حەماسەتی نەتەوەیی لە دیداری سولەیمانیی دا
کەمال چۆمانی
PM:03:14---15-03-2015
ئه‌م بابه‌ته 1652 جار خوێنراوه‌ته‌وه‌‌
لە چەند رۆژی رابردو دا، وتاری یوسف محەمەد، سەرۆکی پارلەمان، و وتەکانی محەمەدی حاجی مەحمود، سەرۆکی حیزبی سۆشیالیست، لە دیدارەکەی سولەیمانیی دا، دەنگدانەوەیەکی باشیان هەبوە چ لە ناو هۆڵی دیدارەکە و چ لە میدیا و سۆشیەڵ میدیا و شەقامی کوردیی دا. بە پێچەوانەوەی ئەوان، بە بڕوای من دو وتاری ناپێویستی ناو دیدارەکە بون.
بەر لە هەر شتێک دەبێ ئەوە بڵێم کە وتارەکەی سەرۆکی پارلەمان ناڕێکخراوەییەکی زۆری پێوە دیار بو. وتەکانی تێکەڵ دەکردن و زۆر گشتگیر بو. وتارێک بو زیاتر باسی مێژوی چەوساندنەوە و ستەمی دەکرد زیاتر لەوەی باسی رۆژ بکا. باسی رابردوی دەکرد زیاتر لەوەی باسی ئێستا بکا. گلەیی لە رابردو هەبو زیاتر لەوەی قسەی بۆ ئەمڕۆ پێبێ. وتەکانی هەڵقوڵاوی عەقڵی کلاسیکیی دونیای سیاسەتی کوردیی بو کە لە لایەن سیاسەتمەدارێکی نەوەی نوێی کورد پێشکەشکران. من ئەو گەڕانەوەیە بۆ عەقڵی کلاسیکیی بە کارەسات دەزانم.
وتەکانی محەمەدی حاجی مەحمود، وتەی حەماسیی بون، حەماسەتێک بە عەقڵی ساڵانی هەشتاکان. یەکێک لەو هۆکارانەی کە لە ١٠ ساڵی رابردو دا نەتوانراوە لەگەڵ بەغداد جۆرێک لە سیاسەتی نوێ پێشبخرێ، هەر ئەو حەماسەتە سیاسییە و نەتەوەیییەیە کە هەنگاوێک سیاسەتی کوردیی لە عێڕاق دا ناباتە پێش.
ئەو دیدارانە و دیداری دیکەی لەو جۆرە کە تێیدا سیاسەتمەدار و رۆشنبیر و نوسەر و رۆژنامەنوس و چالاکە عێراقییەکان تێیدا بەشدار دەبن، بۆ ئەوەیە کە بتوانرێ جۆرێکی تر لە دونیابینی و ستراتیژ و پەیوەندیی رێکبخرێ کە لە خزمەتی کۆی جڤاکی عێڕاقیی بێ نەک بۆئەوەی پەیوەندییەکان جارێکی تر بچنە دۆخێکی چەقبەستوتر.
محەمەدی حاجی مەحمەد گوتی کە عێڕاق چیتر وڵاتێکی یەکگرتو نییە و تەنها ئاسمانیی یەکگرتوە، بۆیە دەبێ کۆنفێدرالیزم جێی فیدرالیزم بگرێتەوە چونکە ئێستا عێڕاق سێ هەرێمە. هەر بەڕاست محەمەدی حاجی مەحمود دەیەوێت لەگەڵ 'دەوڵەتی ئیسلامیی'دا کۆنفێدرالیزم گرێبدات؟
ئێستا کە ئەو چەند وشەیە دەنوسم، دەبینم مەسعود بازرانی، سەرۆکی هەرێم، کۆبونەوەیەکی هەیە لەگەڵ سەرۆک عەشیرەتەکانی زوممار و رەبیعە. هەمویان بە شان و باڵی پێشمەرگە و مەسعود بارزانی هەڵدەڵێن. تەنانەت تازە یەکێکیان گوتی دەیەوێت ببێتە پێشمەرگە و خزمەت بکا لە ریزەکانی هێزی پێشمەرگە دا. ئەو کۆبونەوەیەی بارزانی، بە بڕوای من، دەبێ زیاتریش بێ و جارێکی تر متمانە لە نێوان کورد و سونە و شیعە بگەڕێتەوە نەک وەک ئەو کارەساتەی رێکخراوی هیومان رایتس وۆچ پێشانیداین. 
رەخنەگرتن لە ئەمێریکا کە یەکپارچەیی عێڕاقی دەوێ، رەخنەیەکی ناواقیعییە لە واقیعی سیاسیی و ئاساییشی ئەوڕۆی عێڕاق و ناوچەکە دا. بەڵام رەخنەگرتن لەو سیاسەتمەدارە کوردانەی کە هۆکار بون کوردستان نەبێتە هێزێک کە بتوانێ خۆی خۆی بپارێزێ لە بەرانبەر داعش دا، رەخنەیەکی واقیعییە. ئەمێریکا نەیدەتوانی هیچ فشارێک لەسەر هەرێم بکا ئەگەر هەرێمی کوردستان توانای هەبوایە خۆی خۆی بپارێزێ، بەڵام هانابردن بۆ ئەمێریکا و هاوپەیمانان، وا دەکات سیاسەتی ئەوان لە ناوچەکە دا بسەپێت نەک ئەوەی ئێمە دەمانەوێ. مادام ئەمێریکا و هاوپەیمانان بەشداریی شەڕی تێرۆریان کرد، هەولێریان لە کەوتن پاراست، هەرێم ناتوانێت دژ بە ویستی ئەمێریکا بێ لە ناوچەکە دا. ئەمە گرنگە بەرپرسانی کورد بزانن تا لە دیدارەکانیان دا وتەکانیان ببنە هۆکارێک بۆئەوەی پرسە هەڵپەسێردراوەکانی نێوان بەغدا و هەرێم بەرەو چارەسەریی بڕۆن نەک وەک د یوسف باس لە دابەشبونی عێڕاق بکرێ. 
لەمڕۆ دا دەتوانین چی بکەین و چی بەدەستبێنین گرنگە نەک قسەیەک کە ئەمڕۆشمان سەختتر بکات و سبەینێشمان ناڕون بکا. ئەگەریش هەرێمی کوردستان پلانێکی هەبێ بۆ دابەشبون، ئەوا هەروەک چۆن لە رابردو دا بزوتنەوەی گۆڕان ئاماژەی بۆ کردوە، پێویستی بە ستراتیژ و کاری جدی هەیە. پێویستی بە خۆئامادەکردنی زۆر گەورە هەیە لەڕوی ئاسایش، ئابوری و عەسکەری و کۆمەڵایەتییەوە. تەنها بۆ دو چەپڵەی ئامادەبوان و دەستخۆشیی میدیا و بەکارهێنەرانی سۆشیەڵ میدیا، بۆچی بگەڕێینەوە خاڵی سفر.





سەردەمی شازادەكان لە هەرێمی كوردستان
رۆژئاڤا و رژێمی ئەسەد رێکدەکەون؟
پرسی ئاشتیی لە تورکیا؛ لەگەڵ جەهەپە یان ئەکەپە؟
سڵاو لە ساڵح موسلیم و جانتا سورەكەی
ململانێی سعودیە و ئێران لەسەر چییە؟
ئەو گوتارە دژە ئەمریکاییە رابگرن
ئەمریکا چی بۆ هەرێم کردوە و چی لێ دەوێت؟
دەتوانن دڵی برینداری سلێمانیی ساڕێژ بکەن؟
ناپرۆفێشناڵی دیپلۆماسی کوردیی
لەسەردانەکەی مەسعود بارزانییدا
حەماسەتی نەتەوەیی لە دیداری سولەیمانیی دا
بۆچی یەکێتی خۆپیشاندان بۆ پەکەکە قبوڵناکا؟

زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە