ئاسۆ عەلی
دووبارەبوونەوەی رێککەوتننامەی ستراتیژی لەنێوان گۆڕان‌و پارتیدا بەدوورنازانم
PM:07:01---14-05-2014
ئه‌م بابه‌ته 12093 جار خوێنراوه‌ته‌وه‌‌


ئاسۆ عەلی یەكێكە لەو بەرپرسە دیارانەی پێشووی یەكێتی كە لەگەڵ دروستبوونی باڵی رێفۆرم، ساڵی (2004) واژۆی ئەو یاداشتەی كرد كە بۆ سكرتێری گشتیی یەكێتیی نیشتیمانیی كوردستان نێرراو لەساڵی (2009) لەگەڵ ئەو باڵەدا جیابوونەوەو بزوتنەوەی گۆڕانیان دروستكرد، بەڵام ئەم هەر زوو بەهۆی نیگەرانی لەشێوازی بەڕێوەچوونی بزوتنەوەكەوە خۆی كەنارگیركردو نزیكەی چوار ساڵە وەك سیاسەتوانێكی سەربەخۆ چاودێرە بەسەر دۆخی سیاسیی كوردستان‌و لایەنە سیاسییەكانەوە، گۆڤاری(لڤین) پێیباش بوو لەنزیكەوە ئاسۆ عەلی بدوێنێت، بەتایبەت كە ماوەیەك بەرپرسی مەڵبەندی سلێمانیی (ی.ن.ك) بووە، كە ئیستا سلێمانی مەیدانی سەرەكیی كێبەركێی نێوان یەكێتی‌و بزوتنەوەی گۆڕانە .


لڤین:
دیداری ئیدریس بەرزنجی 


لڤین: ئەم هەڵبژاردنە لەچاو هەڵبژاردنەكانی پێشوودا چ جیاوازییەكی هەیە؟
ئاسۆ عەلی: جیاوازییەك كە هەبێت لەشێوازی بانگەشەكەدا دەیبینم، بەشێوەیەك كە هێمنترە لەچاو بانگەشەكانی پێشووترو جۆش‌و حەماسیشی كەمترە، كە ئەمە بەدیوێكدا ئەرێنییە كە بەشێوازێكی نەرمترو دوور لەشەڕوشۆر بەڕێوەدەچێَت، بەڵام بەدیوێكی تردا نەرێنییە كە ئاماژەیە بۆ بێهودەبوون‌و لاوازبوونی هیوای خەڵك بەرانبەر بە پرۆسەی هەڵبژاردن. ئەمەش بۆ خۆی بەدیهێنانی ئەو ئامانجەیە،كە هێزە دەستەڵاتدارەكان ئامانجیانە لەو رێگایەوە، زیاتر درێژە بە دەستەڵاتی خۆیان بدەن .
لڤین: پێتوایە تاكە خیار‌و شاڕێی گۆڕانكاری لەم دۆخەی ئێستادا هەر هەڵبژاردنە؟
ئاسۆ عەلی: بەبڕوای من هەرگیز رێگای توندوتیژی رێگای گۆڕانكاری پایەدار‌و بنەڕەتی نییە، هەر گۆڕانكارییەك بەرێگای توندوتیژی بەدیبێت،جا گۆڕانكارییەكە لەرێگەی شۆڕشی چەكدارانە یان راپەڕینی جەماوەریی توندوتیژو پەلاماری دامودەستگاكانی حكومەت‌و دەستەڵاتەوە بێت، ئەوە هەندێك جار دەرهاویشتەكانی كارەساتبار‌و گەورەتر دەبن لەدەستكەوتەكانی، هەربۆیە بەبڕوای من تاكە رێگا بۆ گوڕانكاریی پایەدار، گۆڕانێكی شێنەیی هەنگاو بە هەنگاوی بەبەرنامەو زانستییانەیە، نەك گۆڕانكاریی بەپەلەی رادیكاڵییانەی سڕینەوەی بەرانبەر، چونكە هەموو ئەو هێزانەی بەشێوازێكی رادیكالانە دێنە سەر دەستەڵات دەبنە كۆپییەكی ناشیرینتری دەستەڵاتەكەی پێش خۆیان، لێرەوەیە تاكە رێگای سەركەوتوانەی گۆڕانكاری بە رێگای گەشەپێدانی سیستەم‌و هۆشیاركردنەوەی خەڵك‌و بە حەكەم كردنی سندوقەكانی دەنگدان دەزانم .
لڤین: پێتوایە لەم هەڵبژاردنەدا، دەنگەكانی گۆڕان بەشێوەیەكی بەرچاو زیادبكەن؟
ئاسۆ عەلی: لەم هەڵبژاردنەدا دوو فاكتەر لەبەرژەوەندیی بزوتنەوەی گۆڕاندایە، یەكەمیان تێكچوونی زیاتری دۆخی ناوخۆیی یەكێتی‌و دووەمیان روانینی دەنگدەرانە بۆ ئەگەری چوونە دەستەڵاتی گۆڕان.
لڤین: قورسایی ئۆپۆزیسیۆن بەتایبەت گۆڕان چۆن دەبینیت لەم هەڵبژاردنە؟
ئاسۆ عەلی: بەداخەوە چەند جاری تریش وتوومەو واقعێكە دەبێت ددانی پێدابنێین كە كۆمەڵگای ئێمە بەرهەمی مێژوویەك لەستەمكاری‌و سەركوتكردنە، بۆیە ئاستی هۆشیاریی سیاسی‌و كۆمەڵایەتیمان زۆر لاوازەو بەوپێیەش، هەڵوێست وەرگرتن بەرانبەر لایەنە سیاسییەكان كەمتر لەهۆشیارییەوە سەرچاوە دەگرێت، بەڵكو زیاتر هەڵوێستەكان هەڵوێستی بۆماوەیی‌و نەرێتی‌و كاردانەوەن. لەئێستادا كە ئۆپۆزیسیۆن ئەگەری چوونە دەستەڵاتی لەبەردەمدایە، شیرینتر بووەو زۆر لەخەڵكە دوودڵ‌و راڕاكان بەتایبەت ئەوانەی بەدوای دەستكەوتە تایبەتەكانی خۆیانەوەن، جۆرێك لەقوتبوونەوەو زیندووبوونەوەیان تێكەوتووە، كە ئەمە ئاماژەی هۆشیاربوونەوەو جێگەی دڵ پێخۆشبوون نییە، چونكە ئەو توێژە فراوانە پەروەردەكراوی سیستەمی دەستكەوتی خێراو راستەوخۆن نەك گۆڕانی ریشەیی.
لڤین: پێتوایە هەر سێ لایەنی ئۆپۆزیسیۆن ئێستا كە دەچنە حكومەتەوە پاشەكشەیان لەدەنگەكانی خۆیان كردبێت بەرەو رادەستبوون رۆشتبن؟
ئاسۆ عەلی: لەدوای هەڵبژاردنەكانەوە هیوایەك بەوە هەبوو كە پێكهێنانی حكومەتی بنكەفراوان گۆڕانكاریی گەورە بەدیبێنێت، سەرەڕای ئەوەی پێكهێنانی حكومەتی بنكەفراوانی نیشتیمانی یەكێك لەپایە گرنگەكانی سیستەمی دیموكراسی كە هەبوونی ئۆپۆزیسیۆنێكی كارایە لەقدەكات، بەڵام بۆ دۆخی ناسروشتی‌و هەڵواسراوی ئێستای كوردستان لەحكومەتی زۆرینە باشترە، بەڵام بەمەرج‌و بنەمای روون‌و زانستییانە، نەك بە دووبارەكردنەوەی شێوازی حوكمڕانیی بەرەی كوردستانی، یان هاوشێوەی ئەزمونی دوولەت‌و دابەشكردنی دەستەڵات بەپێی رێككەوتننامە بەناو ستراتیجییەكەی یەكێتی‌و پارتی. بەپێی ئەو گفتوگۆو دانوستاندنانەی تا ئێستا زیاتر لەشەش مانگ كات‌و هەلی پێ بەفیڕۆدراوە. ئەوە دەبینم كە هێزەكانی ئۆپۆزیسیۆن بەهەندێك گۆڕانی روكەشەوە، بەرەو توانەوە لەبۆتەی شێوازی دەستەڵاتدارێتیی پێشوو هەنگاوبنێن‌و ببن بەبەشێك لەو سیستەمە نەخوازراوەی رابوردووی پارتی‌و یەكێتی.چونكە ئیرادەو روانینی نوێ نە لای پارتی‌و یەكێتی‌و نە لای ئەوانی تریش بەرچاوناكەوێت.
لڤین: پێتوایە بزوتنەوەی گۆڕان لەحكومەتدا ئەزمونێكی باش پێشكەشدەكات یان دەتوانێت لەو وەزارەتە ئەمنییانەی داوایاندەكات ئیشبكات؟
ئاسۆ عەلی: پێویستە بەشدارانی حكومەتی بنكەفراوان ببنە هاوبەش‌و هاوپەیمان لەسەر بنەمای (برامان برایی‌و بەرپرسیارێتیمان جیایی)، بەوپێیەی ئەرك‌و بەرپرسیارێتیی هەموولایەك روون‌و ئاشكرابێت‌و كەس باجی هەڵەی ئەوی تری نەكەوێتەسەرو سەركەوتنی هیچ لایەكیش بۆ ئەوی تر تۆمارنەبێت. لەو روانگەیەوە لەو كەسانە بووم بانگەشەم بۆ وەرگرتنی وەزارەت نەك وەزیر بۆ لایەنە بەشدارەكان كردووە، لایەنەكانی ئۆپۆزیسیۆنیش ئەو میكانیزمەیان تەبەننی كردو بانگەشەیان بۆكرد، بەڵام ئەمە ماوەیەكە ئەو بابەتە بنچینەییە فەرامۆشكراوەو حیكایەتە كۆنەكە هێنراوەتە ئارا، كە وەزیر بۆ كام لاو وەكیل وەزیر بۆ كام لا دەبێت. ئەمەش بەروونی دووبارەكردنەوەی گێژاوەكەی پێشووترەو سەرباری قووڵتركردنەوەی ململانێكان، بەرپرسیارێتیی تێدا بزردەبێت‌و ئۆپۆزیسیۆنی پێشوو تێیدا زیانمەند دەبێت. بەڵام ئەگەر هەر لایەنێك وەزارەتی وەرگرت، بەجومگە بنچینەییەكانەوە وەریبگرێت، ئەوە هەر سەركەوتن‌و داهێنانێك لەو بوارەدا بۆ خۆی تۆماردەبێت‌و دەبێتە سەرمایەی مەعنەوی بۆ هەڵبژاردنەكانی داهاتووی‌و هەمان كات هەر گەندەڵی‌و شكستێكیش لەسەر خۆی تۆماردەكرێت. بۆیە من لەئێستاوە ئومێدم بەم سەرەتا ناتەندروستەی پێكهێنانی حكومەت نییە. چونكە زۆر لەكۆپیكردنی ئەزمونی پێشووتر دەچێت .
لڤین: پێتوایە ئەگەر لەم هەڵبژاردنە، یەكێتی پاشەكشەی زیاتر بكات‌و ببێتە هۆی دوورخستەنەوەی لەساحەكەدا، چ زیانێكی بۆ ئەزمونی كوردستان دەبێت؟
ئاسۆ عەلی: بەبڕوای من ئەو دەنگانەی سەرجەم لایەنەكان هێناویانە، نوێنەرەوەی سەنگ‌و پێگە‌و كارو بەرنامەی خۆیان نییە، بەڵكو زیاتر نوێنەرەوەی بەكارهێنانی ناڕەوایانەی هێزو سامانی گشتی بۆ بەرژەوەندیی حیزبی لەلایەك‌و بەرزكردنەوەی دروشمی وروژێنەرانەی فریودەرانەیە لەلایەكەی ترەوە،لە سیستەمێكی وا ناتەندروستدا بژاردەكانی: سەربەیەكدا كردنی دووحیزبی بۆ بەرژەوەندییە تەسكەكان وەك ئەوەی لەئەزمونی پێشوودا كاری پێكراو، لەوەش ترسناكتر ختوكەدان بۆ زیندووكردنەوەی سیستەمی پارتی پێشڕەو‌و چڕكردنەوەی زیاتری دەستەڵات، زۆر مەترسیدارە بۆ چارەنوسی كوردستان. هەر بۆیە هەبوونی هێزی سێیەم‌و چوارەم پێویستییەكی قۆناغەكەیەو پەراوێزێك بۆ هۆشیاربوونەوەو ئاگاداربوونەوەی خەڵك‌و فراوانكردنی ئازادییەكان‌و رێگری لەپەردەپۆشكردن فەراهەمدەكات، لەو روانگەیەوە لەوەی ئێستا لاوازتربوونی یەكێتی، زیان بەپرۆسەی سیاسیی ناوخۆی كوردستان دەگەیێنێت‌و ئەگەری دووبارەبوونەوەی شێوازە ناتەندروستەكەی دووزۆنی‌و جووت حیزبیی پێشوو دەهێنێتەوە ئارا.
لڤین: پێتوایە ئەگەر یەكێتی زۆنی سەوز لەدەستبدات وا بەئاسانی جێیدەهێڵێ؟
ئاسۆ عەلی: لەو بڕوایەدام ئەم هەڵبژاردنە جۆرێك لەوەرگۆڕان لەسلێمانی دێنێتەئارا، گۆڕان وەك خاوەن پێگەی یەكەم‌و یەكێتی بە هێزی دووەم ساغدەبنەوە،هەرچەند لەو بڕوایەدانیم هیچ هێزێك سەرو نیوەی دەنگەكان بەدەستهبێنێت‌و دەستكراوەبێت بۆ بەتەنیا حوكمكردنی سلێمانی. هەربۆیە لەو دۆخە نوێیەی دوای هەڵبژاردنداو بە دابەشبوونی هێزو پێگە بە جۆرێك كە تێیدا گۆڕان دەبێتە خاوەن زۆرترین كورسی لەئەنجومەنەكەدا‌و لەبەرانبەردا یەكێتی وەك خاوەن فراوانترین جومگەی كارگێڕی‌و هێزی ئەمنی دەكەونەوە بەرانبەر یەكتر، ئەگەر جارێكی تر دیسان بەرژەوەندییە حیزبییەكان زاڵنەكرێنەوە بەسەر بەرژەوەندیی گشتیدا. سیاسەتی ژیرانە بریتیدەبێت لەپیشاندانی نمونەیەكی شارستانییانەو قبوڵكردنی ئەنجامەكان‌و سازان لەسەر داڕشتنەوەیەكی هاوچەرخ‌و پسپۆڕانەی بەڕێوەبردن بە بەشداریی زۆرینە یان سەرجەمی لایەنەكان، دوور لەروانینی پەراوێزكارانە. گرتنەبەری هەر رێگایەكی جیاواز لەم رێگایە لەلایەن گۆڕان‌و یەكێتییەوە، زیانی قورس بۆ سلێمانی‌و گەرمیان بەگشتی‌و لاوازكردنی زیاتری متمانەی خۆیان لای خەڵكی لێدەكەوێتەوە. 
لڤین: هەستت نەكردووە نزیكبوونەوەی گۆڕان‌و پارتی جۆرێك لەرێككەوتنامەی ستراتیجیی پێشوو دووبارەكاتەوە؟
ئاسۆ عەلی: یەكێتی‌و پارتی دوای مێژوویەكی خوێناوی نێوانیان، ئەوكاتەی تێگەیشتن یەكتریان بۆ ناسڕێتەوەو كاتێك بەرژەوەندیی ئابوریی تایبەت لەنێوانیاندا هاتەئاراوە. بەجۆرێك رێككەوتن كە بێمنەتانەتر مامەڵە لەگەڵ خواست‌و ویستەكانی خەڵك بكەن‌و كۆمەڵگایان خستە پەراوێزەوە، رۆژبەرۆژیش جیاوازییەكانیان بەرەو كاڵبوونەوە رۆیشتن. لەو ئەزمونەوەو بەپێی شێوازی كاركردن‌و بیركردنەوەو ململانێی نێوان گۆڕان‌و پارتییش، دووبارەبوونەوەی ئەم مەترسییە بەئاستەم نابینم، هەرچەند پێویستە ئەو ئەگەرە لەمەیداندا تاقیببێتەوە، بەڵام ئاماژەكان دڵخۆشكەرنین. دیارە لەنێوان ململانێی توندو دروستكردنی كەشی هاوشێوەی (17)ی شوبات یان رێككەوتننامەی دووقۆڵیی داخراودا، بژاردەی بەسوود‌و بەدیهێنەری بەرژەوەندییە گەورەكان لەبەردەستدان، ئەگەر بویسرێت. 
لڤین: یەكێتی جەماوەری كەركوكی بەدەستەوە ماوە، پێتوایە گۆڕانكاری لەدەنگەكانی دەكات یان بزوتنەوەی گۆڕان دەنگی زیاددەكات لەوێ؟
ئاسۆ عەلی: هەرچەند ئیدارەی یەكێتی لەكەركوك خزمەتگوزاریی باشیان پێشكەشكردووە، بەڵام لەلایەك دۆخی شێواوو بێسەرەوبەرەی ناوخۆیان زیانی زۆری بە متمانەو دەنگەكانیان گەیاندووە. لەلایەكی تریشەوە لایەنی كێبەركێكار بەپارە بەخشینی زیاترەوە بۆ ئەم هەڵبژاردنەی كەركوك هاتوووەتە مەیدان، لەولاشەوە گۆڕان لەپێگەیەكی رێژەیی بەهێزترەوە كێبەركێ دەكات. بە خوێندنەوەی ئەم پێدراوانە مەگەر مەترسیی لەدەستدانی دواپێگە، یەكێتییەكان لەكەركوك جۆشبداتەوە، بەوەشەوە لەوبڕوایەدام دەنگەكانیان هەر دادەبەزن. 
لڤین: بۆ پارتی هەمیشە هێزی یەكەمە یان پاشەكشەینەكردووە لەدەنگەكانی لەچاو ئەوانی تردا؟
ئاسۆ عەلی: سەرەتا دەبێ ئەوە بڵێم كە لەهەڵبژاردنی (1992)ەوە تائێستا دەنگ‌و پێگەی پارتی لەپاشەكشەی بەردەوامدابووە، بەڵام بە بەراورد بە یەكێتی وادێتە پێشچاو كە پارتی پاشەكشەینەكردبێت. ئەمە سەرباری ئەوەی پێشتر باسمكرد، نەخشەی دابەشبوونی دەنگدەر‌و لایەنگران لەكوردستاندا سروشتی‌و راستەقینە نییە. ئەو دەنگانەی پارتییش هێندەی دەرەنجامی بەكارهێنانەوەی نادیموكراسییانەی دەستەڵاتە بۆ مانەوە لەدەستەڵات. ئەوەندە وەڵامدانەوەی داهێنان‌و نوێگەری‌و دادپەروەری‌و خزمەتگوزاری نییە، لەپارتیدا خەونی قۆرخكاری‌و دەستەڵاتێكی هەمیشەیی زاڵە بەسەر خەونە نەتەوەیی‌و دیموكراسییەكاندا. خۆ ئەگەر لەكۆی پرۆسەی سیاسی‌و لەدروستكردنی كابینەی هەشتیشدا سەرجەم لایەنەكان‌و بەتایبەت گۆڕان‌و یەكێتی دووربینانە‌و بە لێپرسراوێتییەوە مامەڵەنەكەن، ئەوە دەبنە بەشدار لەبەدیهێنانی ئەو خەونە چەوتەی پارتی، كە سەرەنجام پارتی خۆیشی تێیدا دەبێتە قوربانی. چونكە ئەزمونە زۆرو دەوڵەمەندەكانی جیهان پێماندەڵێن تا ئێستا جگە لەسیستەمێك كە لەرێگای ئەنجامدانی هەڵبژاردنی پاكژو بەخولی دەستاودەستكردنی دەستەڵاتەوە توانای خۆنوێكردنەوەی هەیە، كە ئەویش سیستەمی دیموكراسییە. هیچ سیستەمێكی تری پشتبەستوو بە سامان‌و هێزو توندوتیژی نەیتوانیوە بەردەوامی بەخۆی بدات.
لڤین: لەگەڵ ئەوە بوویت گۆڕان بڕواتە حكومەتەوە بەم شێوەیەی ئێستا؟
ئاسۆ عەلی: بۆ تێپەڕاندنی ئەم قۆناغە من لەگەڵ پێكهێنانی حكومەتی بنكەفراونی نیشتمانیم، بەڵام لەسەر بنەمای شایستەیی دەنگ‌و كورسیی بەدەستهێنراوی لایەنە سەرەكییەكان‌و بەمەرجی هاوبەشی نەك بەشداری‌و بە رێسای كێبەڕكێی رۆشنی ئەرێنی، كە ئەرك‌و بەرپرسیارێتیی گشت لایەنەكانی بەشدار ئاشكرابكات. بەڵام پێناچێت ئەوەی ئێستا دەكرێت ئەو بنەمایانەی تێدا رەچاوبكرێت.
لڤین: دوای هەڵبژاردنەكانی پێشوو كاتێك پارتی سەردانی یەكێتیی كرد بۆ پێكهێنانی حكومەت، پارتی خوازیاربوو بەشداری بە گۆڕان نەكات‌و ئامادەبوو لەگەڵ یەكێتی پێكەوە حكومەت پێكبهێنن، بەڵام یەكێتی پێشنیاری حكومەتی بنكەفراوانی كرد، پێداگیریی ئەوەی كرد گۆڕان بەشداریبكات،بەڵام لەئێستادا یەكێتی گۆڕان بەبەربەست دادەنێت بۆ وەرگرتنی یەك لەو دوو وەزارەتە (پێشمەرگەو ناوخۆ)؟
ئاسۆ عەلی: بە قۆستنەوەی كەشی بێمتمانەیی نێوان هەرچوار لایەنە سەرەكییەكەی تری پرۆسەی سیاسی، پارتی توانیویەتی هەموویان بكات بەكوڕەی سێو لەباخەڵ‌و كێبەركێیان لەنێوان خۆیاندا پێبكات نەك لەگەڵ خۆیدا. ئەمەش لەوێوە سەرچاوەدەگرێت، كە سەرەتا لایەنەكان لەسەر هێڵە گشتی‌و بنەما بنچینەییەكان رێكنەكەوتن، ئەوسا دەست بە دانوستاندنی دابەشكردنی ئەرك‌و بەرپرسیارێتییەكان بكەن. دەبوو ئەم سێ بنەمایە بكرانایەتە خاڵی سەرەتاو مەرجی دەستپێكردنی گفتوگۆ: (1.حكومەتی بنكەفراونی نیشتمانی لەسەر بنەمای شایستەیی دەنگ‌و كورسیی بەدەستهێنراوی لایەنە سەرەكییەكان، ئەویش بە خاڵبەندكردنی سەرجەم پۆست‌و بەرپرسیارێتییەكان. 2. رێككەوتن لەسەر بەرنامەی چوار ساڵی حكومەت. 3.تەماشاكردنی هەر وەزارەتێك وەك سێكتەرێك‌و لەئەستۆگرتنی ئەو سێكتەرە لەلایەن ئەو پارتەی ئەو وەزارەتەی پێدەستپێررێت). سەرەتاش كە یەكێتی پێشنیاری حكومەتی بنەكەفراوانی تەبەنیكرد، دەكرا وەك جۆرێك لەبەخۆداچوونەوەو دەرس وەرگرتنێك بۆ یەكێتی تۆماربكرێت كە نایەوێت جارێكی تر بەشداریی حكومەتێكی دووقۆڵیی قۆرخكار بكات لەگەڵ پارتی، دەبوو لایەنەكانی ترو لەپێشیانەوە بزوتنەوەی گۆڕان وەك چاكەدانەوە نا، چونكە لەململانێ‌و كێبەركێی سیاسیدا كەمتر ئەم چەمكانە لەبەرچاودەگیرێن. بەڵكو وەك خوێندنەوەیەكی زانستییانە بۆ زەمینەسازیی رێگرتن لەچڕبوونەوەی دەستەڵات، ئەو هەڵوێستەی یەكێتیی تۆكمەتر بكردایە، نەك وەك هەلێك بۆ رازیكردنی پارتی‌و جێگای خۆكردنەوەو پاشقولی سیاسی بەكاربهێنرێت. ئەم روانینەش لەوێوە سەرچاوەدەگرێت كە لەدابەشكردنی سێ وەزارەتە ئەمنییەكەدا (كە یەكێكیان براوەتە دەرەوەی ئەنجومەنی وەزیران‌و وەك حكومەتی تەریب كاردەكات)، دەبوو هەرسێكیان بەسەر سێ لایەنی یەكەم‌و دووەم‌و سێیەمەكەدا دابەشبكرانایە. نەك گۆڕان رازیبێت ئەنجومەنی ئاسایشی نیشتمانی ریزپەڕبكرێت‌و دابەشكردنی هەر سێ پۆستەكە بۆ بەرژەوەندیی پارتی‌و بێبەشكردنی یەكێتی بێ، بەبێ ئەوەی گۆڕان لەو دابەشكردنە هیچ سودێكی تایبەتیشی پێببڕێت. لەلایەكی تریشەوە دەبوو یەكێتی ئازایانەو بەراستگۆیی دروشمی حكومەتی بنكەفراونی نیشتمانیی لەسەر بنەمای شایستەیی دەنگ‌و كورسی قبوڵبكردایە، نەك گەڕانەوە بۆ حیكایەتی رۆڵی مێژوویی‌و ئاماژەدان بە لەدەستدابوونی هێزو دەزگای ئەمنی. ئەم هەڵانەی گۆڕان‌و یەكێتی پێبزانن یان نا، خزمەتكردنە بەبەرنامەی پارتی.
لڤین: بۆچوونت چییە لەسەر ئەو وەزارەتانەی كە دراون بە بزوتنەوەی گۆڕان؟
ئاسۆ عەلی: ئەوەی لەراگەیاندنەكانەوە بڵاوكراوەتەوە‌و بێدەنگیی گۆڕان‌و ئاماژە ناڕوونەكانیان وەك نیشانەی قبوڵیان دەخوێنرێتەوە، جگە لەكڵاولەسەرنران‌و گرتنەبەری رێگەیەكی نەزۆك، هیچ لێكدانەوەیەكی تر هەڵناگرێت، چونكە وەزارەتی دارایی هەركەسێك وەزیری بێت هەر وەكیل وەزیرەكەی پارتی وەزیرە فیعلییەكەیەتی، وەزارەتی پێشمەرگەش هەر كەسێك وەزیری بێت تەنیا فەرمانبەرێكی سەرۆكی هەرێم‌و فەرماندەی گشتیی هێزی پیشمەرگەی كوردستان دەبێت،ئەمە سەرباری ئەوەی پێكهاتەی هێزی پێشمەرگە پێكهاتەیەكی حیزبییەو وەزیرانی یەكێتی‌و پارتییش تێیدا بڕیارەكانیان مەودایەكی دیاریكاو بڕیان دەكرد، ئاخۆ وەزیری گۆڕان بە چ موعجیزەیەك دەیكاتە هێزێكی نیشتمانیی هاوچەرخ؟! یان ئایا گۆڕان جگە لەرووبەڕووبوونەوەو بەریەككەوتن لەگەڵ لایەنە ئیسلامییەكان، چیی لەوەزارەتی ئەوقاف دەستدەكەوێت؟ 
تێبینی: ئەم دیدارە رۆژی (١٤/٤/٢٠١٤) سادرداوە.




مامۆستا کامەران عەلى: مەبەستەکانى پشت وەڵامدانەوەکانى ئاشکرا دەکات
نێچیرڤان بارزانی:پێویست ناکات ئەمریکا سەرباز رەوانەی عێراق بکات
ئاسۆ عەلی
دووبارەبوونەوەی رێککەوتننامەی ستراتیژی لەنێوان گۆڕان‌و پارتیدا بەدوورنازانم
مەسعودبارزانی:
سەددام حوسێن كەسێكی زۆر ئاسایی بوو، هەڵوێستی زۆر باش بوو
ئه‌و پیاوه‌ى به‌شدارى كوشتنى زه‌رقاوی كرد بۆ لڤین ده‌دوێت
"لیوایه‌كى كورد فه‌رمانده‌ى هێزه‌ تایبه‌تیه‌كانى مالیكییه‌"
شالاَو عه‌لی عه‌سكه‌ری:
كێشه‌ نێوخۆیه‌كانى یه‌كێتی وه‌ك ره‌گی گولی وایه‌ له‌یه‌كێتی نابێته‌وه
كوڕه‌كه‌ی خالیدی خوله‌ سور"ئه‌م كاره‌ به‌سه‌ر بكوژه‌كه‌دا تێپه‌ڕ نابیت"
د. سروش ده‌بباغ بیریاری گەورەی ئێرانی سەبارەت بەعیشق‌و پلۆرالیزمی ئاینی بۆ لڤین دەدوێت

زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە