روداوەکەی چەخماخە درێژەی دەبێت!

ئەحمەد رەفیق
20.02.2020

چەخماخە گوندێکی کوردنشینی سەر‌ بە قەزای دوبزە، لە سەرەتای شەستەکانی سەدەی رابردو وەک دەیان گوندی دیکەی کوردنشینی دەوروبەری کەرکوک، لە لایەن حەرەس قەومییەکانەوە کەوتە بەر شاڵاوی بەعەرەبکردن و بەهۆیەوە تاڵانی و بڕۆیەکی زۆری تێدا کرا و هەندێکیش شەهید کران!.

لەو عەیامەوە تا کەوتنی رژێمەکەی سەدام لە ۲۰۰۳ زەوی و زاری کوردنشینی گوندی چەخماخە لە لایەن ئەو عەرەبانەی کە لەم رۆژانە هێرشیان کردە سەر ئەو چەند گەنجە داگیر کرابو، دواتر خەڵکی ئەو ناوچەیە ئاهێکیان بە بەردا هاتەوە و لەو کاتەوە خەریکی کشتوکاڵ و ئاژەڵدارین.

هەنگینێ هەمان عەقڵییەت و کارەکتەر لە دوو سەردەم و زەمەنی جیا لە ژێر ناوو دەمامکی داعش دەیەوێ؛ دانیشتوانی کوردی رەسەنی ئەو ناوچانە دەربەدەر‌ بکاتەوە و دەست بە سەر موڵک و ماڵەکانیان بگرێ و ئاوارەیان بکاتەوە. ئەم روداوەی چەخماخە ئاماژەیەکی رون و زەقە کە پێمان دەڵێت ئەو عەقڵیەتەی کە کوردی ئەنفال و کیمیاباران و دەربەدەرکرد تا هەنگینێ درێژەی هەیە! روداوەکەی چەخماخە کە تێیدا چوار گەنجی سڤیلی کوردی تێدا شەهیدا کرا و سیانی دیکەش بریندار‌بون، هەر بەوەوە ناوەستێ بەڵکو درێژەی دەبێ وشوێنی تریش دەگرێتەوە ئەگەر بە خێرایی چارەسەرێکی گونجاو بۆ دۆخی شێوێندراوی ناوچە کێشە لەسەرەکان نەدۆزرێتەوە!

پێویستە کورد چی بکات؟

چەند هەنگاوێکی گرینگ هەن کە پێویست دەکات بە زویی کورد بیانگرێتەبەر لەوانە:-

یەکەم؛ حکومەتی هەرێمی کوردستان بەو پێیەی لایەنی دووەمە لە مەسەلەی خاوەندارێتی ناوچە کێشە لەسەرەکان، لە سەر ئەم روداوەی چەخماخەو لە رێگەی دامەزراوەکانییەوە لە نەتەوە یەکگرتووەکان و رێکخراوەکانی بواری مافی مرۆڤ سکاڵای یاسایی تۆمار بکا و حکومەتی عیراق بخاتە ژێر بەرپرسیارێتییەوە.

دووەم؛ سەرجەم فراکسیۆنە کوردستانییەکان لە بەغدا بەبێ جیاوازی لە رێگەی کەناڵەکانی خۆیانەوە فشاری جددیی لە سەر حکومەتی عیراق دروست بکەن بە ئامانجی دروستکردنی رای گشتی لەسەر ئەم پرسە و چارەسەرکردنی خێرای دۆخی شێواوی ناوچە کێشە لەسەرەکان.

سێیەم؛ بەهۆی ئەوەی حکومەتی عیراق توانای پاراستنی سەروماڵی هاوڵاتیانی ژێر دەسەڵاتی خۆی نییە، داوا بکرێت هێزی پێشمەرگە بگەڕێندرێنەوە ئەو ناوچانە، ئەگەر لەم کاتەدا ئەوە کارەش نەکرا، ئەوا داوا بکرێ خەڵکی ئەو ناوچانە پڕ چەک بکرێن بۆ ئەوەی پارێزگاری لە گیانی خۆیان بکەن.

چوارەم؛ هەردو حزبی دەسەڵاتدار "یەکێتیی و پارتیی" هەوڵ بدەن لە رێگەی رێکخستنەکانیانەوە هەماهەنگ و هاوکاری کوردنشینانی ئەو ناوچانە بن و چی پێویست بو لەو روەوە بیگرنەبەر بە ئامانجی رێگریکردن لە هەر روداوێکی نەخوازراو.

copyright 2019, All Rights Reserved Developed by TeraTarget for Digital Intelligence and IT Innovations