كێ‌ چاو لە (مام) دەكات؟
سەرتیپ جەوهەر
PM:02:09---25-02-2019
ئه‌م بابه‌ته 384 جار خوێنراوه‌ته‌وه‌‌

لە 2002 كاتێك مام جەلال چووە سەڵاحەدین و بێ پێشەكی و نێوانگیریی، بڕیارێكی مێژوییدا، دەرگایەكی گەورەی خێری بەرووی خەڵكی كوردستان كردەوە، كۆتایی بەقۆناغی شەڕی ناوخۆو ماڵوێرانی هێنا. سەرباری رەخنەو گازندەی زۆر، بەڵام هەنگاوێك بوو ئاشتییەكی درێژخایەنی بەدوایخۆیدا هێنا.
ئەو بڕیارەی (مام) دوای سەردانەكەی ئەمریكای بوو، لەوێ پێیان وت ئەگەر ئێوە ئامادە نەبن و ناوماڵی خۆتان رێكنەخەنەوە، لە پرۆژەی روخانی رژێمی سەدامدا هیچتان بەرناكەوێت، وەك پێویست لەقۆناغی دوای روخانی سەدام رۆڵتان نابێت. بۆیە (مام) هاتەوەو سەردانی سەڵاحەدینی كرد، ئەو سەردانە گەورەترین رێگریی و گرێی لەسەر رێی ئاشتی لەكوردستان لابرد.
بڕیاری گرنگ و خێر، نە بەهەموو كەس دەكرێت و نەلەهەموو سات و كاتێكیشدا دەرفەت دەڕەخسێت بڕیاری وەها گرنگ بدرێت، بۆیە ئەوانەی دەتوانن دەرفەت بۆ بڕیاری زەحمەت هەڵبژێرن، بێگومان براوەی مێژوو دەبن و دەبنە سیمبول و بەدڵنیاییەوە دواتر پەیكەریان بۆ دروستدەكرێت.
گاندی بڕیاری زەحمەت و پڕ سەر ئێشەی دەدا بۆراگرتن و دروستكردنی ئاشتەوایی لەوڵاتەكەی، كاتێكیش كوژرا لەسەر دەستی گەنجێكی وڵاتەكەی كە نەیدەزانی كوشتنی گاندی مانای كوشتنی ئاشتییە، لەكاتێكدا ئەگەر گاندی لەخواردن مانی نەگرتایەو بەڕۆژو نەبوایە بۆ ئاشتی، بەدڵنیاییەوە چارەنوسی كوشتن نەدەبو، تیرۆركرانەكەیشی بووەهۆی نەمری بۆ ئەو پیاوە مەزنە.
ئەگەر ئەو دەستپێشخەرییەی مام نەبوایە، لەوەیە كورد ئەو بەركەوتەیەی نەبوایە كە لەدوای روخانی سەدام بووە هێزێكی كاریگەر لەعیراق، بگرە هەندێجار دەوترا سەرۆك وەزیرانی عیراق بەبێ‌ رەزامەندی كورد دانانرێت! ئەوەی لەدوای ئەو كاتەوە هاتەدی لەئاوەدانیی و گەشەكردنی ئابوری كوردستان (سەرباری رەخنەو كەموكوڕییەكان)نەدەهاتەدی، بەكورتی ئەوەی هاتەدی لەوە باشتر نەبوو.
ئێستا دوای زیاتر لە 27 ساڵ حوكمڕانیی و ئیدارەی هەرێمی كوردستان، كەچی خەریكە دامەزراوەكانی حوكمڕانیی هیچ بەهایەكیان نەمێنێت، نە پەرلەمان دەتوانێت رۆڵی خۆی بگێڕێت وەك دامەزراوەی قانون دانان و چاودێریی، نە حكومەت دەتوانێت ئیشی خۆی بكات وەك دامەزراوەیەك سەروماڵی هاوڵاتیان بپارێزێت و پلانی ساڵانەو گشتگیری هەبێت، نە دامەزراوەی دادوەریی توانیویەتی بەدەربێت لەململانێی سیاسی و حزبیی.
ئێستا خەریكە دۆخی كوردستان بەتەواوی روو لەلێژیی و هەڵدێر دەكات، دەگەڕێینەوە چوارگۆشەی یەكەم، ئەوەی بەدەستهاتووە دوبار ئەگەر لەدەستی نەدەین ئەوا ئەگەر هەر لێكەوتەیەكی هەبێت زیانێكی زۆر گەورەی لێدەكەوێتەوە، ئەو گرێیەی لەدەستان بوو، كەوتۆتە دەم و لەوانەیە بەئاسانی نەكرێتەوە.
ئەو دۆخەی ئێستا بەهۆی لاسەنگیەوە دروست بووە، لەگەڵ ئەو لاسەنگییە بەهۆی بڕیاردانی هەڵەو هەوڵی سەپاندنی ئەمری واقع و مامەڵەكردن بەكاردانەوە دروستبووە، كە هەموو ئەوانە مایەی قوڵبونەوەی ناكۆكی و ئاڵۆزتربونی دۆخی سیاسی و حوكمڕانییە لەكوردستان.
ئێستا دەرفەتێكی باش هەیە تا بڕیاری بوێرانە بدرێت، هەركەسێك بیدات سەرەنجام دەستكەوت و ناوبانگەكە ئەو دەیبات، بڕیاری زەحمەت بە پیاوی مەزن دەدرێت، ئەگەر هەر بڕیارێك یان دەستپێشخەرییەكی دروستیش بكرێت، چەندە راستكردنەوەی ئەو هەڵەیە یە كە لەچەند رۆژی رابردوو رویدا، ئەوەندە دەستكەوتی مەعنەویی شەخسیی دەبێت بۆ ئەوكەسەی بڕیارەكە دەدات.






زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە