ئاواز و هۆنراوەی (بەتەنها جێی مەهێڵن)، شیوەن نییە، شۆکێکی دەرەوەی سیستەمی مێژووە!

ماجد خەلیل
16.03.2020


بیرەوەرییەکی شیرین لە رۆژانێکی تاڵ و تاریکدا

پاش پێچ و پەناو بگرەو بەردەیەکی تاقەت پڕوکێن و دوای راوڕێوییەکی ڕادەبەدەر توانیم وەک زاڕۆیەکی هەورامی زوانی هەڵەبجە لە پۆلی دووی سەرەتاییدا و لە قوتابخانەیەک کە ناویم بیرنەماوەو لە گەڕەکی زەرگەتەی سلێمانیداو لەساڵی هەشتاونۆی سەدەی رابردوودا دەست لەمن و قووەت لە خووا درێژە بەخوێندن بدەم. لەو ساڵەدا هەڵەبجەییەکان بۆیان نەبوو لە شاری سلێمانیدا بمێننەوە. ئەوێدەم موختار و موریدی کۆڵانەکانی شار داردەست و دەرباربوون و گوێی دیوارەکانی شار راپۆرت لەسەر ڕاپۆرتیان لەسەر دەداین و هەوڵەکانمان بۆ دۆزینەوەی کوێرەوڵێک بۆ ژیان، ببویە نوکتەی بەعسییەکان و هەرمانگایەک سەری کردایە بەتەنەکەی خۆڵی بەرماڵاندا دەیانگوت هەڵەبجەییەو بۆ خانوی کرێ دەگەڕێ.
 بەڵێ دروست ئەوکاتە لە مەزنی شیعرە ئاسمانییەکەی رەفیق سابیر گەیشتم کە دەڵێ:

بەتەنیا جێی مەهێڵن
 ئەمشەو زریان دەیچێنێ
تەمو مژ دایدەپۆشێ
 مانگەشەو دەیڕفێنێ  


چ دەربڕینێکی تر، هێندەی (بە تەنها جێی مەهێڵن) گونجاو بوو بۆ ئێمە. ئێمەی تەنها و تەریک، جێماو لە ماف و میراتی ژیان، جێماو لە سۆزی ئاسمان و زەوی، جێماو لە کانی و باخ و ڕەزو کۆڵان و سیحری منداڵی، جێماو لە ئەلف و بێی کوردی سەر تەختەڕەشەکەی رووناکی ڕۆحی هەموومان. لەلای من ئەو شیعرو ئاوازە، دەرهاویشتەی ساتەوەختێکی سروشاوییە. دروست لەدەرەوەی سیستەمی مێژوودایە. ئەو شیعرە پڕ بەپێستی رووداوەکەیە، ڕووداوێ کە لەدەرەوەی سیستەمی مێژوودایە!

 ئێمە زاڕۆی زەندەقچووی پاش پلیشانەوەی ژێر پۆستاڵ و ناپاڵم و کیمیابارانی  بەعس بووین. ئێمە زاڕۆی زیندەبەچاڵی نەوجەوانی و  کارەکتەری سەرەکی ناو چیرۆکەکانی جینۆسایدو مەرگی جوانیەکانی سەدەی بیستەم بووین. پاش کیمیابارانی مەنزڵگاو زێدەکەمان، بەهەڵەداوان و بە پاخروا، لەناو هاواری نزای پیرەژەنان و ڕەنگی پەڕیوی جەوانانی شاردا، لەناو زایەڵەی زامی بەسوێی ئەوانەدا کە مابووین چوینە ئۆردوگایەکی نێزیک ئاواییەک بەنێوی کەرگێنە کە سەربەشارۆچکەی شویشەی ئوستانی سنە بوو. 

یادەوەریی ئەو قۆناغەم کەمن، شتێکی وام بیرنەماوە، یان ئەوکات زۆر منداڵ بووم یاخۆ ئێستە چووم بە عومراو بیرمچوونەتەوە،دەبێ یەکێ یان هەردوکیانبێ.

 تەنها شتێ بیرم مابێ ریزێ زاڕۆی چڵمن بووین و جزمەی سورو سەوزمان لە پێدا بوو، ڕەپو ڕاست براینە ناو ئوتوبوس و لە حەمامێکی ژنانەداو لەناو ئاپۆرای ژنگەلدا شۆردراین٭ هەرچۆنێ بێ گەڕاینەوە.هاتینەوەو بەو شێوەی کە لەسەرێ گوتم چومەوە قوتابخانە. 

مەبەستی ئەم نوسینەم یادگارییەکی شیرینی زاڕۆییم بوو کە منداڵیمی لێدەچۆڕا، یادگارییەکی شیرین لە پاش تاڵاوی خەردەل و خەڵتان بوون لە مەراق.

 وانەی کوردی بوو، مامۆستاکەمان ست تاڤگە ناوێ بوو، قژ زەردێکی زنجیر لەمل و سفور و تا بڵێی سیحراوی و جوان و مرۆڤ دۆست. لەلای من وەک ژنی ناو تەلەفزیۆنەکان! وابوو. ژن لەدنیای ئەو کاتی مندا، بۆنی مێخەک و چەتفەو سەڵتەو  بەرماڵ و منداڵ شۆرین لە تەشتاو دەنگی پەرامێزو هەویر شێلان و فەرش شۆرین و شیوەن و ڕووسەری و لای لایەی خەوی منداڵ و شیرپێدان و مانگادۆشین و عابای ڕەش و دەمەقاڵێ لەتەک شوویداو تۆران و تەڵاق و  ئەم شتانە بوو. بەهەرحاڵ. تاڤگە هاتە ژوورێ، دارا دوو داریمان خوێندو هەر زەنگی چوونەدەرەوە لێی نەدا، ناچار گوتی ئادەی کێ دەنگی خۆشە سرودێ گۆرانیێ شیعرێکمان بۆ بڵێ. یەک،دوو زاڕۆی سورو سنجی جوانکیلە چونە پێشێ و تەحێیان کردو شتێکی لە بەزمی کەروێشک لانەولانەیان وت. کات بەرەکەتی تێکەوت و زەنگلێنەدرا. منی ماڵی ئامەویش غیرەتم دایە بەرخۆمو بەخۆمو شێخ رەزا گوتەنی تاڵعی نەحسمەوە تاومدایە بەرخۆم و بەناخێری گیانم چوم سرودێکی مناڵانە بڵێم. ئێمە وەختێ لە ئۆردوگا بووین گوێمان بە نەشیدو نەڕەی شۆڕشگێڕانە کرابوویەوە. سەر لەبەری ئەدەبیاتی ناو شۆڕشم لەبەر بوو.  بۆیە بە دەنگێکی بەرزی پڕ لە ئەوین و عەشقی ئازادییەوە هاوارم چڕی و ئەم سرودەم دەوتەوە:

بۆ شەهیدانی هەڵەبجە
شین و گریانم دەوێ
ئەی نەوایی خەڵکی عاڵەم
حوکمی کوردانم دەوێ

بەڵێ حوکمی کوردان، لە هەشتاو نۆدا، کە جگە لەو سودانیانەی بەر مزگەوتی گەورە کە بزمار ڕێژی پێڵاویان دەکردو ئەو میسریانەی کە سراحی و پەرداخیان بە کۆڵانەکانی سلێمانیدا دەفرۆشت. شار پیاوێکی تیا نەمابوو، یان جوندی موکەلەف بوون لە جنوبا، یا پێشمەرگە بوون لە شاخێ و یا!. منداڵی نەگبەتی بێهەدەر. پاش سرودەکەم و لێدانی زەنگی چونەدەرەوە، مامۆستا وتی وەرە بۆ ئیدارە. لەگەڵ ویدا چومە ژوورێ، دەفتەر و قەڵەمدارێکی هێناو وتی ئەو گۆرانیەی وتت بەهێواشی بیڵێ بابینوسمەوە، منیش هەمویم لەبەر بوو

تاجی خەردەل باڵی کێشا
چەتری مەرگی دا بەسەردا

هەتا دووایی، ئاخر چۆن سەیر نەبێ، لە کەروێشک لانەو لانەوە بۆ تاجی مەرگ و خەردەل. وەختێ شیعرەکەم دەوت، مامۆستاکە دڵی پڕ ببوو، لە بیرمە فرمێسک لە چاوانیدا دەهاتنە خوارێ. هەم بۆ یەکەمجار بوو چاوی سەوز ببینم،هەمیش یەکەمجارم بوو چاوی سەوز ببینم بگرین.هەمتریش یەکەمجارم بوو کەسێ میهرەبانانە پێم بڵێ، دەنگت خۆش بوو، شیعرەکەت جوان بوو، بەڵام ئیتر لە هیچ شوێنێ مەیڵێ، چوون باوکت دەگرن و دەیکوژن.

تێبینی: ئەو حەمامە گشتییەی ژنانی شاری شویشە کە ئێمەی زاڕۆیان لەناو ژنگەلدا شۆری، هونەرمەند عەباسی کەمەندیش لە دیدارێکی تەلەفزیۆنیدا وتی بە زاڕۆیی دایکم بردوومییە ئەوحەمامە و شۆریومی و هەر لەوێیش بۆ یەکەمجار عاشق بووم!

هەڵبەتە ئێمە خوا موانەتی عاشق بوونی نەداین.

copyright 2019, All Rights Reserved Developed by TeraTarget for Digital Intelligence and IT Innovations