شەڕی شاشەكان بۆ دەسەڵاتی حیزبی
نەبەز گۆران
PM:03:02---21-02-2019
ئه‌م بابه‌ته 925 جار خوێنراوه‌ته‌وه‌‌
پێناچێت هیچ گۆڕانكارییەك لە تێگەیشتنی كارەكتەری حیزبیدا هاتبێت. ئەم ماوەیە كە حیزبەكان سەرقاڵی بەژداریكردنن، یان نەكردنی حوكومەتن و هەر حیزبە و پرۆژە و تێگەیشتنی خۆی هەیە بۆ پێكهێنانی كابینەكە، فەزایەكی ناجۆریان دروستكردوە، ئەم فەزا ناجۆرە لە دونیای شاشەكاندا بەشێوەیەكی توندوتیژانە لە لایەن هەوادار، دەنگدەر، كادیری حیزبییەوە بەرێوە دەچێت.

دونیای شاشەكان لە خوێندنەوەی بۆ رووداوەكان، لە وەستان لەسەر ئایدیایی هێزەكان، گۆڕاوە بۆ دونیای پەلاماردان، تۆمەت بەخشینەوە، یەكتر جنێوبارانكردن. ئەم دونیاییە بەشێكی بنەرەتی پەروەردەی حیزبی پیشاندەدات. هیچ حیزبێك بەردەر نییە لەم جۆرە پەروەردە ناتەندروستە و هەر حیزبە و كۆمەڵێك دیواری هەیە، بۆ پەلاماردانی ئەویتری دەرەوەی خۆی. زمانێكی زبری برینداركەر، شوێنی زمانی قوڵ و تێگەیشتنی گرتوەتەوە. زمانی تەخوینكردن و وێناكردنی ئەویتر بە دوژمن، شوێنی زمانی گفوگۆی گرتوەتەوە. ئەشێت حیزبەكان خۆیان كەیفیان بەم ئاستە لاوازە بێت و، پێویستیان بەوەبێت لەرێگای زمانی زبر و دروستكردنی دۆخی حەماسییەوە، برەو بە ئایدۆلۆژیاكەی خۆیان بدەن. بەڵام پرسیارەكە ئەوەیە بەشێكی زۆری ئەو لەشكرەی لەناو ئەم فەزایەدان، بریتین لە پەراوێزخراوەكانی حیزب! ئەگەر ئەم پەراوێزخراوانە لە شوێنی بخۆرەكانی حیزب بوونایە و ئەوان لەناو ئەم فەزایەدا بوونایە، ئەكرا خوێندنەوەیەكی دیكەی بۆ بكرێت، لێ‌ پەراوێزخراوەكان ئەو كارە دەكەن، كە بخۆرەكان پێیانخۆش نییە خۆیان بیكەن!

لەچاو ئاستی خوارەوەی حیزب، سەروی حیزب لۆژیكی تر سەیری دیمەنەكان و جوڵە سیاسییەكان دەكات! گەر سەروی حیزب گوێی لە ئاستی خوارەوە بگرتایە، ئەو شەڕەی لە دونیای شاشەكانەوە دەگواستەوە بۆ واقیع، ئەما خۆشبەختانە سەروی حیزبەكان گوێ لە خوارەوە ناگرن و ناكەونە ناو ئەو دۆخە حەماسی و زبر و توندەوە، كە ئاستی خوارەوەی حیزب تێیكەوتووە. 

هەرێمی كوردستان لە ئێستادا چوار پارێزگایە، لەم چوار پارێزگایەدا بەشی چەند دەوڵەتێكی گەورە كێشە هەیە. دۆخێكی سایكۆلۆژی نادروست بەسەر كۆمەڵگەدا كشاوە. ململانێكانی حیزبەكان گەیشتووەتە ئاستێكی لاوازی سەتحی مەگەر هەر ئەوانە بیانەوێت لەو ئاستەدا قسەی تێدابكەن، دەیانەوێت لەو دۆخەدا خۆیان ببنینەوە. كابینەی نوێ‌ هیچ گۆڕانكارییەكی بنەڕەتی لەگەڵ خۆی ناهێنی. ململانێی نەوەی دووهەم_وەلیعەهدەكان_ لە حیزبەوە گوازراوەتەوە بۆ ناو حوكومەت. ئەشێت ئەم ململانێیە كۆمەڵێك كردەی روكەشی تێیدا رووبدات و، كردەكانیش بە لابردنی هەندێك دەموچاو هێنانە پێشەوەی هەندێك دەموچاوی دیكەبێت، كە جیاوازییەكی جەوهەری لە ماهیەتیاندا نییە و، تەنها گۆڕینی دەموچاوە. ئەو حیزبانەی بەژداردەبن لەم كابینە، یان بەژدارنابن، هەردوولایان گۆڕانكارییەكی بنەرەتیان پێناكرێت و، تەنها دەتوانن لەئاستی شاشەكاندا هەندێك قسە بكەن، قسەكانییان وتنەوەی قسەكانی رابردووە بە زمانێكی سەتحیتر. 

رێككەوتنەكانی حیزبەكان نمایشێكی كاتین. ئەشێت رستەی دورو درێژ لە رێككەوتنەكاندا هەبێت، ئەشێت رستەی زۆر رۆمانسی و زۆر وەهمی تێدابێت، ئەما هەمان ئەو رێككەوتنانەیە پێشوتر ئەنجامدران و كاریان پێنەكرا. بناغەی رێككەوتنەكان لەسەر رستەكان و وەهمی چاكسازی و گۆڕانكاری نییە، لەسەر پۆستەكانە. هەر حیزبە و دەیەوێت بەشی خۆی و بەپێی قەبارەی خۆی پۆستی بەركەوێت. دوو پارتەكەی دەسەڵاتیش چونكە كەوتونەتە دەست نەوەی دووهەم _وەلیعەهدەكان_ تا ئەم نەوەیە لەیەكتری تێدەگەن كەمێك دوركەوتنەوە و گرژی شاشەیی لەنێوانیاندا روودەدات، ئەما لە كۆتاییدا رێكدەكەون و بەهەمان مۆدێلی پێشوو دەسەڵات و سامانی چوارپارێزگاكەی هەرێم، بەسەر خۆیاندا دابەشدەكە. نە كەس پاڵەوانە نە كەس رابەری چاككردن و گۆڕانكاری، هەردوولایان لە جەوهەردا لەیەك دەچن و نمایشەكانیشیان كۆتایی دێت.

لەناو ئەم فەزایەدا پرسیار لە تاكەكانی كۆمەڵگەیە. گومانی تیانییە كۆمەڵگە قۆناغێكی تەواوەتی ماوە تا بتوانێت بازبدا بەسەر هوشیارییەكی ئایدۆلۆژی حیزبی، بۆ تایپێكی دیكەی هوشیاریی لەچوارچێوەیەكی حیزبیدا نەبێت. تا ئەو قۆناغە نەیەتە دی و هوشیارییەكە لە بناغەوە گۆڕانكاری بەسەردا نەیەت، لەناو سیستەمی دەسەڵاتە حیزبییەكەدا گۆڕانكاری بنەڕەتی روونادات. ئێمە قسەمان لەسەر ئەوانە نییە هەمیشە وەهمێك شك دەبەن تا خۆیان بەو وەهمەدا هەڵواسن و، كۆمەڵێك گوێگری ئازیز فریوبدەن گوایە گۆڕانكاری روودەدات و چاكسازی بەرێوەیە. هەموو گۆڕانكارییەكی راستەقینە و هەموو چاكسازییەكی راستەقینە، لە ئێستادا مەترسی گەورەیە بۆ سەر دوو پارتەكەی دەسەڵات. ئەو دوو پارتەش لەم قۆناغە حەساسەی نەوەی _وەلیعەهدەكان_دا، نایانەوێت ئەو مەترسییە بێتە بەردەمیان و سەرقاڵی ئەوەن بە تەواوەتی شوێنی خۆیان بگرن، بۆیە پشت بەستن بە وەهمی چاكسازی هەر لەوانەدێت ژیانی حیزبیان وەهماوییە. كۆمیدیا ئەوەیە حیزب بیت و تەواوی ئەو كێشانەی لەناو پێكهاتەی كۆمەڵگەدا هەیە نەبینیت و، دەسەڵات بكەیتە عەلاگەیەك و كۆی كێشەكانی پێوە هەڵواسیت و، وا وێنای گۆڕانكاری بكەیت تەنها لەچوار چێوەی دەسەڵاتدایە! لە كاتێكدا نەریت، پەروەردە، ئایدۆلۆژیا، كۆنەخوازی، خێڵ، یەكتر قبوڵنەكردن، زمانی وێران... هتد. ئەمانە كێشەی زۆر گەورە و بنەرەتین و دەسەڵاتیان لە دەسەڵاتە حیزبییەكە زیاترە. ئەم هەموو كێشەیە فەرامۆشبكەیت و كۆمەڵگەیەك سەرقاڵبكەیت بە دابەشكردنی پۆستەوە! زۆرینەی كادیر و ئەندامی حیزبی بەكۆی حیزبەكانەوە، هەمان ئەو فەزا ناتەندروستە قبوڵبكەن و بكەونە ناو دۆخێكەوە، كە خودی دۆخەكە خزمەتە بە دیواردروستكردن لەبەردەم گۆڕانكاری و چاكسازی راستەقینەدا. لە فەزایەكی ناجۆری وەك ئەوەی ئێستادا دەپرسین: ئێمە چوار پارێزگامان بەدەستەوەیە ئەوە دۆخی مامەڵەكردنمانە لەگەڵ یەكدی و كێشەكاندا، كەوایە بەرلەوەی جارێكی دیكە خوێندنەوە بۆ دەسەڵاتە نادروستەكەی حیزب بكەین، پێویستە خوێندنەوەیەكیش بۆ ئەو دۆخە بكەین لەدونیای شاشەكاندا بەشێكی كۆمەڵگەی حیزبی بەرێوەی دەبات.





‌ لە یادی راپەڕیندا سەرنجێك لەسەر نەوەی دووهەمی بەعس
شەڕی شاشەكان بۆ دەسەڵاتی حیزبی
سەردەمی وەلیعەهدەكان
كاریزما، وێرانكەری سیستەم
دەڕۆین بەرەو شوێنێكی نەزانراو
كێ‌ هەڵبژاردن دوادەخات؟!
پاڵەوانی ساختە
تەقاندنەوەی كۆگای هێزە حیزبییەكان
دەبێت قسە لەگەڵ ئێرانییەكان بكرێت
هەڵهاتووی شەنگال و شەقوەشێنی هەولێر
نوخبەی گیرفان
ڕیفراندۆم وێرانیكردین
عەفرین ئێمەی شەرمەزاركرد!
بەراوردێكی شەرمنانە، لەنێوان (عومەری سەید عەلی) و موراهیقێكی سیاسیدا
ئەتاتورك بە لەچكەوە
12345678910...

زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە