ترەمپ و هۆكارەكانی پاشگەزبوونەوە لە بڕیاری هێرشی سەر ئێران

23.06.2019

لڤین: سەروەت هەڵەبجەیی

لە ڕۆژانی ڕابردوو بە تێكشكانی فڕۆكە بێ فڕۆكەوانە ئەمریكییەكە، ئاڵۆزییەكانی نێوان تاران و واشنتن گەیشتە لوتكە. بەدەر لەو هەموو شرۆڤە و لێكدانەوەیە كە بۆ ئەم ڕووداوە كرا، دوناڵد ترەمپ سەرۆك كۆماری ئەمریكا ڕایگەیاندووە كە فەرمانی هێرشی سەربازیی بۆ سەر ئێران دەركرد و لە دوا خولەكەكانی لێی پاشگەز بووەتەوە. لە ڕاستیدا هۆكار چییە كە سەرۆكی ئەمریكا بڕیاری لەو شێوەیە دەردەكات و دواتر بڕیارەكەی هەڵدەوەشێنێتەوە، لە كاتێكدا كە هەموو ئامادەكارییەكیش بۆ ئەو هێرشە و ئامانجەكانی كرا بوو.

ترەمپ ئەوەی نەشاردووەتەوە كە نیازی هەڵبژاردنەوەی لە خولی دووەمی سەرۆكایەتی ئەمریكادا هەیە، تەنانەت ڕایگەیاندبوو كە خەڵكی وڵاتەكەی پێیان باشە پاش دوو خولیش ناوبراو هەر لە كۆشكی سپیدا بمێنێتەوە. ئەوەی كە ترەمپ دەڵێت هێرشەكانی لە ئەگەری زۆربوونی ژمارەی كوژراوەكانی هەڵوەشاندووەتەوە، دوورە لە ڕاستی. ناوبراو بە چەندین جار گەلی ئێرانی بە تیرۆریست ناو بردوو و بەشێك لە هێزە چەكدارە فەرمییەكانی ئەم وڵاتەشی وەك گرووپە تیرۆریستییەكان ناساندووە، هەر بۆیە بە لایەوە گرنگ نییە هێرشەكانی ئەمریكا چەندە قوربانیی لێدەكەوێتەوە.

ڕەنگە سەرەتای ئەو شەڕە بە دەستی ئەو و بڕیار بەدەستەكانی دیكەی كۆشكی سپییەوە بێت بەڵام كۆتاییەكەی لە ژێر دەستی ئەواندا نامێنێت. ئەمەش بە پێچەوانەی درووشمەكانی ترەمپە لە هەڵمەتی بانگەشەی هەڵبژاردنەكانی پێشوو

نزیكبوونەوەی وادەی هەڵبژاردنەكانی ئەمریكا و دژایەتی هەڵگیرسانی شەڕ لە لایەن خەڵكی ئەم وڵاتەوە بە هۆكارێكی گرنگ لە پاشگەزبوونەوەی ترەمپ لە بڕیارەكەی دادەنرێت، ئەمریكییەكان نایانەوێت وڵاتەكەیان ساڵانێكی دیكە بە شەڕی ڕۆژهەڵاتی ناوەڕاستەوە سەرقاڵ بێت.

سەرۆك كۆماری ئەمریكا ئەوەش دەزانێت كە ڕەنگە سەرەتای ئەو شەڕە بە دەستی ئەو و بڕیار بەدەستەكانی دیكەی كۆشكی سپییەوە بێت بەڵام كۆتاییەكەی لە ژێر دەستی ئەواندا نامێنێت. ئەمەش بە پێچەوانەی درووشمەكانی ترەمپە لە هەڵمەتی بانگەشەی هەڵبژاردنەكانی پێشوو. ئەو ئێستا بە ئابوری ئەمریكا لە سەردەمی سەرۆكایەتی خۆی شانازی دەكات بەڵام شەڕی دژ بە ئێران لە ڕۆژهەڵاتی ناوەڕاست ڕەنگە ئەو كار‌تەی دەستی بۆ سەر لە نوێ هەڵبژاردنەوەی لە ناو ببات، هەر بۆیە سەرۆك كۆماری ئەمریكا بەم هەلومەرجەوە لە بەرژەوەندیدا نەبووە ئەو شەڕە بكات.

لە لایەكی دیكەوە، تێكشكانی فڕۆكە بێ فڕۆكەوانە ئەمریكییەكە لە لایەن ئێرانەوە بە بۆچوونی شارەزایانی سەربازی گوزارشت لە بەهێزبوونی ئەم وڵاتە دەكات. ئێران ئەوەی نەشاردووەتەوە كە توانای مووشەكی زۆری هەیە و چەندین جار شاری مووشەكی ژێرزەوینی لە لایەن سوپای پاسدارانەوە نمایش كرا، هەر ئەم هێزەش وایكردووە كە وڵاتانی ئەورووپی و ئەمریكا دەیانەوێت لە ڕێكەوتنێكی نوێدا پرسی مووشەكیش بخرێتە دانوستانەوە و هێز و مەودای ئەو مووشەكانەی ئێران كەم بكرێتەوە.

ئەمریكا كۆمەڵە بنكەیەكی سەربازیی لە وڵاتانی ناوچەكە وەك عێراق، كوێت، بەحرەین، قەتەر، ئەفغانستان و ... هەیە كە هەموویان لە ئێرانەوە هێندە دوور نین كە دەستی مووشەكەكانی ئەم وڵاتەیان پێنەگات. بەرپرسانی سەربازی ئێران بە تایبەت فەرماندە باڵاكانی سوپای پاسداران بەردەوام ئەوەیان ڕاگەیاندووە كە ئەو بنكە سەربازییانە لە وڵاتانی ناوچەكە لە ژێر مەترسی هەر هێرشێكی مووشەكی ئێراندا دەبن ئەگەر ئەمریكا لە دژی وڵاتەكەیان پەنا بۆ وەشاندنی گورزی سەربازی ببات. بەدەر لەمەش هێزی دەریایی ئەمریكا لە ئاوەكانی نزیك لە ئێراندان و ئەمەش بە هەمان شێوە دەتوانێت ئامانجێك بۆ لێدانی مووشەكی لە لایەن تارانەوە بێت.

 گرنگی سەعوودیا بۆ ئەمریكا ڕەنگە زیاتر بۆ ئاسایشی جیهانی وزە بێت. ئەم وڵاتە خاوەنی ڕۆژانە دە ملیۆن بەرمیل نەوتە و ئەگەر هەر كێشەیەك لەم بوارەدا ڕوو بدات بازاڕی جیهانی وزە بە تایبەت نەوت ڕووبەڕووی كێشەی جیدی دەبێتەوە 

گەر سەیری دوو هاوپەیمانی سەرەكی ئەمریكا واتە سەعوودیا و ئیسرائیلیش لە ناوچەكە بكەین بەهەمان شێوە لە لایەن ئێران و گرووپەكانی نزیك لەم وڵاتەوە هەڕەشەیان لە سەرە. حیزبووڵای لۆبنان بە پاڵپشتی ئاشكرای ئێران بووەتە دوژمنێكی ڕاستەقینەی ئیسرائیل. ئەگەر ئەو هێزە تاو دوێنێ توانایەكی ئەوتۆی نەبوو بەڵكوو ئێستا و بە تایبەت لە پاش هەڵگیرسانی شەڕی سوریا و نزیكبوونەوەی زیاتر لە ئێران لەو وڵاتە، بووەتە خاوەن هێزێكی زۆر و شارەزا نێودەوڵەتییەكان توانا مووشەكییەكانی حیزبووڵا بە هەڕەشەیەكی جیدی لە سەر تەل ئەبیب دەزانن. ئەمریكا بەردەوام خۆیی بە بەرپرسیاری پاراستنی ئاسایشی ئیسرائیل ناو بردووە و نایەوێت بە هێرشێكی سنورداری سەربازی لە دژی ئێران، شەڕی گرووپەكانی نزیك لە ئێران لە نزیك ئیسرائیل دەست پێ بكات.

بە هەمان شێوە سەعوودیاش هاوپەیمانێكی سەرەكی ئەمریكایە لە ناوچەكە. گرنگی سەعوودیا بۆ ئەمریكا ڕەنگە زیاتر بۆ ئاسایشی جیهانی وزە بێت. ئەم وڵاتە خاوەنی ڕۆژانە دە ملیۆن بەرمیل نەوتە و ئەگەر هەر كێشەیەك لەم بوارەدا ڕوو بدات بازاڕی جیهانی وزە بە تایبەت نەوت ڕووبەڕووی كێشەی جیدی دەبێتەوە و ئەمەش ئەو بابەتەیە كە هاوپەیمانەكانی دیكەی ئەمریكا وەك وڵاتانی ئەورووپی پێی ڕازی نابن. هەر ئێستاش حەوسییەكانی یەمەن بە مووشەكەكانی خۆیان كێشەیان بۆ سەعوودیا خوڵقاندووە و بە هەڵگیرسانی شەڕی دژ بە ئێرانیش بە دڵنیاییەوە دەسەڵاتدارانی تاران وەڵامیان بۆ سەعوودییەكان دەبێت و ئەمەش كاریگەریی لە سەر بەرژەوەندییە ئابورییەكانی بەشێكی زۆر لە وڵاتانی جیهان بە هۆی كێشەكانی بازاڕی وزە و هەڵكشانی كەم وێنەی نرخی نەوتەوە دەبێت.

ئەگەر ترەمپ ڕایگەیاندووە كە پاشگەزبوونەوەی لە بڕیاری هێرشكردنە سەر ئێران تەنیا بە هۆی بەرزبوونی ژمارەی قوربانیانە، بە خوێندنەوەی هەر كەسێكی شارەزا دەتوانێت هەڵە بێت، بە پێچەوانەوە كۆمەڵە هۆكارێكی ناوخۆیی و نێودەوڵەتی كاریگەرییان لە سەر بڕیارەكەی سەرۆك كۆماری ئەمریكا هەبووە كە تەنانەت باس لەوەش دەكرێت سەرۆك وەزیرانی كەنەدا و كەسانی دیكەش بۆ ئەمە لە گەڵ ترەمپ پەیوەندییان هەبووە.

693 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations