بەڵێنەکانی (10) ساڵی رابردو!
هێرش عەبدوڕەحمان
PM:04:09---31-03-2016
ئه‌م بابه‌ته 1730 جار خوێنراوه‌ته‌وه‌‌
ئەوەی ئێستا دەگوزەرێت قەیرانێکی دروستکراوە، مەسعود بارزانی ماوەی دو خولی سەرۆکایەتی سەرۆکایەتی تەواو کردوەو دو ساڵیشی بۆ درێژکراوەتەوە، ئیتر هیچ یاسایەک نیە بۆ ئەوەی لەپۆستی سەرۆکی هەرێمدا بیهێڵێتەوە، بەڵام هێشتا هەوڵدەدەن بەهەر شێوەیەک بێت و تەنانەت بە پێشێلکردنی یاساو خولقاندنی دۆخێکی نەخوازراو بۆ میلەت، لەو پۆستەدا بیهێڵنەوە، ئیتر ئا لێرەوە دەردەکەوێت ئەوە کێیە خەمی میلەت و داواکانیانە.

شتێکی چاوەڕواننەکراو نیە چیرۆکی سەرۆکایەتی ئەو (10) ساڵەی رابردو، بوەتە کەرەستەی بێهیواکردنی کوردان، بە تایبەت کە لە ئێستادا مەترسی و هەڕەشەی داعشیش وا لەبەردەرگایە و پریشکی ئەو پشێویە کوردیشی گرتۆتەوە.

ئەو سەربەخۆییەی نەمان دی!
هەمیشە وا وێنا کراوە، کە بارزانی دێت و لە عێراق جیا دەبێتەوەو قەوارەیەکی پڕ سەروەری و سەربەخۆیی ساز دەکات بۆ کوردان. بارزانی ئەو جۆرە بانگەشانەی کردوە بە بەشێکی دانەبڕاوی وتارەکانی، جاڕی سەربەخۆیی و کۆمەڵێ وشەی دیکە، هەمیشە بەڵێنەکانی بارزانی بون لە چەندین بۆنەی جیاوازدا، وردەکاری دەوڵەت سازیەکەی وەکو ئەفسانەیەک ماوەتە کە کەس پەی پێ نەبردوە چۆنە؟ بەڵام وا دەرکەوت هیچ پلانێکی لەو شێوەیە لەبنەڕەتدا بونی نەبێت و ئەو بەڵێنانە هەر وەک بەڵێنێکی بەدی نەهاتو بمێننەوە.

ئەو کاتەی داعش پەلاماری عێراقیدا، چەندین ناوچەی گەمارۆداو بە زویی کۆنترۆڵی ناوچەیەکی بەرفراوانی کرد، حکومەتی عێراقی شڵەژاوی پێوە دیار بو و لە ئەنجامدا مالیکی پۆستی سەرۆکایەتی حکومەتی لەدەستدا، هەر ئەوکات زۆر گونجاو بو بۆ راگەیاندنی دەوڵەتی کوردی. بەڵام سەرەڕای ئەوەی چەندین جار باسی لە خەونی سەربەخۆیی کورد کرا، لێ ئەوکاتیش ئەو خەونە بەرجەستە نەبو، ئیتر لای هاوڵاتیان دەرکەوت، بانگەشەکردن بۆ دەوڵەتی کوردی تەنها دروشمێک بوە بۆ راکێشانی خەڵک و هیچی تر.

بەدەر لەوەش، پاوانکردنی حوکم و دەسەڵاتەکانی هەرێمی کوردستان و دانانی کەسانی نزیکی خۆیان لە پۆستەکان و هەوڵدان بۆ خزمەتکردن و پاراستنی بەرژەوەندییەکانی حیزب، سیمای ئەو دە ساڵەی رابردون، بۆیە بەکارهێنانی هێزە ئەمنیەکان بۆ بەرژەوەندیەکانی و چاوترسێن کردنی ئەندامانی ئۆپۆزسیۆن وای لە هاوڵاتیان کردوە زیاتر لە جاران داوا بکەن بۆ چەسپاندنی یاساو دادپەروەری.

خۆپیشاندان و ناڕەزاییەکانی هاوڵاتیان لەشاروشارۆچکە جیاوازەکان، ئەوە دەردەخەن، کە هاوڵاتیان لە چ دۆخێکدا ژیان دەگوزەرێنن، ئیتر دەرککەوت لەپێناو بەرژوەندی حیزبی و کورسییەکدا، یاری بە موقەدەساتی خەڵک  دەکرێت و بژێوی ژیانیان لێ دەسەنرێت، هاوڵاتیان داوای چەسپاندنی یاسا دەکەن، لێ لەم دۆخەدا حیزبەکەی بارزانی نانی ئەو پێشمەرگانە دەبڕێت کە لە سەنگەرەکانی بەرگریدان و نیشتیمان دەپارێزن.

ئیتر هەمو شتێک و رون و ئاشکرایە، ئێستا دەرکەوت کێ لە خەمی خەڵک و دۆزە رەواکەی دایە، ئەوەش کێیە لەپێناو بەرژەوەندییەکی تاکەکەسی و حیزبیدا سزای بە کۆمەڵی خەڵک دەدات.






زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە