نهێنییه‌ ڕه‌شه‌كانی ڕه‌ققه‌

03.07.2019

لڤین: بی بی سی 
گواستنه‌وه‌ی سه‌دان چه‌كداری داعش و خێزانه‌كانیان به‌ ئۆتۆمبێله‌ بارهه‌ڵگره‌كه‌ی و وه‌رگرتنی پاره‌یه‌كی زۆر بۆ ئه‌بوو فه‌وزی به‌ واتای كارێكی نوێ و پڕقازاج دێت.

هاتنی سه‌دان چه‌كدرای داعش به‌ گوژمه‌ بۆ ناو دوكانه‌كه‌ی و خاڵیكردنه‌وه‌ی سه‌رجه‌م ڕه‌فه‌كانی له‌ دۆخێكی پڕ قه‌یراناوی وه‌ك دۆخی گونده‌كه‌ی ئه‌وان بۆ محه‌مه‌د به‌ واتای ڕۆژێكی باش و گیرفانێكی پڕ دێت. قاچاخچییه‌تی كردن له‌سه‌ر سنوره‌كان و گواستنه‌وه‌ی یه‌ك مرۆڤ به‌ 600 دۆلار له‌ سوریاوه‌ بۆ توركیا بۆ عیماد به‌ واتای كارێكی پڕ ده‌ستكه‌وت دێت كه‌ له‌وانه‌یه‌ تامی قازانجه‌كه‌ی له‌بیر نه‌كراو بێت. به‌ڵام هه‌موو ئه‌م روداوه‌ سادانه‌ له‌ سیاسه‌تدا واتایه‌كی گرنگیان هه‌یه‌ كه‌ ڕه‌نگه‌ چاره‌نوسی سه‌دان و هه‌زاران مرۆڤ بگۆڕێت،  ئه‌ویش "ڕێككه‌وتن"ه‌، ڕێككه‌وتن بۆ راگواستنی سه‌دان چه‌كداری داعش و خێزانه‌كانیان له‌ ڕه‌ققه‌ به‌ نهێنی".

لێره‌وه‌ ئیتر ئێمه‌ گه‌شتێكی كه‌مێك دورودرێژ ده‌ستپێده‌كه‌ین بۆ بینینی دیمه‌نی راستی گواستنه‌وه‌ی سه‌دان چه‌كداری داعش و خێزانه‌كانیان له‌ ڕه‌ققه‌وه‌ بۆ شوێنی جیاواز كه‌ ڕه‌نگه‌ زۆركات باوه‌ڕكردن پێیان قورسبێت.

 له‌مه‌یدانێكی چاككردنه‌وه‌ی ئۆتۆمبێلداین له‌ ته‌بقه‌ كه‌ عه‌رزه‌كه‌ی داپۆشراوه‌ به‌ گریس. دارێكی دارخورمای تێدایه‌. له‌ژێر داره‌كه‌دا سێ كوڕ سه‌رقاڵی چاككردنه‌وه‌ی مه‌كینه‌ی لۆرییه‌كن و هه‌موو جه‌سته‌یان و قژه‌ ڕه‌شه‌كه‌یان به‌ گریس و ڕۆنی ئۆتۆمبێل داپۆشراوه‌. له‌ نزیك ئه‌وانیشه‌وه‌ كۆمه‌ڵێك شۆفێر وه‌ستاون. ئه‌بوو فه‌وزی، سه‌ركرده‌ی هه‌موویانه‌. چاكه‌تێكی سوری له‌به‌ردایه‌ و له‌لای لۆرییه‌ سوره‌كه‌یه‌وه‌ وه‌ستاوه‌. نزیك بوومه‌وه‌ و چومه‌ لایه‌وه‌، به‌خێرای چا و جگه‌ره‌ی پێشكه‌شكردم. سه‌ره‌تا كه‌ قسه‌م له‌گه‌ڵ كرد له‌باره‌ی گه‌شته‌كه‌مانه‌وه‌ ره‌تیكرده‌وه‌ كه‌ هیچ قسه‌یه‌ك له‌و باره‌یه‌وه‌ بكات، به‌ڵام دواتر بۆچوونی خۆی گۆڕی و ڕازیبوو قسه‌ بكات.

فه‌وزی یه‌كێكه‌ له‌و شۆفێرانه‌ی كه‌ به‌ڵێنی سه‌دان دۆلاری پێدراوه‌  له‌به‌رامبه‌ر ئه‌نجامدانی كاره‌كه‌ی و هێشتنه‌وه‌ی بابه‌ته‌كه‌ به‌ نهێنی، به‌ڵام بێ به‌ڵێنی ئه‌و كه‌سانه‌ی كه‌ ئه‌وان توشی ئه‌و كاره‌ كردووه‌ وایكردووه‌ چیتر نه‌توانێت ئه‌و نهێنییه‌ بپارێزێت ، له‌به‌ر ئه‌وه‌ به‌ توڕه‌ییه‌وه‌ ده‌ستی به‌ قسه‌كانی كرد و منیش به‌ بێده‌نگییه‌وه‌ گوێم گرت.
پێی وتم:"من و ئه‌م شۆفێرانه‌ به‌ڕاستی توڕه‌ین. ئه‌وه‌ چه‌ند هه‌فته‌یه‌ك  تێده‌په‌ڕێت كه‌ ئێمه‌ سه‌ركه‌شی به‌ ژیانی خۆمانه‌وه‌ ده‌كه‌ین و مه‌كینه‌ی ئۆتۆمبێله‌كانمان تێكده‌شكێنین، به‌ڵام هیچ پاره‌یه‌كمان وه‌رنه‌گرتووه‌. ئه‌و گه‌شتانه‌ وه‌ك ئه‌وه‌ وایه‌ بچیت بۆ جه‌هه‌ننه‌م و بێیته‌وه‌.


سه‌ره‌تا بڕیار وابوو  ئێمه‌ له‌گه‌ڵ هێزه‌كانی سوریای دیموكرات بچینه‌ ناو شاری ڕه‌ققه‌. ئاخر له‌گه‌ڵ ئه‌وان ڕێككه‌وتبووین بۆ گواستنه‌وه‌ی ئه‌م كاروانانانه‌، به‌ڵام به‌ ئێمه‌ ته‌نیا ڕۆیشتین. له‌و ساته‌ی كه‌ چوینه‌ ناو ڕه‌ققه‌ هه‌ستمان به‌ ترس كرد، چونكه‌ كه‌ داخڵی شاره‌كه‌بووین. چه‌كداری داعش-مان بین كه‌ چه‌كیان پێیبوو پشتوێنی بۆمبڕێژكراویان به‌ستبوو. كه‌ گه‌شته‌كه‌شمان ده‌ستپێكرد ئۆتۆمبێله‌كانیان بۆمبڕێژكردین. بۆ ئه‌وه‌ی له‌ ئه‌گه‌ری رودانی هه‌ر هه‌ڵه‌یه‌ك یان لادانێك له‌ ڕێككه‌وتنه‌كه‌ سه‌رجه‌م كاروانه‌كه‌ ته‌نانه‌ت ژن و منداڵه‌كانیشیان بته‌قێننه‌وه‌، چونكه‌ خۆشیان هه‌موویان پشتوێنی بۆمبڕێژكراویان به‌ستبوو".


له‌دوای بیستنی ئه‌م قسانه‌وه‌ی ئیتر ورده‌ ورده‌ گه‌یشتمه‌ ئه‌و بیركردنه‌وه‌یه‌ی كه‌ هێزه‌كانی سوریای دیموكرات ته‌نیا بۆ میدیاكان ڕه‌ققه‌یان ئازاد كردووه‌ و ئاماده‌ش نین راكردنی چه‌كدارانی ده‌وڵه‌تی ئیسلامی بخه‌نه‌ سه‌ر ته‌له‌فزیۆن، چونكه‌ ئه‌م هێزانه‌ زۆر به‌ڕوونی وتیان :"ته‌نیا ژماره‌یه‌كی كه‌می چه‌كدار توانیویانه‌ ره‌ققه‌ به‌جێبهێڵن، ئه‌وانی تر له‌و شاره‌دان و نه‌ڕۆیشتوون". به‌ڵام شۆفێری لۆرییه‌ك به‌ منی وت "ئه‌و قسه‌یه‌ هیچ راست نیه‌".

فه‌وزی دووباره‌ ده‌ستی به‌قسه‌كردن كرده‌وه‌ باسی ژماره‌ی ئه‌و كه‌سانه‌ی بۆ كردم كه‌ له‌ كاروانه‌كاندا له‌گه‌ڵ هاوڕێكانی ده‌یان گوازنه‌وه‌ و وتی "كه‌ گه‌یشتینه‌ ڕه‌ققه‌ وامانده‌زانی ته‌نیا 200 كه‌س هه‌ڵده‌گرین، به‌ڵام ته‌نیا بارهه‌ڵگره‌كه‌ی من 112 كه‌سی تێدابوو . كاروانه‌كه‌ی ئێمه‌ نزیكه‌ی 4 هه‌زار كه‌سی هه‌ڵگرتبوو كه‌ ژن و منداڵیشی تێدابوو. بارهه‌ڵگره‌كانی ئێمه‌ و بارهه‌ڵگره‌كانی ئه‌وان به‌یه‌كه‌وه‌ ڕێمان ده‌كرد". 


له‌دوای ئه‌م قسانه‌وه‌ باسه‌كه‌ ته‌نیا به‌ باسی نێوا من و فه‌وزی نه‌مایه‌وه‌، به‌ڵكو شۆفێره‌كانی تریش هاتنه‌ ناو بابه‌ته‌كه‌ و یه‌كێكیان وتی "كاروانه‌كه‌ی ئێمه‌ درێژییه‌كه‌ی ده‌گه‌یشته‌ شه‌ش بۆ حه‌وت كیلۆمه‌تر. له‌ 50 بارهه‌ڵگر، 13 پاس و زیاتر له‌ 100 ئۆتۆمبێلی ده‌وڵه‌ی ئیسلامی پێكهاتبوو.چه‌ند چه‌كدارێكی داعش كه‌ روخساریان داپۆشرابوو له‌ سه‌ به‌شێك له‌ بارهه‌ڵگره‌دان دانیشتبوون".

ئیر بۆم ده‌ركه‌وت به‌پێی ئه‌و ڕێككه‌وتنه‌ی كه‌ له‌گه‌ڵ داعش كراوه‌ پێویسته‌ ئه‌و چه‌كدارانه‌یان كه‌ ڕاده‌كه‌ن ته‌نیا چه‌كی كه‌سی هه‌ڵبگرن له‌گه‌ڵ خۆیان، به‌ڵام ئه‌وان بێ گوێدانه‌ هیچ شتێك بارهه‌ڵگره‌كان پڕده‌كه‌ن له‌ چه‌ك و گوللـه‌.

له‌دوای ئه‌م قسانه‌ فه‌وزی په‌نجه‌ی بۆ بارهه‌ڵگرێكی ڕه‌نگ سپی راكێشا كه‌ له‌ سوچێكی مه‌یدانه‌كه‌دا وه‌ستابو  وتی "ئه‌كسلی ئه‌م بارهه‌ڵگره‌ شكاوه‌ به‌هۆی قورسی ئه‌و گوللانه‌ی كه‌ لێی باركراوه‌".

ئه‌وه‌ی دوای  بیستنی ئه‌م بابه‌تانه‌ بۆم ئاشكرابوو سه‌یربوو، چونكه‌ زانیم به‌شێكی ڕێككه‌وتنی هێزه‌كانی سوریای دیموكرات و ده‌وڵه‌تی ئیسلامی بریتیه‌ له‌وه‌ی، هیچ ئاڵا و نیشانده‌رێك له‌سه‌ر كاروانه‌كان هه‌ڵنه‌كرێت، چونكه‌ هێزه‌كانی سوریای دیموكرات نایانه‌وێت ئه‌م گه‌ڕانه‌وه‌یه‌ له‌ ڕه‌ققه‌ وه‌ك راكردنێك ده‌ربكه‌وێت. 

به‌ره‌ به‌ره‌كه‌وتمه‌ بیری چه‌ند قسه‌یه‌كی  جه‌یمس ماتیس، وه‌زیری به‌رگری ئه‌مریكا كه‌ جارێكیان له‌ ته‌له‌فزیۆن باسی كرد له‌باره‌ی شه‌ڕی داعش و وتی :"شه‌ڕی دژی داعش (قڕكردنه‌) و مه‌به‌ستی سه‌ره‌كی ئێمه‌ ئه‌وه‌یه‌، ئه‌و چه‌كداره‌ بیانیانه‌ی كه‌ له‌ناو داعشدان ڕزگاریان نه‌بێت و نه‌گه‌ڕێنه‌وه‌ بۆ نیشتیمانه‌كانی خۆیان، له‌ باكوری ئه‌فریقا، ئه‌وروپا، ئه‌مریكا، ئاسیا، و ئه‌فریقا. ئێمه‌ ڕێگا به‌شتێكی ئه‌و جۆره‌ ناده‌ین كه‌ ئه‌وان بیكه‌ن".

له‌به‌رئه‌وه‌، ئه‌م بابه‌ته‌م له‌لای شۆفێره‌كان وروژاند و بۆم ده‌ركه‌وت ئه‌و چه‌كدارانه‌شی كه‌ خه‌ڵكی عێراق و سوریا نه‌بوون به‌ هه‌مانشێوه‌ی چه‌كداره‌كانی تر ڕێگه‌یان پێ دراوه‌ به‌و كاروانانه‌ خۆیان ده‌رباز بكه‌ن. ئه‌وه‌بوو یه‌كێك له‌ شۆفێره‌كان وتی :"ژماره‌یه‌كی زۆری چه‌كداری بیانی كه‌ فه‌ڕه‌نسی، توركی، ئازه‌رباجانی،  پاكسانی، یه‌مه‌نی، سعودی، و چینی، تونسی  و میسریان تێدبوو له‌ كاروانه‌كه‌دابوون".

لێره‌وه‌ ئه‌چینه‌ قۆناغێكی نوێی چیرۆكه‌كه‌مان، ئه‌ویش قۆناغی به‌جێهێشتنی ره‌ققه‌یه‌ پاش ئه‌وه‌ی ئه‌و سه‌دان خێزانه‌ له‌ شێوه‌ی كاروانێكی گه‌وره‌دا سواری ئۆتۆمبێل ده‌كرێن به‌ مه‌به‌ستی راگواستن و رزگاربوویان.، چونكه‌ ئێمه‌ش بووینه‌ به‌شێك له‌ كاروانه‌كه‌.

دوای ئه‌وه‌ی ئه‌م خێزانانه‌ و چه‌كداره‌كانی داعش سواری ئۆتۆمبێل ده‌كرێن ئیتر كاروانه‌كه‌ ده‌كه‌وێته‌ڕێ. رێگای كاروانه‌كه‌ به‌ره‌و باكوری ڕه‌ققه‌یه‌ له‌به‌ر ئه‌وه‌ به‌ته‌نیش كێڵگه‌ی لۆكه‌ و گه‌نمدا تێپه‌ڕبووین و چه‌ند گوندێكی بچوكیشمان تێپه‌ڕاندن. دوای ئه‌وه‌ ڕێڕه‌وی ئۆتۆمبێله‌كانمان گۆڕا بۆ سه‌ر ڕێگای بیابان. هه‌ستمه‌كرد كه‌ ئۆتۆمبێله‌كان ڕۆیشتنیان به‌ره‌به‌ره‌ قورس ده‌بوو، به‌ڵام ئه‌وه‌ی له‌وه‌ قورستربوو ئه‌و به‌رپرسیارییه‌تییه‌بوو كه‌ له‌سه‌ر شانی شۆفێری ئۆتۆمبێله‌كا هه‌بوو. 


له‌م كاته‌دابوو كه‌ ئه‌بوو فه‌وزی قۆڵی بلوزه‌كه‌ی كه‌مێك بۆ من هه‌ڵكرد و باسكی پیشاندام. دیاربوو شوێنه‌واری سوتاوی به‌سه‌ر قۆڵییه‌وه‌ دیاربوو و پێی وتم :"سه‌یركه‌. چیان لێ كردوم. هه‌ر ئه‌مه‌نا، به‌ڵكو له‌ هه‌موو كاروانێكدا كۆمه‌ڵێك بیانی له‌گه‌ڵمان سه‌رده‌كه‌ون كه‌ به‌ (كافر) و (به‌راز) ناومانده‌به‌ن. هه‌ر به‌مه‌شه‌وه‌ ناوه‌ستن و هه‌ره‌شه‌مان لێ ده‌كه‌ن ده‌ڵێن :پێمان بڵێن كه‌ ڕه‌ققه‌تان بونیادنایه‌وه‌ با دووباره‌ بگه‌ڕێیینه‌وه‌. به‌رده‌وامش تاوانبارمانده‌كه‌ن به‌وه‌ی ئێمه‌ ئه‌وانمان له‌ ڕه‌ققه‌ كردووه‌ته‌وه‌ ده‌ره‌وه‌".
له‌گه‌ڵ فه‌وزی له‌م قسانه‌دابووین كه‌ باسی چیرۆكی ژنه‌ چه‌كدارێكی داعش بۆ كردم كه‌ به‌ چه‌كی كڵاشینكۆف هه‌ڕه‌شه‌ی لێ كردووه‌. 


كاروانه‌كه‌ به‌رده‌وامبوو له‌ ڕێكردن تا گه‌یشتینه‌ گوندی شینین. ئه‌م گونده‌ گوندێكی بچوك بوو دوكانێكی تێدابوو. له‌گه‌ڵ گه‌یشتنی كاروانه‌كه‌ سه‌رجه‌م دانیشتوانی گونده‌كه‌ ئاگاداركرانه‌وه‌ كه‌ بچنه‌وه‌ ناو ماڵه‌كانیان و گونده‌كه‌ چۆڵبكه‌ن. دوای ئه‌مانه‌ چه‌كداره‌كانی داعش هاتنه‌ خواره‌وه‌ و به‌ گوژمه‌ ڕژانه‌ ناو دوكانه‌ بۆ ئه‌وه‌ی كه‌لوپه‌ل بكڕن. روخساری هه‌موویان زه‌رد و لاوازبوو. دیاربوو دوای چه‌ند مانگێك له‌ شه‌ڕكردن شه‌كه‌تبوون.
خاوه‌نی ئه‌م دوكانه‌ ناوی محه‌مه‌د بوو، محه‌مه‌د باسی چیرۆكی خۆی له‌گه‌ڵ كاروانه‌كان و چه‌كداره‌كانی داعش بۆ كردم و وتی :"ئه‌مه‌ی كه‌ ده‌كرێت ڕێككه‌وتنی نێوان هێزه‌كانی سوریای دیموكرات و داعشه‌".
ئه‌وه‌شی به‌ چرپه‌وه‌ پێ وتم :"من لایه‌نگری داعش نیم، به‌ڵام هه‌رگیز تامی ئه‌و قازانجه‌م بیرناچێته‌وه‌ كاتێك به‌ تێپه‌ڕینی 4 هه‌زار كه‌س به‌ گونده‌كه‌دا بۆم دێت و سه‌رجه‌م ڕه‌فه‌كانی دوكانه‌كه‌م خاڵی ده‌كه‌نه‌وه‌".
محه‌مه‌د كه‌ به‌هۆی ئه‌و قازانجه‌ی له‌ كاروانه‌كان ده‌یكات روخساری خه‌نده‌ و دڵخۆشی پێوه‌دیاربوو باسی ورده‌كاری هاتنی چه‌كداری ناو كاروانه‌كانی داعشی بۆ من كرد و وتی :"چه‌كدارێكی تونسی پێی وتم، له‌خوا بترسه‌. بۆچی ڕیشت تاشیوه‌. ئێمه‌ جارێكی تر دێینه‌وه‌ و شه‌ریعه‌ت ده‌چه‌سپێنین. منیشی پێم وت. ئێمه‌ هیچ كێشه‌یه‌كمان له‌گه‌ڵ ده‌سه‌ڵاتی شه‌رعه‌ت نیه‌".


ئه‌م خاوه‌ن دوكانه‌ باسی یه‌كێكی تر له‌و چیرۆكه‌ سه‌یرانه‌ی بۆ كردم كه‌ به‌چاوی خۆی له‌ چه‌كدارانی داعش بینیوه‌ و وتی :"ئه‌و چه‌كدارانه‌ی كه‌ داده‌به‌زنه‌ خواره‌وه‌ بۆ شت كڕین چه‌كه‌كانیان ناهێننه‌ ناو دوكانه‌كه‌. به‌هچ شێوه‌یه‌كیش سوكایه‌تی ناكه‌ن و هه‌رگیز بێ پاره‌ش كه‌لوپه‌ل هه‌ڵناگرن. ڕاسته‌ ئه‌وان پیاوكوژن، به‌ڵام هه‌رگیز له‌ بابه‌تی پاره‌دا لاناده‌ن و هه‌رشتێك ببه‌ن پاره‌كه‌ی ده‌ده‌ن. ته‌نانه‌ت زۆرجا كه‌ من سه‌رقاڵم ناتوانم نرخه‌كه‌یان پێ بڵێم خۆیان كه‌ شته‌كه‌یان هه‌ڵگرت پاره‌كه‌ له‌شوێنی داده‌نێن.  به‌ڵام زۆر رقینان له‌ جگه‌ره‌یه‌ كه‌ ده‌یبینن له‌ دوكانه‌كه‌مدا راسته‌وخۆ فڕیده‌ده‌نه‌ ده‌ره‌وه‌". 

له‌دوای ئه‌م قسانه‌ی محه‌مه‌د هه‌مان پرسیارم له‌ شۆفێری لۆرییه‌كانیش كرد له‌باره‌ی ئه‌وه‌ی ئایا چه‌كدارانی داعش له‌ بابه‌تی پاره‌دا چۆن ڕه‌فتار ده‌كه‌ن. شۆفێری لۆری و بارهه‌ڵگره‌كان سه‌رجه‌میان ڕازیبوون و هه‌مان بۆچونیان هه‌بوو كه‌ چه‌كدارانی داعش پاره‌ی هیچ كه‌س ناخۆن. 
ئه‌وه‌ی له‌ناو ئه‌و گونده‌دا هه‌ستم پێكرد جیاوازبوو. هه‌موو گونده‌كه‌ ترس دایگرتبوو. له‌ باكوری گونده‌كه‌ له‌ناو كێڵگه‌یه‌كدا ته‌نیا تراكتۆرێك كاریده‌كرد كه‌ دوكه‌ڵ و تۆزی لم تا ئاسمان به‌رزبووبوویه‌وه‌. ته‌نیا چه‌ند كه‌سێكی كه‌م له‌ گوندنشینه‌كان به‌ده‌ره‌وه‌بوون.وادیاربوو هه‌موویان له‌ناو ترسی ڕزگاركردنی ژیان و ماڵه‌كانیاندا نقومبووبوون ته‌نانه‌ت محه‌مه‌دیش ئه‌و تره‌سه‌ به‌ روخسارییه‌وه‌ دیاربوو . له‌به‌ر ئه‌وه‌ وتی :"ئێمه‌ له‌م چوار بۆ پێنج ساڵه‌ی رابردوودا له‌گه‌ڵ تیرۆر ژیاوین، بۆیه‌ هه‌موان له‌ گه‌ڕانه‌وه‌یان ده‌ترسن. كاتی پێویسته‌ بۆ ئه‌وه‌ی خۆمان له‌م ترسه‌ ڕزگاربكه‌ین".

ئه‌وه‌ی به‌ مێشكمدا هات و نه‌م ئه‌وتوانی پرسیاری لێ نه‌كه‌م جوڵه‌ی هێزه‌كانی هاوپه‌یمانی دژ داعش بوو له‌باره‌ی ئه‌م كاروانانه‌وه‌. كه‌ پرسیم به‌شێك له‌ هاوڵاتییه‌كان پێیان وتم "هه‌ندێك كات له‌دوای تێپه‌ڕینی كاروانه‌كانه‌وه‌ ده‌نگی بۆردومانی فڕۆكه‌كانی هاوپه‌یمانان ده‌بیستین".

هه‌مان پرسیارم له‌ فه‌وزیش كرد، به‌ڵام ئه‌و قسه‌یه‌كی زۆر جیاوازی پێ وتم به‌ وته‌ی ئه‌و "شه‌وێكیان كه‌ له‌گه‌ڵ كاروانێك بووه‌ فڕۆكه‌یه‌كی هاوپه‌یمانان زۆر نزیكبووه‌ته‌وه‌ و فیشه‌كی ڕه‌نگداری باراندووه‌ به‌سه‌ریاندا كه‌ به‌ته‌واوه‌تی ڕێگاكه‌ی بۆ روناككردونه‌ته‌وه‌ و چه‌كدارانی داعش هێنده‌ ترساون خه‌ریكبووه‌ خۆیان پیس بكه‌ن".

كاروانه‌كه‌ له‌ گونده‌كه‌ تێپه‌ڕی.پاش ماوه‌یه‌ك له‌ ڕێگا كردن سه‌رئه‌نجام گه‌یشتین به‌ خاڵێكی پشكنینی هێزه‌كانی سوریای دیموكرات كه‌ له‌ نێوان مه‌ركه‌دا و ئه‌ل-سواردا دانرابوو. بۆ ئه‌بوو فه‌وزی ئه‌مه‌ خاڵی گه‌یشتنبوو به‌ چاره‌نوسی، چونكه‌ بارهه‌ڵگره‌كه‌ی پڕبوو له‌ چه‌كدری داعش و چه‌ك و ته‌قه‌مه‌نی. كه‌ گه‌یشتینه‌ خاڵی پشكنینه‌ هێزه‌كانی سوریای دیموكرات چه‌كدارێكی ئه‌و هێزه‌ لێی پرسین "ئه‌و كه‌لوپه‌لانه‌ بۆ كوێ ده‌به‌ین" و ئێمه‌ش له‌سه‌ر نه‌خشه‌كه‌ ئه‌و شوێَنه‌مان نیشاندا كه‌ كاروانه‌كه‌ بۆی به‌ڕێكه‌وتبوو. 
لێره‌وه‌ ئیتر ده‌گه‌ینه‌ قۆناغه‌كانی كۆتای چیرۆكه‌كه‌مان، چونكه‌ چاره‌نوسی ئه‌و هه‌زاران چه‌كداری داعشه‌ ته‌نیا بریتی نیه‌ له‌ گواستنه‌وه‌یان بۆ ناوچه‌ سنورییه‌كان و دابه‌شبوونیان به‌ به‌ناو عێراقدا، به‌ڵكو به‌شێك له‌و چه‌كدارانه‌ ده‌په‌ڕنه‌وه‌ بۆ ئه‌ودیوو سنوره‌كان  و به‌شێكی تریشیان له‌ناو سوریادا به‌ شاره‌كاندا دابه‌شده‌بن و ده‌ست به‌ ژیانێكی نوێ ده‌كه‌ن،ئه‌مه‌ش شێوازێكی نوێی بازرگانی له‌سه‌ر سنوره‌كان دروستكردووه‌. له‌به‌ر ئه‌وه‌ ئێمه‌ بۆ ته‌واوكردنی چیرۆكه‌كه‌ چوینه‌ سه‌ر سنوره‌كان.

عیماد، یه‌كێكه‌ له‌و ده‌یان كه‌سه‌ی كه‌ كاری قاچاخچییه‌تی و گواستنه‌وه‌ ده‌كات له‌ سنور. چومه‌ لای و باسی چیرۆكی ئه‌و خێزان و چه‌كداره‌ داعشانه‌ی بۆ كردم كه‌ دێنه‌لای و ده‌یانگوازێته‌وه‌ بۆ توركیا.

له‌باره‌ی كاره‌كه‌یه‌وه‌ پێی وتم :"له‌ دوو هه‌فته‌ی داهاتودا، چه‌ندین خێزان ره‌ققه‌یان به‌جێهێشتووه‌ و هاتونه‌ته‌ سه‌ر سنوری بۆئه‌وه‌ی بیانگوازینه‌وه‌ بۆ توركیا. من خۆم 20 خێزانم گواستووه‌ته‌وه‌. زۆرینه‌یان بێگانه‌بوون، به‌ڵام سوریشیان تێدابوون. 
پرسیام له‌ نرخه‌كان كرد و عیمان وتی "نرخه‌كا بۆ یه‌ك كه‌س له‌ 400 دۆلاره‌وه‌ ده‌ست پێده‌كات و زۆرترینیشیان ده‌گاته‌ 600 دۆلار. بۆ هه‌ر خێزانێكیش نرخه‌كان ده‌گه‌نه‌ هه‌زار و 500 دۆلار ".

له‌باره‌ی ڕه‌چه‌ڵه‌كی ئه‌و كه‌سانه‌ی كه‌ ده‌یانگوازنه‌وه‌ عیماد هه‌رچه‌نده‌ نه‌یده‌ویست، به‌ڵام ئه‌وه‌ی بۆ ئاشكراكردم كه‌ له‌ناو ئه‌و كه‌سانه‌دا "فه‌ڕه‌نسی، ئه‌وروپی، چینی و ئۆزبه‌گستان"ی بینیوه‌ و ده‌ڵێت "زۆرینه‌ی ئه‌و كه‌سانه‌ به‌زمانی بیان قسه‌یان ده‌كرد و هه‌ندێكیشیا به‌زمانێك قسه‌یان ده‌كرد كه‌ هیچ تێینه‌ئه‌گه‌یشم".

له‌باره‌ی كاره‌كه‌یانه‌وه‌ له‌ وه‌لید-یشم پرسی كه‌ قاچاخچییه‌كی تره‌ ئه‌و زۆر گه‌شبین نه‌بوو وتی :"له‌ماوه‌ی دوو هه‌هه‌فته‌ی رابردودا ده‌یان خێزانمان په‌ڕاندووه‌ته‌وه‌، به‌ڵام ئێستا ئیشه‌كه‌ زۆر به‌باشی به‌ڕێوه‌ناچێت، چونكه‌ توركیا سنوره‌كانی گرتون و ئاسایش زۆرتر بووه‌".
له‌باره‌ی شێوازی په‌ڕاندنه‌وه‌ی ئه‌و كه‌سانه‌ له‌ سنور عیماد باسی چیرۆكی سه‌ر و ڕێگای جیاوازی بۆ كردم و وتی "هه‌ندێك جار  په‌یژه‌ به‌كارده‌هێنین. جاری واش هه‌یه‌ به‌ ڕوباردا ده‌په‌ڕینه‌وه‌. هه‌ندێك كاتیش ڕێگا شاخ به‌كارده‌هێنین".
لێره‌ به‌دواوه‌ ئیتر وه‌ستام له‌سه‌ر سنور، چونكه‌ هیچ دڵنیانه‌بووم ئه‌و چیرۆكانه‌ی كه‌ ده‌یانبینم گه‌ر بیانگێڕمه‌وه‌ ئاخۆ كه‌س بڕوام پێده‌كات یاخود نا؟ كه‌واته‌ ئێره‌ كۆتای چیرۆكه‌كه‌ی من و ده‌ستپێكردنی چیرۆكی نوێی هه‌زاران كه‌سه‌.

732 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations