مەزهەری خالقی دەگەڕێتەوە بۆ سنە

01.07.2019

لڤین:

پارێزگاری ( سنە )ی خۆرهەڵاتی كوردستان ڕایگەیاند كێشەی ڤیزای هونەرمەند مەزهەر خالقی، چارەسەر بووە‌و دەگەڕێتەوە شاری سنە.

ئاژانسی میهری ئێرانی،لە هەواڵێکیدا ڕایگەیاند بەهمەن موراد نیا، پارێزگاری سنە كۆنفرانسێكی ڕۆژنامەوانیدا لە زانكۆی كوردستان، ڕایگەیاندووە"لەبەرئەوەی مەزهەر خالقی پاسپۆرتی عێراقی یان ئێرانی نەبووەو تەنیا پاسپۆرتی بەریتانیایی هەبووە، كێشە بۆ دەركردنی ڤیزاكەی دروستبووە‌و بە خۆشحاڵیەوە كێشەكە لە ئێران چارەسەربووە".
هەروەها ڕایگەیاندووە" هەوڵی بەردەواممان دا بۆ چارەسەریی كێشەی ڤیزای مامۆستا خالقی‌و بە هاوكاری وەزارەتی دەرەوەی ئێران بەیانی ئەمڕۆ هەواڵیان پێم دا كە ڤیزایان بۆ دەركراوە".
راشگەیاند هاتنەوەی مامۆستا مەزهەر خالقی دوای ۳۸ ساڵ بۆ شاری سنە ، زێدی لە دایكبوونی، جێگای خۆشحاڵی هەمووانە‌و سنە باوەشی بۆ مامۆستا خالقی كراوەیە.
بڕیارە ئێوارەی ئەمڕۆ دووشەممە مەزهەر خالقی بە هاوڕێیەتی جەمیل ڕۆستەمی دەرهێنەری ناسراوەی كورد لە سلێمانیەوە بگاتە شاری سنە.

گەڕانەوەی مامۆستا مەزهەر خالقی بۆ سنە لەسەر بانگهێشت و داخوازی بەڕێوەبەرانی كۆنگرەی ناودارانی كوردە كە بڕیارە ۱۱ و ۱۲ی پووشپەڕ لە زانكۆ كوردستان بەڕێوەبچێت.

لەو كۆنگرەیەدا ڕێز لە ٣٠ هونەرمەندو بلیمەتی ناوداری كورد لە بوارە جۆراوجۆرەكانی زانست، هونەر و فەرهەنگ و وەرزش و ئەدەبیات دەگیردرێت كە یەكێكیان مەزهەر خالقیە.

744 جار بینراوە

copyright 2019, All Rights Reserved Developed by TeraTarget for Digital Intelligence and IT Innovations