كەی دۆر، كۆمپانیا نازدارەكەی عەلی باپیر

06.07.2019

لڤین: سرود عەبدوڵا

ئەمیری كۆمەڵی ئیسلامی ماوەی چەندین ساڵە لەڕێگەی چەند كەسێكەوە بەنهێنی كۆمپانیایەكی دامەزراندووە كە داهاتی مانگانەی كۆمپانیاكە دەگاتە ١٠٠ هەزار دۆلاری ئەمریكی.

بەگوێرەی ڕاپۆرتێكی بنكۆڵكاری ڕۆژنامەوانی  كە تیمێکی تایبەت پێی هەستاوە، چەندین بەڵگەیان دەست كەوتووە، كۆمپانیای كەی دۆر كە لەبواری پلاستیك كاردەكات و سەربە گروپی كۆمپانیاكانی ڕێبەرە، موڵكایەتی ناڕاستەوخۆی دەگەڕێتەوە بۆ عەلی باپیر ئەمیری كۆمەڵی ئیسلامی.

بەگوێرەی ئەو سەرچاوەی زانیارییانەی لە كەسایەتی ناو كۆمپانیاكە و دەرەوەی كۆمپانیاكە قسەیان بۆ لڤین كردووە، كۆمپانیای (كەی دۆر) بۆ بەرهەم هێنانی نەخشی دەرگای پلاستیكی و كۆمەڵێكی دیكەی پێداویستی پلاستیك خاوەنداریەتی ناڕاستەوخۆی  دەگەڕێتەوە بە عەلی باپیری ئەمیری كۆمەڵی ئیسلامی، لەڕێگەی چەندین كەس و بازرگانی سەربەخۆیەوە سەرپەرشتی دەكرێت.

كۆمپانیای كەی دۆر كێن و كاری چیە؟

كۆمپانیای كەی دۆر یەكێكە لە 5 كۆمپانیا گەورەكەی كوردستان و عێراق و لە ساڵی 2012 دامەزراوە و ڕكابەری پلەی یەكەمی دەكات لە دروستكردنی نەخشی دەرگای پلاستیك و پێداویستیەكانی بارەگای سەرەكی كۆمپانیاكە لە گوندی ئەستریلانی سەربە ناحیەی چوارقوڕنەیە.

لۆگۆی كۆمپانیای كەی دۆر

پاش بەدواداچوونێكی ورد ئەوە دەركەوت كە كۆمپانیاكە خاوەنداریەكەی بۆ عەلی باپیر دەگەڕێتەوە بەڵام بەهیچ شێوەیەك خۆی سەرپەرشتی و تەنانەت سەردانیشی ناكات تەنها لە ڕێگەی چەند كەسێكی متمانە پێكراوی خۆی كۆمپانیاكە بەڕێوە دەبات و تەنانەت بۆ ئاشكرانەبوونی ئەوەی كە كۆمپانیاكە هی ئەوە ئەوكەسانەشی كردوە بەشەریك لە كۆمپانیاكە ناوی لەهیچ سجل و وەرەقەیەكی كۆمپانیاكە نیە.

داهاتی كۆمپانیاكە لەبانكەكانی هەولێر و توركیا هەڵگیراوە 

بە گوێرەی زانیارییەكان كۆمپانیاكە یەكەمجار بەناوی كارگەی توانابووە لە ڕانیە دەستی بە كارەكانی كردوەو  دواتر ناوی بەرهەمەكانیان كردوە بە كەی دۆر، ئەوەش پاش فراوانبوونی كارەكە هاتووە بڕیاریانداوە كۆمپانیاكە بگوازنەوە بۆ گوندی ئەسیریلان و لەوێش ناوی كۆمپانیاكە دەگۆڕن بۆ ڕێبەر گروپ و كارگەی ڕێبەر و بەرهەمەكانیش دەكەن بە كەی دۆر و كەی بۆرد.

هەر بەگوێرەی زانیارییەكان كۆمپانیاكە بەرهەمەكانی دەنێرێت بۆ سەرجەم شارەكانی عێراق و بۆتە یەكێك لە ناوە دیارەكان لە بوارەكەی خۆیدا، بۆیە مانگانە داهاتێكی باش پەیدا دەكات و لەچەندین حسابی بانكی لەناوە و دەرەوەی وڵات پارەی داناوە.

 بەگوێرەی چەندین پسوڵەی ژمێریاری كە لە ڕاپۆرتە بنكۆڵكارییەكەدا بۆ تیمە رۆژنامەوانیەكە خستیانەڕوو، داهاتی كۆمپانیاكە مانگانە نزیك دەبێتەوە لە 100 هەزار دۆلار مانگانەش داهاتی لەو بڕە كەمتر و زیاتر دەبێت بەگوێرەی ڕێژەی فرۆش، هەرچی لەبارەی دەستی كاری كۆمپانیاكەوە هەیە نزیكەی 30 كرێكار بە موچەی جیاواز كە كەمترینیان 500هەزارە و زۆترینیان  یەك ملیۆن و 200 هەزارە كاردەكەن.

سەرپەرشتیارانی كەی دۆر لەگەشتێكی ئیتاڵیا _ فڕۆكەخانەی میلانۆ
داهاتی كۆمپانیاكە دەچێتە چەند بانكێك لە (هەولێر و توركیا) وە پارەدان و پارە وەرگرتنیش تەنها لە ڕێگەی بانكەوەیە و كارەكان لە ڕێگەی چەند نوێنەرێكی عەلی باپیرەوە لە هەولێر و توركیا ڕایی دەكرێن.

لڤین ناوی ئەو كەسانە ئاشكرادەكات كە كەسی نزیكی عەلی باپیر ئەمیری كۆمەڵی ئیسلامین و هاوبەشی ئەون لەم كۆمپانیایەدا، بەگوێرەی ووتەی ئەو سەرچاوانە كەسە نزیكەكانی عەلی باپیر كە سەرەتا تەنها كاریان بۆ ئەمیری كۆمەڵی ئیسلامی كردووە، بەڵام دواتر بوون بە هاوبەشی  كۆمپانیاكە بریتین لە (حاجی رەسوڵ و كوڕەكانی رێبەر و ڕەوا، حاجی عومەر و توانای كوڕی كە لە ئێستادا توانا لەوێ دەستی لەكاركێشاوەتەوە وە سەرەتاش كۆمپانیاكە بەناوی ئەوەوە بووە)، خزمایەتی ئەوكەسانە لەگەڵ ئەمیری كۆمەڵ زۆر ڕوون نیە، بەڵام كەسانی متمانە پێكراوی ئەمیرن و لەگەڵ ئەو كاردەن هەم وەكو هاوبەش هەم وەكو بەڕێوەبەری ڕاستەوخۆی كۆمپانیاكەن بۆ شاردنەوەی خاوەندارییەتی كۆمپانیاكە بۆ ئەمیری كۆمەڵی ئیسلامی.

تا ماوەیەك پێش ئێستاش هەر كاتێك ئەمیری كۆمەڵی ئیسلامی گەڕابێتەوە ڕانیە ماوە ماوە بەشەو سەردانی ماڵی حاجی ڕەسوڵی كردووە لە ڕانیە و وێنەكانیشیان لە فەیسبووك بڵاودەكردەوە بەڵام دوای وازهێنانی توانا و گۆڕینی ناوی كۆمپانیاكە بەناوی تواناوە بۆ ڕێبەر تەواوی ئەو وێنانە سڕانەوە، وەكو ئاماژەیەك بۆ تێكچوونی پەیوەندییەكە.

ئایا داهاتی ئەم كۆمپانیایە دەچێتە گیرفانی كێوە؟

لڤین لەوبارەیەوە لەناو كۆمەڵی ئیسلامی بەداواداچونێكی وردی كرد، ئەوەی بۆ دەركەوت هیچ داهاتێكی ئەو كۆمپانیایە بەڕاستەوخۆ ناچێتە ناو خەزێنەی كۆمەڵی ئیسلامیەوە تەنانەت لەئاستی سەركردایەتی كۆمەڵی ئیسلامیش ئەو پرسە نەك باس ناكرێت بەڵكو بەشێكی زۆریان بەو پرسە نازانن، بەڵام چەند كەسێكی نزیك لە عەلی باپیر لەوانە (محمەد حەكیم كارگێری ئەنجومەنی سیاسی و ئەنوەر سەنگاوی ئەندامی مەكتەبی سیاسی) بەو كارە دەزانن شاردویانەتەوە، چەندین جاریش ئەمیری كۆمەڵی ئیسلامی كاتێك قەیران بەرۆكی كۆمەڵی گرتووە بەناوی هاوكاری دەوڵەمەندانەوە پارەی ئەو كۆمپانیایەی بۆ خەزێنەی كۆمەڵی ئیسلامی گەڕاندووەتەوە.

دۆخی دارایی كۆمەڵی ئیسلامی؟

كۆمەڵی ئیسلامی جگە لەهاوكارییەكی كەمی ماددی پەرلەمانتارەكانی و پێشتر سولفەیەكی مانگانەی لە ئێرانەوە وەردەگرت هیچ هاوكارییەكی ماددی نەماوە بۆیە بەقەیرانێكی سەختی دارایدا تێپەڕ دەكات، تەنانەت زۆترین كارمەندی لە كەناڵی پەیام كۆبوتەوە دوو مانگ جارێك نیو موچە وەردەگرن، ئەوەشی جێگەی نیگەرانی كادیرانی كۆمەڵی ئیسلامیە ئەو ناڕونیەیە لەداهاتی ئەو حیزبە هەیە كەس نازانێت چۆن ئەو پارەیە پەیدا دەكرێت بۆچی بەردەوام لەقەیراندان.

5611 جار بینراوە

زیاتر

copyright 2019, All Rights Reserved Developed by TeraTarget for Digital Intelligence and IT Innovations