میسی هێرشی كردە سەر یەكێتی تۆپی پێی ئەمریكای باشور و ناوبژیوانی یاریەكەیان

03.07.2019

لڤین: 
میسی لە ئاستی تیپەكەی لەبەرامبەر بەرازیل رازی بوو رەخنەی توندی لە ناوبژیوانی یاریەكە گرت و داوای كرد فیدراسیۆنی تۆپی پێی ئەمریكای باشور هەڵوێستی هەبێت هەرچەندە پێشیوایە كە بەرازیل كۆنتڕۆڵی بریاری یەكێتیەكەی كردووە. 

لیۆنێل مێسی، ئەستێرە هەڵبژاردەی ئەرجەنتین، دوای شكستەكەی بەیانی ئەمڕۆ لەبەرامبەر هەڵبژاردەی بەرازیل رەخنەی توندی لە ناوبژیوانی یاریەكە گرت وتی "لەم پاڵەوانێتییەدا ناوبژیوانان زۆر پەنایان دەبردە بەر ڤار، بەڵام ئەوەی لە یاری ئەرجەنتین و بەرازیلدا روویدا مایەی پێكەنین بوو".

سەركردەی ئەرجەنتینیەكان وتیشی "ناوبژیوان پەنای نەبردە بەر ڤار، كە ئێمە 2 لێدانی سزامان هەبوو، یەكێكیان بەر لە گۆڵی دووەمی بەرازیل بوو، ئەوەی دیكەشیان پاڵپێوەنانێكی ئاشكرابوو لە دژی ئۆتامێندی".

هەڵبژاردەی ئەرجەنتین بە 2 گۆڵی بێبەرامبەر بە بەرازیل دۆڕا ئەرجەنتینییەكان داوای دوو لێدانی سزایان دەكرد، بەڵام ناوبژیوان گوێی بە داواكاریەكەیان نەدا و سەیری ڤاری نەكردەوە. 

ئەو ئەستێرە ئەرجەنتینیە وتیشی"هیوادارم فیدراسیۆنی تۆپی پێی ئەمریكای باشوور هەڵوێستێكی توندی لەدژی ئەو ناوبژیوانانە هەبێت، كە دەبنە هۆكاری ناهاوسەنگی لەنێو یاریگەدا بەهۆی لایەنگریكردن بۆ لایەك، هەرچەندە پێموایە قسەكانی من هیچ سوودیان نابێت، چونكە بەرازیل كۆنترۆلی كارەكانی فیدراسیۆنەكەی كردووە، كارەكە ئاڵۆزە ".

میسی بە نیگەرانیەوە ئاماژەی بەوە كرد كە "ناوبژیوان هیچ رێزێكی لە ئەرجەنتین نەگرت، من قسەم لەگەڵی كرد و پێیوتم من رێز لە ئەرجەنتین دەگرم، بەڵام من ئەوەم نەبینی".

كاپتنی ئەرجەنتین، باسی لەوەشكرد "ئەرجەنتینییەكان هەر بەریەك كەوتنێكیان هەبوایە ناوبژیوانەكە یەكسەر كارتی زەردی پێدەدان، كەچی چاوپۆشی كرد لە هەژماركردنی چەندین هەڵەی ئاشكرای بەرازیلییەكان لەدژی یاریزانەكانمان".

896 جار بینراوە

copyright 2019, All Rights Reserved Developed by TeraTarget for Digital Intelligence and IT Innovations