بۆ دادگای هه‌ولێر ته‌رمه‌كه‌ی جه‌مال نه‌به‌ز بگرن
لەتیف فاتیح فەرەج
AM:10:59---11-12-2018
ئه‌م بابه‌ته 4754 جار خوێنراوه‌ته‌وه‌‌

ساڵی 2015 دادگای هەولێر بڕیاری دەسگیر كردنی دكتۆر جەمال نەبەزی دەركرد و داوای لە فڕگەو شوێنگەلی دیكە كرد ، لە هەر كوێ‌ ئەو پیاوەیان بینی بیگرن ، لە كاتێكا دكتۆر جەمال نەبەز لە 1962ەوە كوردستانی بە جێهێشتبوو ، لێ‌ لە ئەڵمانیاو شوێنگەلی دیكە خزمەتی وشەی كوردی دەكردو خەرمانێكی گەورەی خزمەتی هەڵچنیبوو.

مامۆستا زەكی تاڵەبانی رەوان شاد بۆی گێڕامەوە كاتێك دكتۆر لە كەركوك مامۆستا بووە ، ئامادەیەكەی ئەوان 17 فێر خوازی تیابووە كە یەكێكیان مامۆستا زەكی بووە ، هەموو جار دكتۆر جەمال نەبەز بە قەد ژمارەی فێرخوازەكان گۆڤارو رۆژنامەی كوردی بە پارەی خۆی بۆ كڕیون.

لە بۆنەیەكدا پەیوەندیم پێیەوە كرد كە لە بارەی ئوستادەوە هەندێ‌ قسەم بۆ بكات ، بەڵام دیار بوو ئەو نەك نەیویست قسە بكات ، لە زۆرپەیوەندی و گفت و گۆی كوردستان بە گومان بوو ، گەرچی ماوەیەك بڕوای بە كوردایەتی هەندێ‌ كەس هەبوو دواتر دەركەوت ئەو كەسانە پارە دایك و باوكیانەو بۆ پارە هەموو شت دەكەن.

ئێستا كە كۆچی كردوە مەسعود بارزانی و نێچیرڤان بارزانی بە جیا بروسكەی ماتەمی بۆ خانەوادەو بنەماڵەی دەكەن و بە سونبولی نەتەوەیی ناوی دەبەن ، لێ‌ بڕیاری دادگاكە هەڵنەوەشاوەتەوە ، بۆیە من پێشنیازی ئەوە دەكەم بەرلەوەی تەرمەكەی لە فڕگەی سلێمانی دەربكرێت لە كاتی هاتنەوەیدا یەكسەر دەسگیری بكەن و بیبەنە بەردەم دادگای هەولێر.

دكتۆر لە لایەن سیاسیەكانی كوردستانەوە خۆشەویست نەبوو ، لەبەر ئەوەی بێمنەت بوو لێیان ، رەخنەی توندی لێدەگرتن ، میللەتی لە عیلەتی ئەوان هۆشیار دەكردەوە ئەو دەیگوت " ئەوانەی ڕێ‌ بۆ شەڕی چەپەڵی براكوژی تەخت دەكەن و ئاگرەكەی خۆش دەكەن ڕویان لە بەردەم ئێزدانی مەزن و نەتەوەی كوردو ویژدانی مرۆڤایەتیدا رەشە ".

دكتۆر جەمال نەبەز زیاتر لە 65 ساڵ خزمەتی وشەو فەرهەنگی كوردی كردو لە تەمەنی 85ساڵیدا بە یەكجاری چاوی لێك ناو ئەویش وەك هەموو هیواخوازەكانی دیكەی كورد بێ‌ بینینی دەوڵەتی سەربەخۆی كوردستان سەری نایەوە .







زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە