە خەریكی قومار كردنن
..
چۆن شاكر فەتاح كوژرا؟

لە لەیانزەی مانگەوە بۆ ١٣ئازاری ساڵی ١٩٨٨ لەهەولێر هەموان بانگیشتكراین بۆ كۆنفرانسێك بەناوی (گەلی كورد لە ویژدانی سەرۆك سەدامدا)،هەمووی هەڵسا دەستیانكرد بە قسەكردن و مەدحكردن ،تەنها پیاوێكی بەتەمەن كە ئەویش نوسەر شاكر فەتاح بوو هەستا وتی(دەبێت دەستبكرێتەوە بەگفتوگۆ لەگەڵ ئەو شۆڕشگێڕ وپێشمەرگانەی لەشاخن ، دەبێت راگواستن وكوشتنی دیهاتییەكان رابگیرێت ،دەشبێت زمانی كوردی بەتەواوی فەرمی بكرێت ).
كە قسەكانی تەواوكرد لەهوڵەكە بووبە هوها و قسەپێوتن بەم پیرە نوسەرە ،تەنانەت لەكاتی پشووەكەدا بۆنانخوردن كەس نەیویرا لێی نزیكبێتەوە و هەمووی خۆی دوردەگرت لە شاكر فەتاح. چەند رۆژێك دوای كۆنفرانسەكە شەوی ١٨لەسەر ١٩ دەزگاكانی ئەمن دەچنە سەر ماڵی شاكر فەتاح دەستگیری دەكەن .
لە ٢٧/٦/١٩٨٨بە كتابی ژمارە ١٥٣٩ لە دائیرەی ئەمنی سلێمانییەوە نوسراوێكمان لەگەڵ لاشەكەیدا بۆهات لە نوسراوەكە هاتووبوو (لاشەی یەكێك لە تێكدەرەكانی وڵاتان بۆ دەنێرین و خۆتان بەیانی وەفاتی بۆ دەربكەن).كە تەماشامان كرد لاشەی پێرە پیاوێكی حەفتاساڵە ،لاشەی شاكر فەتاح بوو ،كە بە لەشییەوە دیاربوو تەعزبێكی زۆر خراپ وپیس درابوو
..
كاكلی پارێزگاری سلێمانی چی ووت؟
ساڵی ١٩٩٠هاوڕێم عەقید كاكل حەمەد مەولود بووبە پارێزگاری سلێمانی ، تەلەفونی بۆكردم وتی :دەمەوێت تۆببی بە بەڕێوەبەری گشتی پۆلیسی سلێمانی ،پێم وت :رەنگە نەهێڵن ،وتی من هەوڵت بۆ دەدەم . چەندین هەوڵیدا بەس سەری نەگرت.خێری پێوەبوو چونكە پاش ساڵێك راپەڕینەكە بوو ،هەموو بەرپرسە گەورەكان كوژران ،ئەوەی جی داخ بوو لای من شەهیدبونی كاكل و هەردوو كوڕەكەی بوو بەناوی نەریمان وپشتیوان .
..
كێ ئیدریس بارزانی پاراست؟
لە ٦/١٢/١٩٧٠ بۆ شەوەكەی لەبەغدا ئیدریس بارزانی هەوڵی تیرۆركردنی درا ،بەڵام دەربازبوو.پێشتر یدوڵا فەیلی كە بەرپرسی لقی بەغدای پارتی بوو زانیاریی بیستوبوو كە هەوڵێكی لەوجۆرە هەیە،بۆیە هەرزوو مەلامستەفای ئاگاداركردبووە ،ئەوانیش هەموو رێیوشوێنێكی ئەمنییان گرتوبوە بەر،هەرچەندە لەپاڵ ئەوەشدا بەڵام شۆفێرەتایبەتەكەی ئیدریس بارزانی بە موعجیزە توانی دەربازی بكات 
..
وەزیر رۆژنامەی پێ نادرێت
ساڵی ١٩٨٥ مەلامەسعود بێ بەش و شێخ لەتیفی بەرزنجی چووبوونە لای عەبدوڵا ئیسماعیل كە كوردبوو وەزیری دەوڵەت بوو ، ئۆفیسەكەی لە وەزارەتی پلاندانان بوو.داوایان لێكردبوو كە هەوڵم بۆ بدات وبمكەن بە بەڕێوەبەری گشتی پۆلیسی هەولێر . كاتی بینینیان بۆدیاریكردم ،منیش چووم بۆلای ، دانیشتم و دەستمانكرد بە قسەكردن ،لەوكاتەدا بەرپرسی نوسینگەكەی بانگكرد وتی كوا رۆژنامەكان ،ئەویش وتی جەنابی وەزیر پرسگەكە پێی وتووم رۆژنامە بۆ وەزیری دەوڵەت نییە .توڕەبوو وتی ئێستا چارەسەریان دەكەم. ئەو رۆژنامەی نادرێتێت ئاخۆ چۆن من دەكات بە بەڕێوەبەری گشتی پۆلیسی هەولێر .
(تەماشاكە وەزیرەكوردەكان لەبەغدا لەسەردەمی سەدام چەندە بێ دەسەڵات بوون)
..
كۆمەڵێك زانیاری ورد لەسەر روداوەكانی هەشتاكان و شێخ بەهرام و كۆمەڵێك مستەشار وكۆمەڵێك مەلەفدار تێیدایە لەوكاتەی راپەرینەكەی هەولێریش دەبێت ساڵی ١٩٩١ ئەم بەڕێوەبەری پۆلیسی هەولێر بووە ،بۆیەزۆر نهێنی باس دەكات،ئەمانە هەمووی لە یاداشتەكانی لیوای پۆلیس محێدین محەمەد یونسدایە ،كە لەهەشتاكاندا بەڕێوەبەری پۆلیسی هەولێر ودواتر نوێنەری وەزارەتی ناوخۆ بووە دوایی ئەندامی دادگای تەمیزی هێزە ئەمنییەكان بووە .

2139 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations