كێ قورئانەكەی دزی؟
‎محەمەد نوری ئەحمەد
PM:05:26---03-04-2018
ئه‌م بابه‌ته 1990 جار خوێنراوه‌ته‌وه‌‌


ڕۆژێك 'ئەبو حەسەنی ئەشعەری' لە مزگەوتی بەسڕە وانەی دینی بە قوتابییەكانی دەگوتەوە، باسی دەستپاكی و ڕاستگۆیی بۆ دەكردن، كە وانەكە تەواو بوو ئاوڕی دایەوە تەماشای كرد قورئانەكەی دزراوە، ڕووی كردە قوتابییەكان، بەڵام لە ڕووخسارییان تەقوا و ئیمانیان لێ دەباری، بە ئیخلاس و چاو بە گریانەوە  باس لە باوەڕ و دڵسۆزی دەكەن، ئەشعەری پرسی هەمووتان بەهۆی ئیمانەوە دەگرین، باشە ئەی كێ قورئانەكەمی دزی؟

ئەم چیرۆكەی ئەشعەری بووەتە نموونەیەك بۆ تۆخكردنەوەی ئەو دێڕەی كە قسەكەرەكان لەبارەی ڕاستی و دەستپاكییەوە مەرج نییە لە كردەوەكانیاندا جێ بەجێ بكەن. حیكایەتەكەی ئەشعەری لەم هەرێمەدا نەك دووبارە بووەتەوە، بەڵكو سەدان بارەش بووەتەوە. ئێمە لە هەرێمێكداین هەموو بەرپرسە باڵاكان باس لەوە دەكەن گەندەڵی و ناشەفافیەت هەیە، داهات و پارەی ئەم وڵاتی نەوتە دیار نییە. ئەندامانی مەكتەبی سیاسیی هەردوو حزب (یەكێتی و پارتی) كە خاوەن پشكن لە گەندەڵی و بردنی سامانی گشتی، لە میدیاكاندا دەڵێن: بەڵێ گەندەڵی هەیە و وڵات بەدەست قەیرانەوە دەناڵێنێت. دەڵێن: دەبێ چاكسازی بكرێ و داهات شەفاف بێ. دەڵێن: دەبێت ژیانی خەڵك باش بكەین و كێشە ئابوورییەكان نەهێڵێن! ئەم قسانە تەنز و گەمەی بەرپرسەكان نین، بەڵكو قسەی هەمیشەییانە. ئەوان ناڵێن ئێمە قورئانەكەمان دزیوە، بەڵكو دەڵێن: دەبێت دزی هەموو سامانەكان دەربخەین. تەماشاكەن چ گەمەیەكی ناشرین و بێ لەزەت لەگەڵ هاووڵاتیانی ئەم هەرێمەدا دەكەن! هەمووان دەزانین لە دوای ڕاپەڕینەوە، تەنها ئەركێك بە جوانی و بە دروستی  كە بەرپرسەكان  جێبەجێیان كردبێت؛ بردن و تاڵانكردنی سامانی ئەم هەرێمە بووە، ئەوان چەندین ساڵ لەسەر پارەی گومرگ خوێنی كوردیان ڕژاند، ئێستاش بێ دەنگ و بێ گوێدانە موعاناتی خەڵك بە پارەی نەوت  وەچەی وەچەكانیشیان ژمارەی زەبەلاحی  بانكییان هەیە. كاتێك بەرپرسانی حزبەكان (بەتایبەت یەكێتی و پارتی ) باسی قەیران دەكەن، ئەرێ بەڕاست ئاگاداری ئەوەن كە حكومڕانێتیی كوردی تەنها هۆكاری دروستكردنی قەیرانی دارایی نین،  بەڵكو هەوری بارینی قەیرانن بەسەر هاووڵاتیانی هەرێمدا.

سیاسەتكردن لای بەرپرسانی باڵا نەك خاڵی بووەتەوە لە مانای دروستی خۆی بەڵكو بووەتە پرۆسەیەكیش بۆ بێڕێزیكردن و بچووكردنەوەی هاووڵاتیان. سیاسەتكردن لەم هەرێمەدا یەكسانە بە شكاندنی ڕاستی و شەرعیەتدان بە درۆكردن. ئەو كاتەی بەرپرسێكی باڵا دەڵێت: گەندەڵكاران دەبێت سزا بدەین، ئەمە جگە لە درۆیەك هیچ مەغزایەك و ڕاستییەك لەناو ئەم قسانەیدا نابینرێت، چونكە ئەوانەی گەندەڵییان كردە پرۆسەیەكی  ئاسایی و دزیكردنی زەبەلاحیان كردە حاڵەتێكی ڕێگەپێدراو، ئەو بەرپرسانە بوون كە باس لە گەندەڵی دەكەن. بۆیە كاتێكیش دەڵێن گەندەڵی هەیە  و دەبێت چارەسەر بكرێت، وەك ئەوە وایە بڵێن من بە ناوی سیاسەتكردنەوە درۆتان بۆ دەكەم و حیكایەتی مێشتان بۆ دەگێڕمەوە. پارتی و یەكێتی بەهای ڕاستگۆیی و قسەكردنیشیان نەهێشت، ئەوان بە نرخی ڕاستی دەیانەوێت درۆمان پێ بفرۆشنەوە، سیاسییە كوردەكان هاوشێوەی پاڵەوانی ئەو چیرۆكەی 'عەزیز نەسین'ن كە لەوكاتەی دەچێتە سەر كورسیی بەرپرسیارێتی، بڕیار دەدا واز لە ڕاستگۆیی و قسەی ڕاست  بهێنێت، نەسین لە یەكێك لە چیرۆكەكانیدا باس لە پیاوێك دەكات كە دەسەڵاتدارە، بەڵام بۆ خەڵكەكە ڕوون بووەتەوە كە قسەی ڕاست بە زاریدا نایەت، بۆیە هەر كە دەردەكەوێت دەڵێت: سڵاوتان لێبێت خۆشەویستان، ئیتر دەزانن لە سڵاوكردنەوەكە درۆ دەكات تا خواحافیزەكەی كاتێك پێیان دەڵێت بەسەرچاو هەموو پێشنیازەكان جێ بەجێ دەكەین، ئەوان دەڵێن تەنانەت لە سڵاوكردن و خواحافیزیشدا درۆمان بۆ دەكات، ئێتر چۆن بەڵێنەكان جێ بەجێ دەكات. بەرپرسانی ئەم دوو حزبەش خۆیان قورئانەكەیان دزیوە، كەچی بە خەڵك دەڵێن كێشەكان چارەسەر دەكەین و گەندەڵكاران سزا دەدەین، لە كاتێكدا مرۆڤی گەندەڵ ناتوانێت بەشدار بێت لە بەرەنگاربوونەوەی گەندەڵی، هەرچۆن دزەكان ناتوانن ببنە دادوەری چەسپاندنی دەستپاكی. یان وەك 'كانت' لە پێناسەی مرۆڤی گەندەڵدا دەڵێت: پێكهاتەی مرۆڤی گەندەڵ ئەوەیە كە ناتوانێت هیچ كات كارێكی دروست و ڕاست بكات و بە ئەنجامی بگەیەنێت. (ئەم قسەی كانت بووەتە ناونیشانی كتێبێكی ئایزایا بەرلینیش). بە هەمان ئاواز دەتوانین بڵێین: بە مەكتەبی سیاسیی یەكێتی و پارتی گەندەڵی چارەسەر نابێت، لەبەرئەوەی هەركاتێك باسیان لە بەرەنگاربوونەوەی گەندەڵی كرد، دەبێت بترسین، چونكە گەندەڵییەكی نوێیان بەدەستەوەیە كە لەسەر سامانی گشتی بیكەن.





ساڵی كەوتنی حورمەتی سیاسیی
ئەگەر نەوشیروان مستەفا بگەڕێتەوە ئەم گۆڕانە دەناسێتەوە؟
بۆیە ئەمە رونەدا، با ئەمەیان بكرێت
ئایا دەسڕێتەوە؟
یەكێتی دەچێتەوە ناو یاریگاكە؟
كێ قورئانەكەی دزی؟
پێش نۆمانگ لەمەوپێش، پێكەنین بە دیار دروستكردنی دەوڵەتەوە
با هەر بمێننەوە
تەقەی جام دێت
مەلابەختیار وكارەبا
عومەر فەتاح باسی دیموكراسی كرد
ئاواتەكەی موحسن حەكیم دێتە دی، كچانی ٩ساڵ ئامادەبكەن
كامیان خەتابارە یەكێتی یان پارتی؟
چی روویدا؟
با ئەزموونەكە تێكبچێت
123

زۆرترین خوێنراو
گۆڤاری لڤین
318
ژمارە
وتار
لڤینی نوێ
59
ژمارە